ކުރީގެ ޑިފެންސް މިނިސްޓަރ ކާނަލް ރިޓަޔަރޑް މުޙައްމަދު ނާޒިމް ދިރިއުޅުއްވި ގ.އެނިފްގޭގެ އެޕާރޓްމަންޓުން ފެނުނު ފިސްތޯލައިން ހޯދާފައިފާ ޑީއެންއޭއާއި، ކުރީގެ ނާއިބުރައީސް އަޙްމަދު އަދީބުގެ ޑީއެންއާއި ދިމާވާކަމަށް ފުލުހުން ހާމަކުރައްވައިފިއެވެ.
މިރޭ އިސްކަންދަރު ކޮށީގައި މީޑިއާއަށް މަޢުލޫމާތުދެއްވަމުން އެއިސްޓަންޓް ކޮމިޝަނަރ އޮފް ޕޮލިސް ޢަބްދުﷲ ނަވާޒް ވިދާޅުވީ، މި މައްސަލައިގެ ތަހުޤީޤަށް ހޯދިފައިވާ ޑީއެންއޭ ޕްރޮފައިލްތަކުގެ ތެރެއިން އަދިވެސް ސާފު ނުވާ ޕްރޮފައިލްތައް އެބަހުރި ކަމަށާއި، އެ ޑީއެންއޭ ޕްރޮފައިލްތައް ތަޙްލީލް ކުރުމުގެ މަސައްކަތް ކުރެވެމުންދާކަމަށެވެ.
img:http://s3.psmnews.mv/images/660x400/14665381575003.jpg|ކުރީގެ ޑިފެންސް މިނިސްޓަރު ނާޒިމްގެ އެޕާޓްމެންޓުން ފެނުނު ފިސްތޯލަ އާއި ވަޒަންތައް-
ނާޒިމްގެ އެޕާޓްމެންޓުން ހަތިޔާރު ފެނުނު މައްސަލަ، ޕްރޮސެކިއުޓަރ ޖެނެރަލްގެ އޮފީހަށް ފޮނުއްވި އިރުވެސް އެމައްސަލައިގެ ޑީއެންއޭ ރިޕޯޓުގައިވެސް ބަލަން ޖެހޭ އިތުރު ކަންތައްތަކެއް ހުރިކަން އެއިރު ފާހަގަ ކޮށްފައިވާނެކަމަށް ވިދާޅުވެ ނަވާޒް ވަނީ، ޑީއެންއޭ ފެނުނު މައްސަލައިގެ މަޢުލޫމާތު މާދަމާ ހެނދުނުގެ ވަގުތެއްގައި ޕްރޮސެކިއުޓަރ ޖެނެރަލްގެ އޮފީހާ ހިއްސާކުރައްވާނެކަމަށެވެ. އަދި ފިސްތޯލައިން އަޙްމަދު އަދީބުގެ ޑީއެންއޭ ފެނުނު ނަމަވެސް، ނާޒިމްގެ ކޮޓަރީގައި އެތަކެތި ބެހެއްޓީ އަދީބު ކަމެއް ނުވަތަ އެކަމުގެ އަޑީގައި ހުންނެވީ އަދީބް ކަމެއް ބުނަން އަދި އަވަސްކަމަށެވެ. އެހެންކަމުން ނާޒިމް ވަނީ ފްރޭމް ކޮށްފައިތޯ ނޫވަތަ ނޫންތޯ ވެސް ކަނޑައަޅުއްވާނީ ލިބިފައިވާ ހެކިތަކަށް ރިއާޔަތްކުރައްވާ ޝަރީއަތުން ކަމަށާއި، އެއީ ފުލުހުން ނިންމަވާނެ ކަމެއް ނޫންކަމަށް ނަވާޒް ވިދާޅުވިއެވެ.
ނާޒިމްގެ އެޕާރަޓްމަންޓުން ފިސްތޯލަ ފެނުނު މައްސަލާގައިި ކުރީގެ ކޮމިޝަނަރ އޮފް ޕޮލިސް ޙުސައިން ވަޙީދާއި އެނޫންވެސް އިތުރު ބައެއް ހިމެނޭކަމަށް ތުހުމަތުކޮށް ނާޒިމްގެ ޤާނޫނީ ވަކީލުން ވިދާޅުވާ ވާހަކަތައްވެސް ތަޙްޤީގްކުރަން ފަށްޓަވާފައިވާކަމަށް އެސިސްޓެންޓް ކޮމިޝަނަރ އޮފް ޕޮލިސް ޢަބްދުﷲ ނަވާޒް ވިދާޅުވިއެވެ.