މެލޭޝިޔާއަށް ކުރި ވިއްސާރައިގައި އެ ޤައުމުގެ އުތުރުގެ ސްޓޭޓްތަކުގެ ގިނަ ސަރަޙައްދުތަކެއްގައި ފެންބޮޑުވުމާ ގުޅިގެން، ފެނުގެ ޒަރީއާއިން ފެތުރޭ ނުރައްކާތެރި ބަލިތައް ޢާންމުވެދާނެ ކަމުގެ ބިރު އުފެދިއްޖެއެވެ. ފެންބޮޑުވުމާ ގުޅިގެން އެ ޤައުމުން އެތަކެއް ހާސް ބަޔަކު ރައްކާތެރި ހިސާބުތަކަށް ބަދަލު ކޮށްފައިވާއިރު، ފެނުގެ ޒަރީއާއިން ފެތުރޭ ބަލިތައް ޢާންމުވެދާނެ ކަމަށް ބަލައި، ޞިއްޙީ އިދާރާތަކުން ވަނީ ރައްކާތެރި ކަމުގެ ފިޔަވަޅުތައް އަޅަން ފަށާފައެވެ.
ފެންބޮޑުވުމުގެ އަސަރު އެންމެ ބޮޑަށް ކޮށްފައި ވަނީ އެ ޤައުމުގެ އިރުއުތުރު އައްސޭރިފަށުގައި އޮތް ކެލަންތަން ސްޓޭޓަށެވެ. އެ ސްޓޭޓްގެ ގިނަ ސަރަޙައްދުތަކުގައި ބޮޑުވެފައިވާ ފެންގަނޑުތައް ހިނދެން ފަށާފައިވީ ނަމަވެސް، އަދިވެސް ގިނަ އަދަދެއްގެ ބަޔަކު ތިބީ ވަގުތީ ހިޔާތަކުގައެވެ. މެލޭޝިޔާގެ ސަރުކާރުން އެންމެ ފަހުން ހާމަކޮށްފައިވާ މަޢުލޫމާތަށް ބަލާއިރު، 40,000އަށްވުރެ ގިނަ ރައްޔިތުން އަދިވެސް ދިރިއުޅެމުން ދަނީ ވަގުތީ ހިޔާތަކުގައެވެ.
މެލޭޝިޔާގެ މޫސުމާ ބެހޭ އިދާރާއިން ބުނީ، ކުރިއަށް އޮތް ދުވަސްތަކުގައި ވެސް އެ ޤައުމުގެ އުތުރުގެ ސަރަޙައްދުތަކަށް ވިއްސާރަ ކުރާނެ ކަމަށް ބެލެވޭ ކަމުގައެވެ. އަދި، އިތުރު ސަރަޙައްދުތަކެއްގައި ފެންބޮޑުވާނެ ކަމަށް ލަފާކުރެވޭ ކަމުގައި ވެސް އެ އިދާރާއިން އިންޒާރު ކުރިއެވެ. ވަގުތީ ހިޔާތަކުގައި ތިބި މީހުން، އަމިއްލަ ގެދޮރަށް އެނބުރި ދިޔުމުގެ ފުރުޞަތު ދީފައި ނެތީ އެ ސަބަބާ ގުޅިގެންނެވެ.
ކެލަންތަންގައި ފެނުގެ ޒަރީއާއިން ފެތުރޭ ނުރައްކާތެރި ބަލިތައް މިހާރު ވެސް ފެތުރެމުންދާ ކަމުގައި އެ ސްޓޭޓްގެ އިދާރާތަކުން ހާމަކުރިއެވެ. އެ ސްޓޭޓްގެ ޞިއްޙީ ޚިދުމަތްތެރިންނާ ޙަވާލާދީ އެ ޤައުމުގެ ދައުލަތުގެ މީޑިޔާއިން ބުނީ، ބަނޑުގައި ރިހުމާއި، ނޭވާލާ ނިޒާމުގެ ބަލިތަކުގެ އިތުރުން ހަމުގެ ބަލިތައް ޖެހިގެން 5,000އަށްވުރެ ގިނަ މީހުންނަށް މިހާރު ވެސް ފަރުވާ ދެމުންދާ ކަމުގައެވެ.
ފެންބޮޑުވެފައިވާ ސަރަޙައްދުތަކުގައި ދިރިއުޅޭ ރައްޔިތުންނަށް ޞިއްޙީ ޚިދުމަތްތައް ފޯރުކޮށްދިނުމުގެ މަސައްކަތް ކުރަމުންދާ މެލޭޝިޔަން މެޑިކަލް ރިޕީފް ސޮސައިޓީ (މަރސީ)ން ބުނީ، ފެނުގެ ޒަރީއާއިން ފެތުރޭ ބަލިތައް ޖެހިފައިވާ މީހުންނަށް ފަރުވާ ދިނުމަށް މި ވަގުތު ގޮންޖެހުންތަކެއް ކުރިމަތިވެފައި ނެތް ނަމަވެސް، ބަލި ޖެހޭ މީހުންގެ އަދަދު އިތުރުވެއްޖެ ނަމަ، ބޮޑެތި ދަތިތަކާ ކުރިމަތިލާން ޖެހޭނެ ކަމުގައެވެ.
"ގައިންތާހިރުވުމަށް ބޭނުންވާ ސާމާނު އަޅުގަނޑުމެން ވާނީ ސްޓޮކު ކޮށްފައި. ވަގުތީ ހިޔާތަކަށް އިތުރު މީހުން ބަދަލު ކުރަން ޖެހިއްޖެ ނަމަ، އެ ތަކެތި ބަހަން ފަށާނަން،" މަރސީގެ އިސް އޮފިޝަލެއް ކަމުގައިވާ ޝާޙް ފައިޞަލް ޙުސައިން ވިދާޅުވިއެވެ. މީގެ އިތުރުން، ވަގުތީ ހިޔާތަކުގައި މި ވަގުތު ތިބި ކުޑަކުދިންނަށް ޞިއްޙީ ފަރުވާގެ ޚިދުމަތްތައް ފޯރުކޮށްދިނުމަށް އިސްކަންދީފައިވާނެ ކަމުގައި ވެސް އޭނާ ވިދާޅުވިއެވެ.
މެލޭޝިޔާގެ މޫސުމާ ބެހޭ އިދާރާއިން ބުނީ، ޑިސެންބަރު 8އާއި 14އާ ދެމެދު، އެ ޤައުމުގެ އުތުރުގެ ސަރަޙައްދުތަކަށް ބޯކޮށް ވާރޭވެހޭނެ ކަމަށް ލަފާކުރެވޭ ކަމުގައެވެ. މީގެ އިތުރުން، މެލޭޝިޔާގައި ވަކިން އޮތް ބޯނިޔޯ އައިލެންޑްސްގައި ހިމެނޭ ސަބާއާއި ސަރަވަކްގެ ސަރަޙައްދުތަކަށް ވެސް މޫސުން ގޯސްވާނެ ކަމަށް ލަފާ ކުރެވޭ ކަމުގައެވެ.