އެމެރިކާގެ މޭޖާ ލީގު ސޮކާ އިން ހޮވަމުން އަންނަ އަހަރުގެ މޮޅު ކުޅުންތެރިޔާގެ މަގާމަށް އިންޓަ މަޔާމީގެ ކެޕްޓަން، ލިއޮނަލް މެސީ ހޮވިއްޖެއެވެ.
އުމުރުން 37 އަހަރުގެ މެސީ މި މަގާމަށް ހޮވިފައިވާއިރު، ނިމިދިޔަ ސީޒަނަކީ މަޔާމީ އާއެކު މެސީ ހޭދަކުރި ފުރަތަމަ ފުރިހަމަ ސީޒަނެވެ. ފްރީ އޭޖެންޓެއްގެ ގޮތުގައި މެސީ އެ ޓީމާ ގުޅުނީ މިދިޔަ އަހަރުގެ މެދުތެރޭގައެވެ.
މެސީގެ އެހީތެރިކަމާއެކު މަޔާމީން ސަޕޯޓާސް ޝީލްޑް ކާމިޔާބުކުރިއިރު، އެމްއެލްއެސްގެ ޕްލޭ-އޮފްސްގައި މިދިޔަ ނޮވެންބަރު މަހުގެ ތެރޭގައި އެޓްލާންޓާ ޔުނައިޓެޑް އަތުން ވަނީ ބަލިވެފައެވެ.
އެންމެ ފަހުގެ ކޮޕާ އެމެރިކާ ފުޓްބޯޅަ މުބާރާތުގެ ފައިނަލް މެޗުގައި ލިބުނު އަނިޔާއަކާ ގުޅިގެން ނިމިދިޔަ ސީޒަނުގެ ވަކި ހިސާބަކުން މަޔާމީގެ ބައެއް މެޗުތައް މެސީ އަށް ގެއްލުނެވެ.
އެހެންނަމަވެސް، މަޔާމީ އާއެކު ނިމިދިޔަ ސީޒަނުގެ ލީގުގައި މެސީ ވަނީ 22 މެޗުގައި 21 ލަނޑުޖަހައިފައެވެ. މީގެތެރެއިން، 18 މެޗުގައި މެސީ ވަނީ އެ ޓީމުގެ ފުރަތަމަ އެގާރައިގައި ހިމެނިގެން ކުޅެފައެވެ.
އެމްވީޕީ އެވޯޑަކީ އެމްއެލްއެސްގެ ކުޅުންތެރިންނާއި ކްލަބް މެނޭޖްމަންޓާއި މީޑިއާގެ ފަރާތްތަކުގެ ވޯޓު ހިމެނޭ ގޮތަށް ދެމުން އަންނަ އެވޯޑެކެވެ. މިއީ ކޮންމެ ސީޒަނެއް ނިމުމުން އެ ފަހަރުގެ ލީގުގައި އެންމެ އަގުހުރި ކުޅުންތެރިޔާގެ ގޮތުގައި ބެލެވޭ ކުޅުންތެރިއަކަށް އަހަރަކު އެއްފަހަރު ދޭ އެވޯޑެކެވެ.
2015 ވަނަ އަހަރުން ފެށިގެން މި އެވޯޑަށް ނަން ދީފައިވަނީ އެމެރިކާގެ ގައުމީ ޓީމާއި އެމްއެލްއެސްގެ ކުރީގެ ތަރި ލެންޑަން ޑޮނޮވަންގެ ނަމުގައެވެ.