މިހާތަނަށް 19 އަތޮޅަކުން 804 އިމާމުން ތަމްރީނުކޮށްފި
-
އައްޑޫ ސިޓީން 68 އިމާމުންވަނީ ތަމްރީން ފުރިހަމަކޮށްފައި
-
ސަރުކާރުގެ އަމާޒަކީ މިއަހަރުގެ ނިޔަލަށް 700 އިމާމުން ތަމްރީންކުރުން
އިމާމުން ތާޒާކުރުމަށް އިސްލާމީ ކަންތައްތަކާ ބެހޭ ވުޒާރާއިން ކުރިއަށް ގެންދާ މަޝްރޫޢުގެ ދަށުން، މިހާތަނަށް 19 އަތޮޅަކުން 804 އިމާމުން ތަމްރީނުކޮށްފިއެވެ.
އިމާމުން ތަމްރީންކުރުން ނުވަތަ ތާޒާކުރުމުގެ ގައުމީ މަޝްރޫއަކީ އިމާމުކަމުގެ ދާއިރާއިން އިތުރު ތަމްރީނު ދިނުމަށްޓަކައި 11 ސަރަހައްދަކަށް ބަހާލައިގެން ދާއިމީ އިމާމުންނަށް އަމާޒުކޮށްގެން ކުރިއަށްގެންދާ ޕްރޮގުރާމެކެވެ.
މިމަޝްރޫއުގެ ދަށުން އައްޑޫ ސިޓީގައި ކުރިއަށް ގެންދިޔަ އިމާމުން ތަމްރީން ކުރުމުގެ ޕްރޮގުރާމުގައި 68 އިމާމުން ވަނީ ބައިވެރިވެ ތަމްރީނު ފުރިހަމަކޮށްފައެވެ. މިއާއެކު މިހާތަނަށް 19 އަތޮޅަކުން 804 އިމާމުންވަނީ ތަމްރީނު ފުރިހަމަކޮށްފައެވެ.
މި ޕްރޮގްރާމުގައި ޖުމްލަ 9 މާއްދާއެއް ދަނީ ކިޔަވާދެމުންކަމަށް އިސްލާމީ ކަންތައްތަކާބެހޭ ވުޒާރާއިން ވިދާޅުވެއެވެ. އެގޮތުން ޤުރްއާނާއި، ތަޖުވީދުގެ ޢިލްމާއި، ތަފްސީރާއި، ފިޤުހާއި، ޙަދީޘްގެ އިތުރުން އަޤީދާގެ ޢިލްމުގެ ދާއިރާއިން އިމާމުންނަށް ބޭނުންވާ މުހިންމު ކަންކަން އުނގަންނައިދޭނެކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއެވެ.
މީގެއިތުރުން މިސްކިތްތައް ބެލެހެއްޓުމުގެ ގޮތުން އަދާކުރަންޖެހޭ މަސްއޫލިއްޔަތު އަދާކުރެވޭނެ ވަރަށް މި ޕްރޮގުރާމުގެ ތެރެއިން އިމާމުންގެ ޝަޚްޞިއްޔަތު ބިނާކުރެވޭނެކަމަށްވެސް އެވުޒާރާއިން ވިދާޅުވެއެވެ.
އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ ސަރުކާރުގެ އަމާޒަކީ އިމާމުން ތާޒާކުރުމުގެ ގައުމީ މަޝްރޫއުގެ ތެރެއިން މި އަހަރުގެ ނިޔަލަށް 700 އިމާމުން ތަމްރީންކުރުންކަމަށެވެ.