ޣައްޒާގެ މުސްލިމުންނާ ދެކޮޅަށް ހިންގާ ޖަރީމާތައް ހުއްޓުވުމަށް ޓްރަމްޕުގެ މަންދޫބުންނާއެކު މަޝްވަރާއަށް
ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ހިންގަމުންދާ ލާއިންސާނީ ޖަރީމާތައް ހުއްޓުމަކަށް ގެނައުމަށް ކުރަމުންދާ މަޝްވަރާތައް އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕުގެ އިންތިޚާބީ ސަރުކާރާއެކު ކުރަމުންދާ ކަމަށް މަޝްވަރާތަކުގައި އެންމެ އިސްކޮށް ޙަރަކާތްތެރިވާ ޤަތަރުގެ ބޮޑުވަޒީރު އަދި ދާޚިލީ ވަޒީރު އަލް-ޝައިޚް މުޙައްމަދު ޢަބްދުއްރަޙްމާން އަލް-ޘާނީ ހާމަކުރައްވައިފިއެވެ.
ޣައްޒާގެ މުސްލިމުންނާ ދެކޮޅަށް 2023 އޮކްޓޫބަރު 7ން ފެށިގެން ހިންގަމުންދާ ލާއިންސާނީ ޢުދުވާނުގައި ޝަހީދުކޮށްލާފައިވާ މީހުންގެ ޢަދަދު ވަނީ 44،000އަށް އުފުލިފައެވެ. ފާއިތުވި 14 މަސްދުވަހުގެ ތެރޭގައި ޣައްޒާގެ ބޮޑުބައެއް ސުންނާފަތިވެ ނެތިގޮސްފައި ވީ ނަމަވެސް ޔަހޫދީ ފައުޖުގެ ލާއިންސާނީ ޢަމަލުތައްދަނީ ހުއްޓުމެއްނެތި ކުރިއަށެވެ.
ޓްރަމްޕުގެ މެދުއިރުމަތީގެ މަންދޫބުން ވަނީ ޖަނަވަރީ މަހުގެ 20ވަނަ ދުވަހު އޭނާ ރައީސްކަމުގެ ހުވައިކުރެއްވުމުގެ ކުރިން ހަނގުރާމަ ހުއްޓައިލައި ރަހީނުން ދޫކޮށްލުމުގެ އެއްބަސްވުމަކާހަމައަށް އައުމަށް މަޝްވަރާކުރުމަށް ޤަތަރަށާއި ޔަހޫދީ ދަޢުލަތަށް ދަތުރުކޮށްފައެވެ.
ޤަތަރުގެ ވެރިރަށް ދަވްޙާގައި ކުރިއަށްދާ ބައްދަލުވުމެއްގައި ވާހަކަ ދައްކަވަމުން ބޮޑުވަޒީރު އަލް-ޘާނީ ވިދާޅުވީ ޓްރަމްޕު ވެރިކަމުގެ ހުވައި ކުރެއްވުމުގެ ކުރިން އެއްބަސްވުމަކާ ހަމައަށް އައުމަށް އެމެރިކާއިން ބޭނުންވާކަމުގެ އިޝާރާތްތައް ފެންނަމުންދާކަމަށެވެ. އެހެންކަމުން ފާއިތުވި ހަފުތާތަކުގައި އިންތިޚާބީ ސަރުކާރުގެ މަންދޫބުންނާއެކު މަޝްވަރާތައް ކުރިއަށް ގެންގޮސްފައިވާކަމަށް އޭނާ ވިދާޅުވިއެވެ.
ޓްރަމްޕުގެ އައު ސަރުކާރުގައި މެދުއިރުމައްޗަށް ޚާއްސަ މަންދޫބުގެ މަޤާމާ ޙަވާލުވެވަޑައިގަންނަވާ ސްޓީވް ވިޓްކޮފް ނޮވެމްބަރު މަހުގެ ފަހުކޮޅު ޔަހޫދީ ދަޢުލަތުގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫއާ ބޮޑުވަޒީރު އަލް-ޘާނީއާ ވަކިވަކިން ބައްދަލުކުރައްވާފައިވާ ކަމަށް މަސްދަރުތަކުން ބުނެއެވެ. އަލް-ޘާނީއާއި ނިރުބަވެރި ނަތަންޔާހޫއާ އެކު ބޭއްވެވި ބައްދަލުވުމުގައި، 14 މަހުގެ މަސައްކަތަށް ފަހު ނާކާމިޔާބުވެފައިވާ މަޝްވަރާތަކުގެ އޮއިވަރު ބަދަލު ކުރުމަށް ވިޓްކޮފް މަސައްކަތް ކުރައްވާފައިވާ ކަމުގައި، ބައްދަލުވުންތަކުގެ މަޢުލޫމާތު އިނގޭ މަޞްދަރުތަކުން ހާމަކުރިއެވެ.