ރާއްޖޭގެ ފުރަތަމަ ފަހަރަށް ބާއްވާ ޓެނިހުގެ ބައިނަލްއަގުވާމީ ރޭންކިން މުބާރާތް ކަމަށްވާ "ދިރާގު އޭޝިއަން ޓެނިސް ފެޑެރޭޝަން މޯލްޑިވްސް 16 އެންޑް އަންޑަރ އޯޕަން ޗެމްޕިއަންޝިޕް" ހޯމަ ދުވަހު ފެށުމަށް ތައްޔާރުވެއްޖެއެވެ.
ޓެނިހުގެ މި ތާރީޚީ މުބާރާތާއި ގުޅޭގޮތުން ޕީއެސްއެމް އިން ގެނެސްދިން "ކުޅިވަރު ވިންދު" ޕްރޮގްރާމްގައި ވާހަކަދައްކަމުން ޓެނިސް އެސޯސިއޭޝަންގެ ޖެނެރަލް ސެކްރެޓަރީ ޔޫސުފް ރިޒާ ވިދާޅުވީ ރާއްޖޭގެ ޓެނިހުގެ ތާރީޚުގައި އޭޝިއަން ޓެނިސް ފެޑެރޭޝަނުގެ ރޭންކިން މުބާރާތެއް ބޭއްވިގެންދާ މިއީ ފުރަތަމަ ފަހަރު ކަމަށާއި، އެއީ މުޅި ޓެނިސް އާއިލާއަށް ލިބިގެންދާ އުފަލެއް ކަމަށެވެ.
މި ފެންވަރުގެ މުބާރާތެއް ރާއްޖޭގައި ބޭއްވުމަށް ފުރުސަތު ލިބުނީ ވަރަށް ގިނަ ދުވަހު ކުރި މަސައްކަތުން ކަމަށް ރިޒާ ވަނީ ފާހަގަކޮށްފައެވެ. އަދި މިހާގިނަ ދުވަހު މުބާރާތެއް ނުބޭއްވި ދިޔައީ ބައިނަލްއަގުވާމީ މިންގަނޑަށް ފެތޭ ޓެނިސް ކޯޓެއް ނެތުމުން ކަމަށް ރިޒާ ވިދާޅުވިއެވެ.
"ކުރެވުނު މަސައްކަތުން އަޅުގަނޑުމެންނަށް ފުރަތަމަ ފަހަރަށް މިކަހަލަ މުބާރާތެއް މި ބޭއްވެނީ، އުންމީދަކީ މީގެ ހައި ލެވަލް މުބާރާތްތައް ވެސް ރާއްޖޭގައި ހޯސްޓުކުރުން." ރިޒާ ވިދާޅުވިއެވެ.
ޓެނިސް އެސޯސިއޭޝަންގެ ނައިބު ރައީސް އިގްނާޒް މަންސޫރު ވިދާޅުވީ މި މުބާރާތް ބޭއްވިގެންދާނީ އިންޓަނޭޝަނަލް ޓެނިސް ފެޑެރޭޝަންގެ މިންގަނޑުތަކަށް ކަމަށެވެ. އިގްނާޒް ވިދާޅުވީ މުބާރާތް ރޭވިފައިވަނީ ސޯޅަ އަހަރުން ދަށުގެ ދެ ޖިންސުގެ ކުޅުންތެރިންނަށް އަމާޒުކުރެވިގެން ކަމަށާއި މުބާރާތުގައި ބޭރުގެ ގައުމުތަކުން 50 ކުޅުންތެރިން ވާދަކުރާނެ ކަމަށެވެ.
"މުބާރާތް ފެށޭއިރު ބައިވެރިވާ ގައުމުތަށް 7 ނޫނީ 8 އުޅޭނެކަމަށް މި ބަލަނީ، މުބާރާތުގައި ރާއްޖެއިން ބައިވެރިވޭ އަންހެން 12 ކުޅުންތެރިން ފިރިހެން 7 ކުޅުންތެރިން، އާންމުކޮށް އައިޓީއެފް މުބާރާތް އޮންނަ ގޮތަށް ފުރަތަމަ ދެދުވަސް ދާނީ ކޮލިފައިން ބުރުތައް" އިގްނާޒް ވިދާޅުވިއެވެ.
މުބާރާތުގައި ޑަބްލްސް އިވެންޓުތައް ފެށުމަށް ހަމަޖެހިފަވަނީ ތިންވަނަ ދުވަހުއެވެ. އަދި މުބާރާތުގައި ދިވެހި ކުޅުންތެރިންނަށް 3 ވައިލްޑްކާޑް ލިބިގެންދާނެއެވެ. އިގްނާޒް ވިދާޅުވީ މުބާރާތުގައި ބައިވެރިވާ ގައުމީ ޓީމުގެ ކުޅުންތެރިން އިރާނުގެ ކޯޗަކާ ތަމްރީނު ކުރަމުން އަންނަތާ ތިންމަސް ވެފަވާކަމަށާއި ގައުމީ ޓީމުގެ ތައްޔާރުވުންތަކާ މެދު ހިތްހަމަޖެހޭ ކަމަށެވެ.
ރާއްޖޭގެ ގައުމީ ޗެމްޕިއަން ގައުމީ ސީނިއާ ކުޅުންތެރިޔާ އަބްދުﷲ ފާއިހު ފަޒީލް ބުނީ ރާއްޖެއިން ބޭރުގައި ޖޫނިޔަރ ކުޅުންތެރިން ވަރަށް ގިނަ މުބާރާތްތަކުގައި ވާދަކުރަމުން އަންނަ ކަމަށާއި އެންމެ މުހިންމު ކަމަކީ ކުޅުންތެރިންނަށް އެ ލިބޭ ފުރުސަތުތަކުން ލިބިގެންދާ ތަޖުރިބާ ކަމަށެވެ.
"މިކޮޅުގައި ވާގޮތަކީ އެންމެން އެންމެނަށް ދަންނާނެ، އެންމެ އެއްކޮށް މި ކުޅެނީ، މިކަހަލަ މުބާރާތްތަކަށް ދާއިރު ބޮޑަށް މަދުވަނީ ގިނަ މެޗުތަކެއް ނުކުޅެ ހުންނާތީ، މިއީ ވަރަށް ގިނަ ކުޅުންތެރިންނަށް ލިބިގެންދާ ތަޖުރިބާއެއް." ފާއިހު ބުޏްނެވެ.
މުބާރާތް ރާއްޖޭގައި ފަށާއިރު، މުބާރާތުގެ ކުޅުން ކުރިއަށްދާނީ މިމަހުގެ 21 ގެ ނިޔަލަށެވެ.