އއ. އުކުޅަހުގައި ސަރުކާރުން ތަރައްޤީކުރި ފުޓުބޯޅަ ދަނޑު ރަސްމީކޮށް ހުޅުވައިފިއެވެ.
މި ދަނޑު ހުޅުވުމުގެ ގޮތުން އެ ރަށުގައި ވަނީ ހާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތު ޝަރަފްވެރިކޮށްދެއްވީ ރައީސުލްޖުމްހޫރިއްޔާގެ ނައިބު އަލްއުސްތާޛު ހުސެއިން މުޙައްމަދު ލަތީފެވެ. މީގެ އިތުރުން ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އާއި އުކުޅަހު ކައުންސިލުގެ ބައެއް އިސްވެރިން ބައިވެރިވެވަޑައިގެންނެވި އެވެ.
ކުލަގަދަ ހަރަކާތްތަކެއް ފެނިގެންދިޔަ މި ރަސްމިއްޔާތުގެ ތެރެއިން އެކި އައިޓަމްތަކެއް ވަނީ ގެނެސްދީފައެވެ. އެގޮތުން އުކުޅަހުގެ ދަރިވަރުންތަކެއްގެ ހުށައެޅުންތަކެއް ވަނީ ހުށައަޅާފައެވެ.
މީގެ އިތުރުން ދަނޑު ހުޅުވުުމުގެ ގޮތުން ހާއްސަ ފުޓުބޯޅަ މެޗެއްވެސް ވަނީ ކުޅެފައެވެ. މި މެޗުގައި ބައްދަލުކުރީ ރާއްޖޭގެ ފުޓުބޯޅައިގެ ލެޖެންޑުން ހިމެނޭ ޓީމަކާއި އުކުޅަހުގެ ޓީމެކެވެ. މި މެޗު 2-0 ގެ ނަތީޖާއަކުން މެޗު ކާމިޔާބުކުރީ ލެޖެންޑުންގެ ޓީމެވެ.
މި ސަރުކާރުގެ ކުޅިވަރު ސިޔާސަތުތަކުގެ ދަށުން ރާއްޖޭގެ އެކި ކަންކޮޅުތަކުގައި މިހާރުވެސް ދަނީ ގިނަ ދަނޑުތަކެއްގެ މަސައްކަތް ކުރަމުންނެވެ. މި ދަނޑުތައް ވީ އެންމެ އަވަހަކަށް ނިންމުމަކީ ސަރުކާރުން ބޮޑު އިސްކަމެއް ދީގެން ކުރަމުން އަންނަ މަސައްކަތެކެވެ. ސަރުކާރުގެ އަމާޒަކީ އަންނަ އަހަރު ކުޅިވަރުގެ ގިނަ މަޝްރޫއުތަކެއް ނިންމުމެވެ. އަދި އެ ތަންތަނުގެ ބޭނުން އާންމު ދިވެހި ރައްޔިތުންނަށް ކުރެވުމެވެ.