ޖަޕާނު ސަރުކާރުން އޭސީސީއަށް 18 މިލިޔަން ރުފިޔާގެ އެހީއެއް

ކޮރަޕްޝަން ހުއްޓުވައި، ރާއްޖޭގައި ނަޒާހަތްތެރިކަން އިތުރުކުރުމަށް އެންޓި ކޮރަޕްޝަން ކޮމިޝަން، އޭސީސީންކުރާ މަސައްކަތްތަކަށް އެހީވުމުގެ ގޮތުން ޖަޕާނު ސަރުކާރުން ރާއްޖެއަށް 18.5 މިލިޔަން ރުފިޔާގެ އެހީއެއް ދިނުމަށް ނިންމައިފިއެވެ.

ޖަޕާނު ސަރުކާރުން ރާއްޖެއަށް ދިނުމަށް ނިންމާފައިވާ އެހީއާ ގުޅޭ އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ޚާރިޖީ ވަޒީރު ޑރ. ޢަބްދުﷲ ޚަލީލެވެ. ޖަޕާނު ސަރުކާރުގެ ފަރާތުން ސޮއިކުރެއްވީ ސަފީރު ޓަކެއުޗީ މިދޯރީއެވެ.

އެހީ ފޯރުކޮށްދިނުމުގެ އެއްބަސްވުމުގައި ސޮއިކުރެއްވުމަށްފަހު ވާހަކަފުޅުދައްކަވަމުން ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވީ ޖަޕާނުން ރާއްޖެއަށް އެހީ ފޯރުކޮށްދީފައިވަނީ އެ ޤައުމުގެ އިކޮނޮމިކް އެންޑް ސޯޝަލް ޑިވަލޮޕްމެންޓް ޕްރޮގުރާމްގެ ދަށުން ކަމަށެވެ. އަދި މި އެހީގެ ސަބަބުން އެންޓި ކޮރަޕްޝަން ކޮމިޝަންގެ މަސައްކަތްތައް ވަރަށް ބޮޑަށް ހަރުދަނާކުރެވޭނެކަން ވަޒީރު ފާހަގަކުރެއްވޮއެވެ.

ވަޒީރު ވިދާޅުވީ ޖަޕާނުގެ އެހީގެ ސަބަބުން ކޮރަޕްޝަންގެ މައްސަލަތައް ބެލުމުގައި އޭސީސީގެ ޤާބިލުކަން އިތުރުވެ، އެ އިދާރާގެ މަސައްކަތްތައް އަވަސްކުރެވޭނެ ކަމަށެވެ.

"ކޮރަޕްޝަންގެ ސަބަބުން އިޤުތިޞާދަށް ނޭދެވޭ އަސަރުކުރޭ. އަދި މާލީ ގޮތުން ދަތި ހާލަތަކަށް ޤައުމު ވައްޓާލާ. މިކަން ވެނުދިޔުމަށްޓަކައި އޭސީސީންކުރާ މަސައްކަތަށް ލިބުނު ވަރަށް ބޮޑު ބާރެއް މި އެހީއަކީ." ވަޒީރު ވިދާޅުވިއެވެ.

ވަޒީރުގެ ވާހަކަފުޅުގައި ޖަޕާނު ސަރުކާރުން އަބަދުވެސް ރާއްޖެއަށް ގިނަ ދާއިރާތަކުން އެހީ ވެދެއްވާކަން ފާހަގަކުރެއްވިއެވެ. އަދި އެހީ ލިބޭ ދާއިރާތައް ފުޅާކޮށް، ދެ ޤައުމުގެ ގުޅުން އިތުރަށް ބަދަހިކުރުމަށް މަސައްކަތްކުރައްވާނެކަމަށްވެސް ވަޒީރު ވިދާޅުވިއެވެ.

އެހީ ފޯރުކޮށްދިނުމުގެ އެއްބަސްވުމެއްގައި ސޮއިކުރެއްވުމަށްފަހު ވާހަކަދައްކަވަމުން ޗަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޓަކެއުޗީ މިދޯރީ ވިދާޅުވީ ރާއްޖެއިން ކޮރަޕްޝަނާ ދެކޮޅަށްކުރާ މަސައްކަތުގައި އެއްބާރުލުންދޭން ބޭނުންވާ ކަމަށެވެ. އަދި ރައްޔިތުންގެ މެދުގައި އިޚުލާސްތެރިކަމާއި ނަޒާހަތްތެރިކަން އަށަގެންނެވުމަކީ ޤައުމެއްގެ ތަރައްޤީއަށް ވަރަށް މުހިންމުކަމެއްކަން ސަފީރު ފާހަގަކުރެއްވިއެވެ. އެހެންކަމުން އޭސީސީގެ މަސައްކަތަށް އެހީގެ ސަބަބުން އަވަސްކަމާއި ހަރުދަނާކަން އަންނާނެކަމަށް އުންމީދުކުރައްވާކަމަށް ސަފީރު ވިދާޅުވިއެވެ.

"އަޅުގަނޑު އުންމީދުކުރަނީ ދެ ޤައުމުގެ ގުޅުންތައް އިތުރަށް ބަދަހިވާނެކަމަށް މި އެހީގެ ސަބަބުން. އަދި މި އެހީގެ ނަތީޖާ ވަރަށް އަވަހަށް ފެންނާނެކަމަށް އުންމީދުކުރަން. އުންމީދުކުރަނީ މި އެހީގެ ސަބަބުން ކޮރަޕްޝަނާ ދެކޮޅަށްކުރާ މަސައްކަތުގައި ވަރަށް ބޮޑު އެހީތެރިކަމެއް ލިބޭނެކަމަށް." ސަފީރު ވިދާޅުވިއެވެ.

ޖަޕާނު ސަރުކާރުން ފޯރުކޮށްދިން އެހީގެ ތެރޭގައި ފައިސާގެ އެހީއާއި 14 ވެހިކަލާއި 2 ކަނޑު އުޅަނދު ހިމެނެއެވެ.