އާއްމު ރައްޔިތުން ހިމެނޭހެން މީޑިއާ ކައުންސިލަށް 10 މެމްބަރުން ހޮވައިފި

މޯލްޑިވްސް މީޑިއާ ކައުންސިލުގެ ހުސްވެފައިވާ 10 ގޮނޑިއަށް މެންބަރުން ހޮވައިފިއެވެ.

15 މެމްބަރުން ހިމެނޭ މީޑިއާ ކައުންސިލުން ހުސްވެފައިވާ 10 ގޮނޑީގެ ތެރޭގައި ހިމެނެނީ މީޑިއާ ތަމްސީލްކުރާ 7 ގޮނޑިއާއި އަމިއްލަގޮތުން ވާދަކުރާ 3 ގޮނޑިއެވެ.

މާބޮޑު ވާދަވެރިކަމެއް ނެތް އިންތިޚާބުގައި މީޑިއާތައް ތަމްސީލްކުރާ ގޮނޑިތަކަށް ހޮވުނީ އާފަތިސް ނޫސް، ވަގުތު ނޫސް، ހަތާވީސް ނޫސް، މިހާރު ނޫސް، ދިޔަރެސް ނޫސް ހަފްސީ ނޫސް ތިލަދުން ނޫހުގެ ކެންޑިޑޭޓުންނެވެ. އާއްމުންގެ ތެރެއިން އިންތިހާބު ކާމިޔާބު ކުރީ ފާތިމަތު ފަހުމީ، އިބްރާހިމް ފައުޒީ އަދި އިބްރާހިމް މުހައްމަދު ނަމަކަށް ކިޔާ ބޭފުޅުންތަކެކެވެ.

ޤަވާއިދުން އަދާހަމަނުކުރިނަމަވެސް، ރާއްޖޭގައި ރަޖިސްޓްރީކޮށްފައި އޮންނަ ކޮންމެ މީޑިއާއަކަށްވެސް މި އިންތިޚާބުގައި ވޯޓްލެވެއެވެ. އެގޮތުން 139 މީޑިއާއަކުން އިންތިޚާބުގައި ވޯޓްލާފައިވާއިރު، އޭގެތެރޭގައި ޓީވީ، ރޭޑިއޯ، އޮންލައިން އަދި އެކި ނަންނަމުގައި ރަޖިސްޓްރީކޮށްފައިވާ މަޖައްލާތައްވެސް ހިމެނެއެވެ. މީގެއިތުރުން މީޑިއާތައް ރެގިއުލާޓްކުރާ މީޑިއާ ކައުންސިލުގައި އާއްމުންގެ ތެރެއިން 7 މެމްބަރުން ތިބޭއިރު، އެ ބޭފުޅުންނަކީ މީޑިއާ ގުޅުންހުރި ދާއިރާއެއްގައި ބޭފުޅުންނަށް ވާކަށްވެސް ނުޖެހެއެވެ.

މީޑިއާ ކައުންސިލުގެ ދައުރަކީ މީލާދީ ގޮތުން ދެ އަަހަރެވެ. މީޑިއާ ރެގިއުލޭޓްކުރުމުގެ އިތުރުން މި ކައުންސިލުން ކުރާ މައިގަނޑު މަސައްކަތްތަކުގެ ތެރޭގައި ކޮންމެ އަހަރަކު ނޫސްވެރިކަމުގެ އިނާމު ދިނުން ހިމެނެއެވެ.

ދުނިޔޭގެ އެހެން ޤައުމުތަކުގައި މީޑިއާތައް ރެގިއުލޭޓްކުރަން މައިގަނޑު އެއް މުއައްސަސާ އޮންނައިރު، ރާއްޖޭގައި މީޑިއާތައް ރެގިއުލޭޓްކުރަން ދެ މުޢައްސަސާ އޮވެއެވެ. އެއީ މީޑިއާ ކައުންސިލާއި ބްރޯޑްކާސްޓިން ކޮމިޝަނެވެ. ދައުލަތުގެ ބަޖެޓުން ދެ މުޢައްސަސާއެއް ބޮޑު ޚަރަދެއް ހިނގާއިރު، މީޑިއާގައި މަސައްކަތްކުރާ ފަރާތްތަކުން ޢަމަލުކުރަންވީ ހަމަތަކާއި، އެފަރާތްތަކުގެ އަޚްލާޤީ މިންގަނޑުތައް އެކަށައަޅައި ތަންފީޒު ނުކުރެވޭކަމުގެ ޝަކުވާ ދަނީ ދުވަހެއް ދުވަހަކަށް ދަނީ ބޮޑުވަމުންނެވެ.

މީޑިއާގެ މިނިވަންކަން އެންމެ ފުޅާދާއިރާއެއްގައި ކުރިއަރުވައި ތަރައްގީކުރަންޖެހޭއިރު ޒިންމާދާރުކަމާއެކު ހަރަކާތްތެރިވާ މީޑިއާތައް ރާއްޖޭގައި ޤާއިމުކުރުމަށްޓަކައި، މީޑިއާ އެންޑް ބްރޯޑްކާސްޓިން ކޮމިޝަންގެ ނަމުގައި އައު ކޮމިޝަނެއް އުފެއްދުމަށް މަޖިލީހަށް ބިލެއްވެސް ހުށަހެޅިއެވެ. މޯލްޑިވްސް މީޑިއާ ކައުންސިލާއި ބްރޯޑްކާސްޓިން ކޮމިޝަން އެއްކޮލުމަށް ހުށަހެޅި ބިލާއި ގުޅިގެން ބައެއް ފަރާތްތަކުން ކަންބޮޑުވުން ފާޅުކުރުމުން ބިލު ވަނީ އަނބުރާ ގެންގޮސްފައެވެ.