ފްރެންޗް ލީގުގައި ރޭ ރަށުން ބޭރުގައި އޯޒެއާއާ ދެކޮޅަށް ކުޅުނު މެޗުން 0-0 އިން ޕީއެސްޖީ އެއްވަރުވެއްޖެއެވެ.
ޕީއެސްޖީން އެންމެ ފަހުން ކުޅުނު ތިން މެޗުވެސް ނިންމާލަން ޖެހުނީ މޮޅެއްނުލިބިއެވެ.
މި ނަތީޖާއާއެކު ޕީއެސްޖީ އަދިވެސް އޮތީ އެއްވަނައިގައެވެ. އެ ޓީމަށް މިހާތަނަށް ކުޅުނު 14 މެޗުން 34 ޕޮއިންޓް ލިބިފައިވާއިރު، ދެވަނައިގައި އޮތް އޮލިމްޕިކް މާސޭ އަށް އެއްމެޗު މަދުން ކުޅެގެން ލިބިފައިވަނީ 26 ޕޮއިންޓެވެ. ހަމަ މިއަދަދަށް ޕޮއިންޓް ލިބިގެން އެއްމެޗު އިތުރަށް ކުޅެފައިވާ ލިއްލެ އޮތީ ތިންވަނައިގައެވެ. ހަތަރުވަނައިގައި އޭއެސް މޮނާކޯ އޮތީ ވެސް 13 މެޗުން 26 ޕޮއިންޓް ހޯދައިގެން ޖެހިގޯލްގެ ތަފާތުންނެވެ.
އޯޒެއާގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ޕީއެސްޖީއަށް އެދެވޭ ކުޅުމެއް ދެއްކިފައިނުވާއިރު، މި ހާފުގައި ލިބުނު އެންމެ ރަނގަޅު ފުރުޞަތުގައި އެ ޓީމުން ގޯލެއް ކާމިޔާބުކުރިނަމަވެސް ވީއޭއާރް އިން ބެލުމަށްފަހު ފަބިއެން ރުއީޒް އެ ބޯޅަ ފޮނުވާލުމުގެ ކުރިން އެ ޓީމުގެ ބްރެޑްލީ ބާކޯލާ އޮފްސައިޑް މަގާމެއްގައި ހުރުމުން ރެފްރީ އެ ލަނޑު ގަބޫލެއްނުކުރިއެވެ.
ދެވަނަ ހާފުގައި ޕީއެސްޖީން ކުޅުން ރަނގަޅު ކުރިއިރު، ޕޯޒުގީޒް މިޑްފީލްޑަރު، ވިޓީނިއާ ފޮނުވާލި ބޯޅައެއް ހުރަސް ދަނޑިއަށް އަމާޒުވެފައިވާއިރު، އަޝްރަފް ހަކީމީ ފޮނުވާލި ބޯޅަ އޯޒެއާގެ ކީޕަރު، ޑޮނަވަން ލެއޯން ހުއްޓުވިއެވެ.
އޭގެފަހުން، މެޗުގެ އިތުރުވަގުތުގެ ތެރޭގައި ޕީއެސްޖީގެ ފޯވާޑް، ރަންޑަލް ކޯލޯ މުއާނީ އާއި ޑެޒައިރީ ޑޫއޭ ފޮނުވާލި ހަމަލާތައް ވެސް ލެއޯން ވަނީ މަތަކޮށްފައެވެ.
މި މެޗުން އެއްވަރުވުމާއެކު އޯޒެއާ އޮތީ ތާވަލްގެ އަށްވަނައިގައެވެ. އެ ޓީމަށް ކުޅުނު 14 މެޗުން ލިބިފައިވަނީ 20 ޕޮއިންޓެވެ.
ލީގުގައި ޕީއެސްޖީ އަށް ދެން އޮތީ މި މަހުގެ 16 ވަނަ ދުވަހު އަމިއްލަ ދަނޑުގައި އޮލިމްޕިކް ލިޔޯންއާ ދެކޮޅަށް ކުޅެން ޖެހޭ މެޗެވެ. އޯޒެއާ ދެން ކުޅޭ މެޗުގައި އެ ޓީމުގެ ދަނޑުގައި ނިކުންނާނީ ލެންސްއާ ދެކޮޅަށެވެ.