ޒިމްބާބުވޭގައި ކުރިއަށްދިޔަ ޓީ20 ސީރީޒްގެ ތިންވަނަ މެޗުގައި ޕާކިސްތާން އަތުން ދެ ވިކެޓުން މޮޅުވެއްޖެއެވެ.
މި މެޗަށް ނިކުތްއިރު ވެސް ޕާކިސްތާނުން ވަނީ ފުރަތަމަ ދެ މެޗުން ހޯދީ މޮޅާއެކު، ޓީ20 ސީރީޒް ކާމިޔާބުކޮށްފައެވެ.
ބުލަވާޔޯގައި އިއްޔެ ކުޅުނު މެޗުގެ ޓޮސް ދިމާވުމުން ޕާކިސްތާނުން ކުޅެން އަރައި، 20 އޯވަރުގެ ތެރޭގައި ހަތް ވިކެޓަށް 132 ލަނޑުހެދިއެވެ.
ޕާކިސްތާނުން އެންމެ ރަނގަޅަށް ކުޅުނީ ކެޕްޓަން، ސަލްމާން އަގާ އެވެ. އޭނާ ވަނީ 32 ލަނޑުހަދައިފައެވެ. ދެން އެންމެ ރަނގަޅަށް ކުޅުނު ތައްޔިބް ތާހިރް ވަނީ 14 ބޯޅައިން 21 ލަނޑުހަދައިފައެވެ. މީގެއިތުރުން، އަރަފާތު މިންހާސް ވަނީ ނުބައިނުވެ 22 ލަނޑުހަދައިފައެވެ.
މި އިނިންގްސްގައި ޒިމްބާބުވޭގެ އުކުންތެރިންގެ ތެރެއިން އެންމެ ގިނަ ވިކެޓްނެގީ ބްލެސިންގ މުޒަރަބާނީ އެވެ. އޭނާ ދެ ވިކެޓްނެގިއެވެ.
ޒިމްބާބުވޭ އިން ކުޅެން އަރައި، 19.5 އޯވަރުގެ ތެރޭގައި، ބާކީ އެއްބޯޅަ އޮއްވާ މެޗު ކާމިޔާބުކުރީ އަށް ކުޅުންތެރިން ނުބައިވެގެން 133 ލަނޑުހަދައިގެންނެވެ.
ޒިމްބާބުވޭ އިން އެންމެ ރަނގަޅަށް ކުޅުނީ އޯޕަނިންގ ބެޓްސްމަން، ބްރަޔަން ބެނެޓް އެވެ. މެޗުގެ މޮޅު ކުޅުންތެރިޔާގެ މަގާމަށް ހޮވުނު ބެނެޓް ވަނީ 35 ބޯޅައިން 43 ލަނޑުހަދައިފައެވެ. ދެން އެންމެ ރަނގަޅަށް ކުޅުނު ކެޕްޓަން، ސިކަންދަރް ރަޒާ ވަނީ 19 ލަނޑުހަދައިފައެވެ. މީގެއިތުރުން، އެ ޓީމުގެ ވިކެޓްކީޕަރު ބެޓްސްމަން، ޓަޑިވަނާޝޭ މަރުމާނީ ވަނީ ހަ ބޯޅައިން 15 ލަނޑުހަދައިފައެވެ.
މެޗަށްފަހު ވަނަތަކަށް ހޮވުނު ކުޅުންތެރިންނަށް އިނާމުދިންއިރު، ޓީ20 ސީރީޒްގެ މޮޅު ކުޅުންތެރިއަކަށް ހޮވުނީ ޕާކިސްތާންގެ ސްޕިން ބޯލަރު، ސުފިޔާން މުޤީމް އެވެ.