ދުންފަތާ ދުރުވާން ބޭނުންވާ މީހުންނަށް ޚާއްސަ ކުއިޓް ލައިން، 1676ގެ ޚިދުމަތް ފަށައިފި
-
ކުއިޓް ލައިންގެ ޚިދުމަތް 24 ގަޑިއިރަށް ލިބޭނެ
ދުންފަތާ ދުރުވާން ބޭނުންވާ މީހުންނަށް ބޭނުންވާ އެހީތެރިކަން ފޯރުކޮށްދޭ ކުއިޓް ލައިންގެ ޚިދުމަތް މިއަދު ފަށައިފިއެވެ.
ކުއިޓް ލައިންގެ ނަންބަރަކީ 1676 އެކެވެ. މިނަންބަރުގެ ޚިދުމަތް 24 ގަޑިއިރަށް ލިބޭނެކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ވިދާޅުވެއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ ދުންފަތުގެ އިސްތިއުމާލުކުރުން ހުއްޓާލުމަށް ކުރާ މަސައްކަތުގައި އެ ހޮޓްލައިން މެދުވެރިކޮށް ތަޖުރިބާކާރުންގެ އިރުޝާދާއި އެހީތެރިކަން ކޮންމެ ވަގުތަކު ވެސް ލިބޭނެކަމަށެވެ.
Introducing Tobacco Quit Line 1676 – Your Support for a Tobacco-Free Life. Reach out anytime for expert guidance and assistance on your journey to quit tobacco.#quittobacco#beatNCDs#25by30#HealthForAll#DhafaraaForTobaccoFreeNextGen pic.twitter.com/G1PD4oDyIf
— Health Protection Agency (@HPA_MV) December 8, 2024
ސިއްޙަތާ ބެހޭ ވުޒާރާއިން ބޭއްވި ނިއުސްކޮންފަރެންސްގައި ވަޒީރު ޢަބްދުﷲ ނާޒިމް ވިދާޅުވީ
ދުންފަތުގެ އިސްތިއުމާލުކުރުމަށް އާދަވެފައިވާ ފަރާތްތަކަށް އެކަން ހުއްޓާލުމަށް ބޭނުންވާ އެހީތެރިކަން މުޅި ރާއްޖޭގައި ލިބޭނެހެން ސިޒޭޝަންގެ ޚިދުމަތް ގާއިމުކުރުމަށް ކެބިނެޓުން ނިންމައިފައިވާ ކަމަށެވެ.
އަދި ސެޒޭޝަންގެ ޚިދުމަތް ދިނުމަށް ބޭނުންވާ ފަންނީ މުވައްޒަފުންވެސް މިހާރު ތަމްރީން ކޮށްފައިވާ ކަމަށް ވަޒީރު ވިދާޅުވިއެވެ. އަދި ދުންފަތުން ދުރުވުމަށް ބޭނުންވާ މީހުންގެ ފަރުވާގެ ކަންކަން އާސަންދައިން ލިބޭނެ ގޮތް ހަމަޖައްސާފައިވާކަމަށެވެ.
ދުންފަތާ ދުރުވާން ބޭނުންވާ މީހުންނަށް ބޭނުންވާ އެހީތެރިކަން ދިނުމުގެ ގޮތުން ސެޒޭޝަންގެ ޚިދުމަތް މާލޭގައި ދެނީ 3 ހޮސްޕިޓަލަކުންނާއި ދަމަނަވެށިންނެވެ. އަދި އަތޮޅުތެރޭގެ 48 ތަނަކުން މިޚިދުމަތް ލިބޭގޮތް ވަނީ ހަމަޖައްސާފައެވެ.
ދުންފަތުގެ އިސްތިއުމާލުކުރުން މަދުކުރަން ސަރުކާރުން އެކުލަވާލާފައިވާ ޕްލޭންގެ ދަށުން، މިފާއިތުވި ދުވަސްތަކުގައި ގިނަ ފިޔަވަޅުތަކެއް ވަނީ އަަޅާފައެވެ. އެގޮތުން ދުންފަތް ކޮންޓްރޯލުކުރުމާ ބެހޭ ގާނޫނާއި، އެކްސްޕޯޓް އިމްޕޯޓް ގާނޫނަށް އިސްލާހު ގެނެސް ވޭޕްކުރަން ބޭނުންކުރާ އިލެކްޓްރޯނިކް ވަސީލަތްތަކުގެ އިމްޕޯޓް ޑިއުޓީއަށް ވަނީ ބޮޑެތި ބަދަލުތަކެއް ގެނެސްފައެވެ.
އަދި މިދިޔަ މަހުގެ 15 އިން ފެށިގެން ރާއްޖެއަށް ވޭޕް އެތެރެކުރުން މަނާކޮށް، މި މަހުގެ 15އިން ފެށިގެން އެ ތަކެތި ވިއްކުމާއި ބޭނުންކުރުން ވަނީ މަނާކޮށްފައެވެ. އޭގެއިތުރުން، ދުންފަތް ކޮންޓްރޯލްކުރުމާ ބެހޭ ގާނޫނު ތަންފީޒުކުރުމާއި އެ ގާނޫނު މިހާރަށް ވުރެ ހަރުކަށި ކުރުމަށް ބަދަލުތައް ގެންނަންވަނީ ނިންމަވާފައެވެ. މިގޮތުން ސިނގިރޭޓާއި ބިޑި ފަދަ ދުންފަތުގެ ބާވަތްތަކުން ޑިއުޓީ ވަނީ މިދިޔަ މަހުގެ އެއްވަނަ ދުވަހުން ފެށިގެން ބޮޑުކޮށްފައެވެ.