ޑިވެލޮޕްމަންޓް ޒޯންތައް ތަރައްޤީކުރާނީ ލައްކައެއްހާ މީހުންނަށް ދިރިއުޅެވޭނެ ފެންވަރަށް: ވަޒީރު ޙައިދަރު

ޑިވެލޮޕްމަންޓް ޒޯންގެ ގޮތުގައި ރާއްޖޭގެ އެންމެ އުތުރާއި ދެކުނު ތަރައްޤީކުރާނީ ލައްކައެއްހާ މީހުންގެ އާބާދީއަކަށް ޚިދުމަތްދެވޭ ފެންވަރަށްކަމަށް ގެދޮރުވެރިކަމާއި ބިމާ ޢުމްރާނީ ތަރައްޤީއާ ބެހޭ ވަޒީރު ޑރ. އަލީ ޙައިދަރު އަޙްމަދު ވިދާޅުވެއްޖެއެވެ.

އަރބަން ސެންޓަރުގެ ގޮތުގައި ތަރައްޤީ ކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު 7 ރަށެއް ވަނީ ކަނޑައަޅުއްވާފައެވެ. އަދި ރާއްޖޭގެ އެންމެ އުތުރުގެ 4 އަތޮޅު ހިމެނޭހެން ޚާއްސަ ޑިވެލޮޕްމަންޓް ޒޯނަކާއި ދެކުނުގެ 4 އަތޮޅު ހިމެނޭހެން ޚާއްސަ ޑިވެލޮޕްމަންޓް ޒޯނެއް ތަރައްޤީކުރައްވަން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަނީ ނިންމަވާފައެވެ.

ޑިވެލޮޕްމަންޓް ޒޯންގެ ގޮތުގައި ރާއްޖޭގެ އެންމެ އުތުރާއި ދެކުނުގެ ސަރަހައްދުތައް ތަރައްޤީކުރުމާ ގުޅޭގޮތުން ޕީއެސްއެމް ނިއުސްއަށް މަޢުލޫމާތު ދެއްވަމުން ގެދޮރުވެރިކަމާއި ބިމާ އުމްރާނީ ތަރައްޤީއާ ބެހޭ ވަޒީރު ޑރ. އަލީ ހައިދަރު އަޙްމަދު ވިދާޅުވީ ރާއްޖޭގެ އުތުރާއި ދެކުނުގައި މާލޭ ފަދަ އިތުރު ސަރަޙައްދުތަކެއް އުފެދެންޖެހޭކަމަށެވެ.

އެ ސަރަޙައްދުތަކަކީ މާލެއާއި ދުރުގައި އޮންނަ އަދި އާބާދީ ބޮޑު ރަށްތަކެއް ހިމެނެ ސަރަޙައްދުތަކެއްކަން ވަޒީރު ފާހަގަކުރެއްވިއެވެ. ދެކުނުގެ ރަށްތަކުގައި ބައިލައްކައެއްހާ މީހުން އުޅޭއިރު، އުތުރުގައި 55000 ވަރަކަށް މީހުން ދިރިއުޅެއެވެ.

"އާބާދީ އެއްލައްކައަށް ގެނެސްގެން ނޫނިއްޔާ މަތީ ފެންވަރުގެ ޚިދުމަތްތައް ދިނުމަށް އުނދަގޫވާނެ.
ޓާޝަރީ ލެވެލެގް ޚިދުމަތް ދިނުމަށް ވަރަށްބޮޑު އާބާދީއެއްޖެހޭ ޚިދުމަތް ހޯދަން އަންނަން. މި ތަންތަން ތަރައްޤީކުރެވުމުން މަތީ ފެންވަރުގެ ޚިދުމަތްތައް ލިބޭނެ" ރު ޑރ. އަލީ ހައިދަރު އަޙްމަދު ވިދާޅުވިއެވެ.

ވަޒީރު ވިދާޅުވީ އާބަން ރީޖަންތަކުގެ ތެރޭގައިވެސް ވަކިވަކި އާބަން ސެންޓަރުތަކެއް ސަރުކާރުން ތަރައްޤީކުރާނެކަމަށާއި އެތަންތަނުގައިވެސް ތަފާތު ޚިދުމަތްދޭ މަރުކަޒުތައް ހުންނާނެކަމަށެވެ. މީގެ އިތުރުން ހުރިހާ ޒޯނެއްގައިވެސް ވަޒީފާގެ ފުރުޞަތުތައް ފަހިވާނެގޮތަކަށް ރާވާފައިވާނެކަމަށާއި ފަތުރުވެރިކަމުގެ އިތުރު ފުރުޞަތުތަކެއް ލިބި އަމިއްލަ ވިޔަފާރިތައް ފުޅާކުރުމަށްވެސް ފުރުޞަތުތައް ލިބޭނެކަން ވަޒީރު ފާހަގަކުރެއްވިއެވެ.

"ދިވެހީންގެރާއްޖެ" މެނިފެސްޓޯގެ ޗެޕްޓަރ 4 ޚާއްސަކޮށްފައިވަނީ ގެދޮރުވެރިކަމާއި އާރބަނައިޒޭޝަންގެ ދާއިރާއިން ސަރުކާރުން ގެންގުޅުއްވާ ސިޔާސަތުތަކަށެވެ. އެގޮތުން މާލޭ އަރބަން ރީޖަންގެ އިތުރުން މަތީ ފަންތީގެ ޚިދުމަތް ލިބޭ ސަރަޙައްދެއްގެ ގޮތުގައި ހއ، ހދ، އަދި ށ. އަތޮޅު ހިމެނޭ އުތުރުގެ ތަރައްޤީގެ ޒޯނެއް ޤާއިމުކުރުމަށް ވަނީ ހަމަޖެހިފައެވެ. އަދި މި ޒޯނުގެ އިދާރީ މައި ހަބުގެ ގޮތުގައި ހދ. ކުޅުދުއްފުށި ސިޓީ ކަނޑައަޅައި، ބައިނަލްއަޤްވާމީ ދޮރާޓެއްގެ ގޮތުގައި ހދ. ހަނިމާދޫ ޤާއިމްކޮށް ހއ. އިހަވަންދިއްޕޮޅުގައި ބައިނަލްއަޤްވާމީ ޓްރާންސް ޝިޕްމަންޓް ބަނދަރެއް ޤާއިމްކުރުން ހިމެނެއެވެ.

ހަމައެހެންމެ މަތީ ފަންތީގެ ޚިދުމަތް ލިބޭ ސަރަޙައްދެއްގެ ގޮތުގައި ގއ، ގދ، ފުވައްމުލަކު ސިޓީ އަދި އައްޑޫ ސިޓީ ހިމެނޭހެން ދެކުނުގެ ތަރައްޤީގެ ޒޯނެއް ޤާއިމުކުރުމަށް މެނިފެސްޓޯގައި ހިމަނާފައިވެއެވެ. ދެކުނު ޒޯނުގެ އިދާރީ މައި ހަބުގެ ގޮތުގައާއި ބައިނަލްއަޤްވާމީ ދޮރާށްޓެއްގެގޮތުގައި ކަނޑައަޅާފައިވަނީ އައްޑޫ ސިޓީއެވެ. އަދި ބައިނަލްއަޤްވާމީ ޓްރާންސްޝިޕްމަންޓް ބަނދަރަކާއި، ސިނާޢީ މަސައްކަތްތަކާއި، މަސްވެރިކަމާއި، ދަނޑުވެރިކަމާއި، މެރިކަލްޗާރުގެ އިތުރުން ފަތުރުވެރިކަމުގެ ވަޞީލަތްތައް ފުޅާކޮށް ތަރައްޤީކުރުންމަށް މެނިފެސްޓޯގައި ހިމަނާފައިވެއެވެ.