2015 ވަނަ އަހަރުން ފެށިގެން ބަށިބޯޅަ ފައުންޑޭޝަންގެ ފަރާތުން ބާއްވަމުން އަންނަ ބަށިބޯޅަ މުބާރާތް އަންނަ ބުރާސްފަތި ދުވަހުގެރޭ ފެށުމަށް ހަމަޖެހިއްޖެއެވެ.
"ޕީއެސްއެމް ސްޕޯޓްސް" އަށް ދެއްވި އިންޓަވިއުއެއްގައި ބަށިބޯޅަ ފައުންޑޭޝަންގެ ރައީސާ، ޝީޔާމާ އަޙްމަދު ވިދާޅުވީ 2015 ވަނަ އަހަރުގެ މުބާރާތުގައި 15 އަތޮޅު ބައިވެރިވި ނަމަވެސް، މި އަހަރުގެ މުބާރާތުގައި ބައިވެރިވެފައިވަނީ މާލެ ސަރަހައްދުގެ ޓީމުތަކުން އެކަނި ކަމަށެވެ. ޝީޔާމާ ވިދާޅުވީ މި މުބާރާތުގައި މާލެ ސިޓީން މި ބައިވެރިވީ އަލަށް ކަމަށާއި، މީގެ ކުރިން ބައިވެރި ނުވެވެނީ އަންހެނުން ކުޅޭނެ ތަނެއް ނެތުމުން، ފަރިތަކުރެވެން ނޯންނާތީ ކަމަށެވެ. އެހެންނަމަވެސް މި ފަހަރު ބައިވެރިވި ޓީމުތަލުން ހުޅުމާލޭ ފޭސް ދޭއްގެ ހުސް ސަރަހައްދެއްގައި ކޮންމެވެސް ވަރަކަށް ފަރިތަކުރަމުންދާ ކަމަށް ޝިޔާމާ ވިދާޅުވިއެވެ.
މި މުބާރާތުގައި މި ފަހަރު ބައިވެރިވެފައިވަނީ ޖުމްލަ ހަތް ޓީމެވެ. އެއީ މާލޭގެ ތިން ޓީމަކާއި ހުޅުމާލޭގެ ހަތަރު ޓީމެކެވެ. އެހެން އަހަރުތަކާއި ޚިލާފަށް މިއަހަރު މުބާރާތް ބާއްވަން ހަމަޖެހިފަިއވަނީ ހުޅުމާލެ ފޭސް އެކެއްގައި ކަމަށާއި، މުބާރާތުގެ އިންތިޒާމުތައް ހަމަޖެއްސުމުގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ އެހީތެރިކަން ލިބޭ ކަމަށް ޝީޔާމާ ވިދާޅުވިއެވެ. އަދި މި އަހަރުގެ މުބާރާތް ހުޅުމާލޭގައި ބާއްވަން ނިންމީ ބައިވެރިވެފައިވާ ޓީމުތަކަށް ބަލާއިރު ގިނަ ޓީމުތަކަކީ ހުޅުމާލޭގެ ޓީމުތަކަށްވާތީ ޓީމުތަކުގެ އެދުމުގެ މަތިން ކަމަށްވެސް ޝީޔާމާ ވިދާޅުވިއެވެ.
2016 ވަނަ އަހަރުން ފެށިގެން އެޗްޑީސީގެ އެހީތެރިކަމާއެކު މުބާރާތް ބޭއްވި ނަމަވެސްމ ކުރިން ބަށިބޯޅަ މުބާރާތް ބާއްވަމުން އައީ މާލޭގައެވެ. އޭރު ބަށި ކޯޓު ތައްޔާރުކޮށް ޒީނަތްތެރިކުމުގެ މަސައްކަތް ކޮށްދެއްވަނީ މާލެ ސިޓީ ކައުންސިލުން ކަމަށް ޝިޔާމާ ވިދާޅުވިއެވެ.
ބަށިބޯޅަ މުބާރާތުގައި ބައިވެރިވެފައިވާ ޓީމުތަކުގެ މެދުގައި ގުރުއަތުލުން ބާއްވާފައިވާއިރު، މެޗުތައް ތަރުތީބު ކުރެވިފައިވާ ގޮތް އާންމު ކުރުމަށް ހަމަޖެހިފައިވަނީ މާދަމާއެވެ.