ހެއިޑެންހެއިމް ބަލިކޮށް ބަޔާނުން ލީޑު ފުޅާކޮށްފި

ޖަރުމަން ލީގުގައި ރޭ އަމިއްލަ ދަނޑުގައި 2-4 ގެ ނަތީޖާއަކުން ހެއިޑެންހެއިމް ބަލިކޮށް، ބަޔާން މިއުނިކުން ތާވަލުގެ ކުރީގައި ލީޑު ފުޅާކޮށްފިއެވެ.

ލީގުގައި މިހާތަނަށް މެޗަކުން ބަލިވެފައިނުވާ ބަޔާނުން ވަނީ އެންމެ ފަހުން ކުޅުނު ހަތަރު މެޗުން ވެސް މޮޅުވެފައެވެ.

ބަޔާނުން މި މެޗަށް ނިކުތްއިރު އަނިޔާގެ ސަބަބުން ހެރީ ކޭން އާއި މެނުއެލް ނޯޔާގެ އިތުރުން ސާޖް ނެބްރީ އަދި މަތީސް ޓެލް ނުކުޅެއެވެ. އެ ޓީމުގެ ޖަރުމަނު މިޑްފީލްޑަރު، ޖަމާލް މުސިއާލާ ވެސް މެޗު ފެށީ ބެންޗުންނެވެ.

ބަޔާންގެ އެލިއާންޒް އެރީނާގައި ރޭ ކުޅުނު މި މެޗު ފެށިގެން 18 ވަނަ މިނެޓުގައި އެ ޓީމުން ލީޑްނެގީ ފްރާންސްގެ ޑިފެންޑަރު، ޑަޔޮޓް އުޕަމެކާނޯ ކާމިޔާބުކުރި ގޯލުންނެވެ. މި ލަނޑާއެކު އެ ޓީމުން ފުރަތަމަ ހާފު ނިންމާލީ 1-0 އިން ކުރީގަ އޮވެގެންނެވެ.

ދެވަނަ ހާފުގެ ކުޅުން ފެށިތާ ފަސް މިނެޓުގެ ތެރޭގައި ހޮންސަކްގެ ގޯލުން ހެއިންޑެންހެއިމް އެއްވަރުކުރިއިރު، އޭގެފަހުން މެޗުގެ 56 ވަނަ މިނެޓުގައި ޖަމާލް މުސިއާލާ ޖެހި ލަނޑުން ބަޔާނުން އަލުން ލީޑްނެގިއެވެ. އަދި އޭގެފަހުން، މެޗުގެ 84 ވަނަ މިނެޓުގައި ލެއޮން ގޮރެޓްޒްކާގެ ލަނޑާއެކު ބަޔާނުން ލީޑް ފުޅާކޮށްފައިވަނިކޮށް، އޭގެ މިނެޓެއްފަހުން ޑޯޝްކް ޖެހި ލަނޑުން ހެއިންޑެންހެއިމް ފަރަގުކުޑަކުރިއެވެ.

އިތުރުވަގުތުގެ ތެރޭގައި ބަޔާނުން މި މެޗުގައި ކާމިޔާބުކުރި ހަތަރުވަނަ ލަނޑުޖަހައިދިނީ މުސިއާލާ އެވެ.

މި ނަތީޖާއާއެކު ބަޔާން އެއްވަނައިގައި އޮތީ 13 މެޗުން 33 ޕޮއިންޓް ހަމަކޮށްގެންނެވެ. ދެވަނައިގައި އޮތް އެއިންޓްރަކްޓް ފްރެންކްފާޓަށް 13 މެޗުން 27 ޕޮއިންޓް ލިބިފައިވާއިރު، އޭގެ އެއްޕޮއިންޓް ފަހަތުން ތިންވަނައިގައި އޮތީ ބަޔާ ލެވަކޫސަން އެވެ. ހަތަރުވަނައިގައި އޮތް އާރްބީ ލިޕްޒިގަށް ލިބިފައިވަނީ 13 މެޗުން 24 ޕޮއިންޓެވެ.
ރޭގެ މެޗުން ބަލިވި ހެއިޑެންހެއިމް އޮތީ ތާވަލްގެ 16 ވަނައިގައެވެ. އެ ޓީމަށް ކުޅުނު 13 މެޗުން ލިބިފައިވަނީ 10 ޕޮއިންޓެވެ.

މި މުބާރާތުގައި ރޭ ކުޅުނު އެހެން މެޗުތަކަށް ބަލާއިރު، އެންމެ ފަހުގެ ޗެމްޕިއަން، ލެވަކޫސަން ވަނީ އަމިއްލަ ދަނޑުގައި 2-1 އިން ސެއިންޓް ޕައުލީ ބަލިކޮށްފައެވެ. ބޮރޫޝިއާ މުންޗެންގްލަޑްބަކްގެ ދަނޑުގައި ބޮރޫޝިއާ ޑޯޓްމުންޑް ބައްދަލުކުރި މެޗު ނިމުނީ 1-1 އިން އެއްވަރުވެގެންނެވެ.