ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގެ ގްރޫޕް އޭ ގައި ހއ. ދިއްދޫ އާއި ދ. މީދޫ ބައްދަލުކުރި މެޗު 2-2 އިން އެއްވަވުމާއެކު ފަސް ޓީމު ހިމެނޭ ގްރޫޕުގެ ފޯރި ގަދަވެއްޖެ އެވެ.
ގަލޮޅު ރަސްމީ ދަނޑުގައި ރޭ ކުޅުނު މެޗު ބައްލަވާލައްވަން ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ވަޑައިގެންނެވިއެވެ. މެޗަށްފަހު މޮޅު ކުޅުންތެރިޔާގެ މަގާމަށް ހޮވުނު މީދޫގެ އިމްރާނަށް އިނާމު ހަވާލުކޮށްދެއްވީ ވެސް މެޑަމް ސާޖިދާ އެވެ.
މި ގްރޫޕުގެ އެއްވަނަ ޓީމުގެ ގޮތުގައި ފުވައްމުލަކު ސިޓީ އޮތީ ކުޅުނު ހުރިހާ މެޗަކުން މޮޅުވެ 12 ޕޮއިންޓާއެކު އެވެ. އެއާއެކު ދެވަނަ ބުރަށް އެ ޓީމު ދަތުރުކުރީ ކުޅުނު ހުރިހާ މެޗަކުން މޮޅުވެ ސައްތައިން ސައްތަ ރިކޯޑަކާއެކު އެވެ. ދެވަނައިގައި އޮތް ދިއްދޫ އާއި ތިންވަނައިގައި އޮތް މީދޫ އަށް ލިބިފައިވަނީ ތިން މެޗުން ހަތަރު ޕޮއިންޓް ލިބިފައިވާއިރު ހަތަރުވަނައިގައި ދ. ކުޑަހުވަދޫ އޮތީ ތިން ޕޮއިންޓާއެކު އެވެ.
މި ތިން ޓީމަށްވެސް ދެވަނަ ބުރުގެ ފުރުސަތު އެބައޮތެވެ. ފުލުގައި އޮތް ގދ. ފަރެސްމާތޮޑާ ވަނީ މުބާރާތުން ކަޓާފައެވެ.
މި މެޗުގައި ދިއްދޫ އިން ޖެހި ލަނޑުތައް ކާމިޔާބުކޮށްދިނީ ހުސައިން ޝިފާހު އާއި އާދަމް ނަސީމް އެވެ. މީދޫގެ ދެ ލަނޑު ވެސް ޖަހައިދިނީ އިބްރާހިމް އިމްރާން އެވެ.
މި މުބާރާތުގައި ދެން ކުޅޭ މެޗުގައި މި މަހުގެ ހަތްވަނަ ދުވަހު މީދޫ ނުކުންނާނީ ކުޑަހުވަދޫއާ ދެކޮޅަށެވެ.