ދެކުނު ކޮރެޔާގެ ރައީސް ޔޫން ސުކް ޔޯލާ ދެކޮޅަށް އިތުބާރު ނެތް ކަމުގެ މައްސަލައެއް ހުށަހަޅަން، އެ ޤައުމުގެ ޤާނޫނު ހަދާ މަޖިލީހުގެ މެންބަރުން ގޮވައިލައިފިއެވެ. ޔޫނާ ދެކޮޅަށް އިތުބާރު ނެތް ކަމުގެ މައްސަލައެއް ހުށަހަޅަން ގޮވައިލާފައި މި ވަނީ، ޤައުމުގައި ކުއްލިހާލަތު އިޢުލާނު ކުރެއްވުމާ ގުޅިގެންނެވެ. ޔޫންގެ އެ ނިންމެވުމާ ގުޅިގެން އޭޝިޔާ ބައްރުގެ ހަތަރުވަނައަށް އެންމެ ބޮޑު އިޤުތިޞާދު އޮތް ދެކުނު ކޮރެޔާ ވަނީ ސިޔާސީ ކާރިސާއެއްގެ ތެރެއަށް ވެއްޓިފައެވެ. ޤާނޫނު ހަދާ މަޖިލީހާއި ޢާންމުންގެ ފިއްތުންތަކާ ގުޅިގެން ޔޫން ވަނީ ކުއްލިހާލަތުގެ އަމުރު ބާޠިލު ކުރައްވާފައެވެ.
ޔޫން ވިދާޅުވީ، ކުއްލިހާލަތު އިޢުލާނު ކުރައްވާފައި ވަނީ، އިދިކޮޅު ޕާޓީތަކުން ދައުލަތާ ދެކޮޅަށް މަސައްކަތް ކުރަމުންދާތީ އެ ކަން ހުއްޓުވުމަށް ކަމުގައެވެ. ކުއްލިހާލަތު އިޢުލާނު ކުރެއްވުމަށް ފަހު ޔޫން ވަނީ ސަލާމަތީ ބާރުތައް ފޮނުއްވައި، ޤާނޫނު ހަދާ މަޖިލީހުގެ އިމާރާތް ބަންދު ކުރައްވާފައެވެ. އަދި، ޤާނޫނު ހަދާ މަޖިލީހުގެ މެންބަރުންނަށް އެ އިމާރާތަށް ވަދެނިކުމެ ހެދުމަށް ހުރަސް އަޅުއްވާފައެވެ. މިއީ، އުތުރު ކޮރެޔާގެ ކޮމިޔުނިސްޓު ސަރުކާރުގެ ނުރައްކާތަކުން ސަލާމަތްވުމުގެ ގޮތުން އަޅުއްވާފައިވާ ފިޔަވަޅެއް ކަމުގައި ވެސް ޔޫން ވިދާޅުވިއެވެ.
"ޤައުމީ ތަރައްޤީއަށާއި، މަސްްތުވާތަކެއްޗާ ދެކޮޅަށް ކުރަމުންދާ ހަނގުރާމައަށާއި، ޢާންމުންގެ ސަލާމަތާއި ރައްކާތެރިކަން ކަށަވަރު ކޮށްދިނުމަށާއި، ދައުލަތް ހިންގުމަށް ބޭނުންވާ ބަޖެޓަށް ޤާނޫނު ހަދާ މަޖިލީހުން ވަނީ ހުރަސް އަޅާފައި. އެ ނިންމުމާ އެކު އަޅުގަނޑުމެންގެ ރައްޔިތުން ވަނީ ކާރިސާއެއްގެ ހާލަތަށް ވެއްޓިފައި، އަދި މަސްތުވާތަކެތި ޢާންމުވެ، ޢާންމުންގެ ސަލާމަތް ވަނީ ގެއްލިފައި،" ޔޫން ވިދާޅުވިއެވެ. ދެކުނު ކޮރެޔާގެ ޤާނޫނު ހަދާ މަޖިލީހުގެ އަޣުލަބިއްޔަތު އޮތީ އިދިކޮޅު ޕާޓީތަކުގެ ބާރުގެ ދަށުގައެވެ.
ކުއްލިހާލަތު އިޢުލާނު ކުރައްވައި ޔޫންގެ ސަރުކާރުން ވަނީ، ޢާންމުންގެ ގިނަ ޙައްޤުތަކެއް ހަނިކޮށްފައެވެ. އޭގެ ތެރޭގައި ހުރިހާ ސިޔާސީ ހަރަކާތްތަކެއް މަނާކުރުން ހިމެނެއެވެ. ކުއްލިހާލަތާ އެކު ޤާނޫނު ހަދާ މަޖިލީހުގެ އިތުރުން ލޯކަލް ކައުންސިލްތަކާއި ސިޔާސީ ޕާޓީތަކާއި ސިޔާސީ ޖަމުޢިއްޔާތަކުގެ މަސައްކަތްތައް ވެސް ވަނީ މަނާކޮށްފައެވެ.
މީގެ އިތުރުން، މަސައްކަތްތެރިންގެ ހަޅުތާލުތައް ވެސް މަނާކޮށްފައިވާއިރު، ގިނަ އަދަދެއްގެ ބަޔަކު މަގުތަކަށް ނިކުމެ އެއްވެ އުޅުން ވެސް ވަނީ މަނާކޮށްފައެވެ. އަދި، ހުރިހާ މީޑިޔާއެއްގެ ބާރުތައް ވަނީ ސަރުކާރަށް ނަގާފައެވެ. "ކުއްލިހާލަތުގެ އަމުރާ ޚިލާފުވާ މީހުން ކޯޓު އަމުރަކާ ނުލައި ހައްޔަރުކޮށް، ހައްޔަރުގައި ބަހައްޓައި، ބަލައިފާސްކޮށް، އެ މީހުންގެ މުދާ ހިފެހެއްޓޭނެ،" ކުއްލިހާލަތާ ބެހޭ މައި އިދާރާގެ ކޮމާންޑަރު އިންޒާރު ކުރިއެވެ.
ކުއްލިހާލަތުގެ އަމުރު ބާޠިލު ކުރަން ޔޫން ނިންމާފައި ވަނީ، އެ އަމުރު ބާޠިލު ކުރުމަށް ޤާނޫނު ހަދާ މަޖިލީހުން ޤަރާރެއް ފާސްކުރި ފަހުންނެވެ. "[ޖަލްސާގައި] ބައިވެރިވެ ވަޑައިގެންނެވި 190 މެންބަރުންގެ ތެރެއިން 190 މެންބަރުންގެ ތާޢީދާ އެކު، ކުއްލިހާލަތުގެ އަމުރު އުވައިލުމަށް ގޮވައިލައި ހުށަހަޅާފައިވާ ޤަރާރު ފާސްވެފައިވާ ކަން އިޢުލާނު ކުރަން،" ޤާނޫނު ހަދާ މަޖިލީހުގެ ރައީސް ވޫ ވޮން-ޝިކް ވިދާޅުވިއެވެ. ދެކުނު ކޮރެޔާގެ ޤާނޫނު ހަދާ މަޖިލީހުގައި 300 މެންބަރުން ތިއްބަވައެވެ.
ދެކުނު ކޮރެޔާގައި ވެރިކަން ކުރާ ޕީޕަލްސް ޕަވަރ ޕާޓީގެ ވެރިޔާ ހަން ޑޮންގ-ހުން ވެސް ވަނީ ޔޫންގެ ނިންމެވުމަށް ފާޑުވިދާޅުވެފައެވެ. އޭނާ ވިދާޅުވީ، ކުއްލިހާލަތު އިޢުލާނު ކުރެއްވުމަކީ މައްސަލަތަކުގެ ޙައްލު ނޫން ކަމުގައެވެ. އަދި، އެ ނިންމުމާ ދެކޮޅަށް ރައްޔިތުންނާ އެކު އަޑުއުފުއްލަވާނެ ކަމުގައި ވެސް އޭނާ ވިދާޅުވިއެވެ. އިދިކޮޅު ޑިމޮކްރެޓިކް ޕާޓީގެ ވެރިޔާ ލީ ޖައި-މްޔަންގ ވިދާޅުވީ، ޔޫންގެ ނިންމެވުމާ އެކު އެ ޤައުމުގެ އިޤުތިޞާދަށް ފޫނުބެއްދޭވަރުގެ ބޮޑެތި ގެއްލުންތަކެއް ލިބޭނެ ކަމުގައެވެ.
ޤާނޫނު ހަދާ މަޖިލީހުން ބާރު އެޅުމާ ގުޅިގެން ކުއްލިހާލަތުގެ އަމުރު ބާޠިލު ކުރައްވަން ޔޫން ނިންމެވި ނަމަވެސް އޭނާއާ ދެކޮޅަށް އިތުބާރު ނެތް ކަމުގެ މައްސަލައެއް ހުށަހަޅަން ތައްޔާރުވަމުންދާ ކަން އިދިކޮޅު އިއްތިޙާދުން ހާމަކުރިއެވެ. ޔޫންގެ ވެރިކަން ކުރާ ޕާޓީގެ ވެރިޔާ ހަން ވެސް ވަނީ، ޔޫންގެ ދިފާޢީ ވަަޒީރު ކިމް ޔުންގ-ހްޔަންގެ އިތުރުން މުޅި ކެބިނެޓުގެ އިސްތިޢުފާއަށް ގޮވައިލައްވާފައެވެ.
ޔޫން ކުއްލިހާލަތު އިޢުލާނު ކުރެއްވުމާ އެކު، އޭނާގެ އަމުރަށް ސަލާމަތީ ބާރުތަކުން ވަނީ ޤާނޫނު ހަދާ މަޖިލީހުގެ އިމާރާތުގެ ތެރެއަށް ގަދަބާރުން ވަދެގަނެފައެވެ. ސަލާމަތީ ބާރުގެ ސިފައިންނަށް ހުރަސް އެޅުމަށް ޤާނޫނު ހަދާ މަޖިލީހުގައި މަސައްކަތް ކުރާ މުވައްޒަފުން މަސައްކަތް ކުރުމުން ހަމަނުޖެހުންތަކެއް ހިނގިއެވެ. އަދި، ޤާނޫނު ހަދާ މަޖިލީހުގެ އިމާރާތް ކައިރީގައި ސަލާމަތީ ބާރުގެ ސިފައިންނާއި ޢާންމުންނާ ދެމެދު ވެސް ހަމަނުޖެހުންތަކެއް ހިނގާފައިވެއެވެ. ޔޫންގެ ނިންމެވުމާ ދެކޮޅަށް އަޑުއުފުލައި، މުޒާހަރާ ކުރުމަށް އިދިކޮޅު އިއްތިޙާދަށް ތާޢީދު ކުރާ މީހުން ދަނީ ތައްޔާރުވަމުންނެވެ.