ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގެ ދެވަނަ ބުރުގެ ފަހު ޖާގަތައް ހއ. ދިއްދޫ އާއި ދ. މީދޫން ހޯދައިފިއެވެ.
މި މުބާރާތުގެ ގްރޫޕް ސްޓޭޖުގެ ފުރަތަމަ ފިޔަވަހީގެ ފަހު މެޗުތައް މިއަދު ކުޅުނުއިރު، ދިއްދޫން ވަނީ މިރޭ ފަހަތުން އަރައި 4-2 ގެ ނަތީޖާއަކުން ގދ. ފަރެސްމާތޮޑާ ބަލިކޮށްފައެވެ.
ގައުމީ ފުޓްބޯޅަ ދަނޑުގައި ކުޅުނު މި މެޗުގެ ވަރަށް ކުރީކޮޅު ފަރެސްމާތޮޑާއިން ވަނީ ލީޑު ނަގާފައެވެ. މެޗު ފަށައިގެން ފަސްވަނަ މިނެޓުގައި ލިބުނު ޕެނަލްޓީއަކުން މި ލަނޑު ޖަހައިދިނީ ބިދޭސީ ޑިފެންޑަރު މުޙައްމަދު އަބްދުލްލަތީއެވެ. އަދި ފުރަތަމަ ހާފު ނިމެން މިނެޓަކަށް ވެފައި ވަނިކޮށް، ދިއްދޫގެ ގޯލްކީޕަރު ހެދި ގޯހެއްގެ ފައިދާ ނަގައި ޝައިސުﷲ އަޝްރަފް ވަނީ ފަރެސްމާތޮޑާއަށް ލީޑު ފުޅާކޮށްފައެވެ.
މި މެޗުގައި ދިއްދޫން ފަރަގު ކުޑަކޮށްފައިވަނީ މެޗުގެ ފަހުކޮޅު ކާމިޔާބުކުރި ހަތަރު ލަނޑާއެކުއެވެ. އެގޮތުން މެޗު ނިމެން ހަތް މިނެޓަށް ވެފައި ވަނިކޮށް ދިއްދުއަށް ފަރަގު ކުޑަކޮށްދިނީ ހައިސަމް ރަޝީދެވެ. އޭގެ ފަސް މިނެޓު ފަހުން ހައިސަމް އިތުރު ލަނޑެއް ޖަހައި ދިއްދުއަށް ނަތީޖާ އެއްވަރުކޮށްދިންއިރު، އޭގެ އިރުކޮޅެއް ފަހުން ހައިސަމް ތަނަވަސްކޮށްދިން ފުރުސަތެއްގައި އާދަމް ނަސީމް ވަނީ ލަނޑެއް ކާމިޔާބުކޮށް ދިއްދުއަށް ލީޑު ނަގައިދީފައެވެ. މި މެޗުގައި ދިއްދޫގެ ހައިސަމް ހެޓްރިކް ހަދާފައިވަނީ މެޗުގެ އިތުރު ވަގުތުގައި ލިބުނު ޕެނަލްޓީއަކުންނެވެ.
މީގެ އިތުރުން މި މުބާރާތުގައި މިއަދު ހަވީރު ކުޅުނު މެޗުގައި މީދޫން ވަނީ 2-1 ގެ ނަތީޖާއަކުން ދ. ކުޑަހުވަދޫ ބަލިކޮށްފައެވެ.
މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފު ފަށައިގެން 10 ވަނަ މިނެޓުގައި މީދޫން ވަނީ ލީޑު ނަގާފައެވެ. ލިބުނު ޕެނަލްޓީއަކުން މި ލަނޑު ޖަހައިދިނީ މުޒްދާން ހަސަނެވެ. އަދި މެޗުގެ 82 ވަނަ މިނެޓުގައި އިބްރާހީމް އިމްރާން ވަނީ މީދޫގެ ލީޑު ފުޅާކޮށްދީފައެވެ. އެކަމަކު އޭގެ ހަތަރު މިނެޓު ފަހުން ކުޑަހުވަދޫން ފަރަގު ކުޑަކުރިއިރު، މި ލަނޑު ޖަހައިދިނީ މުޙައްމަދު ޒިހާން ހުސައިނެވެ.
މި ނަތީޖާތަކާއެކު ދިއްދޫ އާއި މީދޫ ދެވަނަ ބުރަށް ދަތުރުކުރިއިރު، ފަސް ޓީމު ހިމެނޭ ގްރޫޕް އޭގައި ކުޅުނު ހަތަރު މެޗުންވެސް މޮޅުވެ 12 ޕޮއިންޓާއެކު، ގްރޫޕުގެ އެއްވަނަ ޓީމުގެ ގޮތުގައި ދެވަނަ ބުރަށް ދަތުރުކޮށްފައިވަނީ ފުވައްމުލައް ސިޓީއެވެ. ދެވަނައިގައި އޮތް ދިއްދޫ އާއި ތިންވަނައިގައި އޮތް މީދުއަށް ހަތް ޕޮއިންޓް ލިބިފައިވާއިރު، ހަތަރުވަނައިގައި އޮތް ކުޑަަހުވަދުއަށް ލިބުނީ ތިން ޕޮއިންޓެވެ. އަދި ފުލުގައި ނިންމާލި ފަރެސްމާތޮޑާ ވަނީ ކުޅުނު ހަތަރު މެޗުންވެސް ބަލިވެފައެވެ.