ޔަހޫދީ ދައުލަތުން ލުބްނާނަށް ދެމުންދާ ލާއިންސާނީ ޙަމަލާތަކުގެ ސަބަބުން ޙާލުގައި ޖެހިފައިވާ ޢާއިލާތަކަށް ފައިސާގެ އެހީގެ ގޮތުގައި، ޙިޒްބުﷲން މިހާތަނަށް 77 މިލިޔަނަށް ވުރެ ގިނަ ޑޮލަރު ދޫކޮށްފައިވާ ކަމަށް އެ ޖަމާޢަތުގެ ވެރިޔާ ނައީމް ޤާސިމް ވިދާޅުވެއްޖެއެވެ.
އެ އެހީއަށް އެދި ރަޖިސްޓްރީ ކުރި ޖުމްލަ 233،500 އާއިލާތަކުގެ ތެރެއިން ބޮލަކަށް 300އާއި 400 ރުފިޔާއާ ދެމެދުގެ ޢަދަދެއް ދީ ނިމުމުން، އެހީގެ އަދަދު 77 މިލިޔަން ޑޮލަރަށްވުރެ މަތިވާނެ ކަމަށް ޤާސިމް ވިދާޅުވިއެވެ. ޙިޒްބުﷲއާ އެކު އެ އެހީ އެއްކުރުމުގައި އީރާނުން ފޯރުކޮށްދިން އެހީތެރިކަމަށް ވެސް ޤާސިމް ޝުކުރު އަދާކުރެއްވިއެވެ.
އަދި ހަނގުރާމާގައި ގެދޮރު ސުންނާފަތިވެފައިވާ މީހުންނަށް އެއްފަހަރާ 8،000 ޑޮލަރު އަދި ބައިރޫތު ނުވަތަ އެ ސަރަޙައްދުގެ އަވަށްތަކުގައި ދިރިއުޅޭ މީހުންނަށް އަހަރެއްގެ ކުލީގެ ގޮތުގައި 6،000 ޑޮލަރު އަދި ވެރިރަށުގެ ބޭރުގައި ދިރިއުޅޭ މީހުންނަށް އެނބުރި އަވަށަށް ބަދަލުވެވެންދެން 4،000 ޑޮލަރު ވެސް ހިޒްބުاللهން ދޭނެ ކަމަށް އޭނާ ވިދާޅުވިއެވެ. ޤާސިމް ވިދާޅުވި ގޮތުގައި، ކުލީގެ ގޮތުގައި އެހީ ފޯރުކޮށްދޭ ޢަދަދު މައިގަނޑު ގޮތެއްގައި ފޯރުކޮށްދީފައި ވަނީ އީރާނުންނެވެ.
ޔަހޫދީ އިސްތިޢުމާރީ ފައުޖުން ދިން ޙަމަލާތަކުގެ ސަބަބުން ބައިރޫތުގެ ދެކުނުގެ އަވަށްތަކާއި، ލުބްނާނުގެ ދެކުނާއި އިރުމަތީ ސަރަޙައްދުތަކުގައި ހިޒްބުاللهއަށް ތާއީދުކުރާ މީހުން ދިރިއުޅޭ ސަރަޙައްދުތައް ވަނީ ސުންނާފަތިވެ، މުޅިންހެން ފަޅުވެފައެވެ.
ހަނގުރާމައަށް 14 މަސް ފުރުނު ފަހުން، ދެ ފަރާތުން މިދިޔަ މަހު ވަނީ ޙަމަލާތައް ހުއްޓައިލަން އެއްބަސްވެފައެވެ. އެކަމަކު، އެއްބަސްވުމާ ޚިލާފަށް ޔަހޫދީ އިސްތިޢުމާރީ ފައުޖުން އަދިވެސް ދަނީ ލުބްނާނަށް ޙަމަލާތައް ދެމުންނެވެ.
ހަމަލާތައް ހުއްޓާލުމާ އެކު، ޙިޒްބުﷲން މިހާރު ވަނީ ސުންނާފަތިވެފައިވާ ސަރަޙައްދުތައް އަލުން އިމާރާތްކޮށް، އާބާދު ކުރުމުގެ މަސައްކަތް ފަށައިފައެވެ.
ވަރލްޑް ބޭންކުން ލަފާ ކުރާ ގޮތުގައި، ޔަހޫދީ އިސްތިޢުމާރީ ފައުޖުން ދިން ޙަމަލާތަކުގައި 100،000އަށްވުރެ ގިނަ ގެދޮރު ވަނީ ސުންނާފަތިވެފައެވެ. އެ ގެއްލުމުގެ އަގު 3.2 ބިލިޔަން ޑޮލަރަށް ވުރެ އިތުރުވާނެ ކަމަށް ވެސް ވަރލްޑް ބޭންކުން ވަނީ ލަފާކޮށްފައެވެ.