ސޫރިޔާގެ ރައީސް ބައްޝާރް އަލް-އަސަދުގެ ސަރުކާރުގެ ދިފާޢުގައި ހަނގުރާމަ ކުރަމުންދާ ފައުޖުތަކަށް އެހީތެރިކަން ފޯރުކޮށްދޭން ލުބްނާންގެ މުޖާހިދުންގެ ޖަމާޢަތް، ޙިޒްބުاللهން މެންބަރުން ފޮނުވަން ނިންމާފައި ނުވާ ކަން މަޞްދަރުތަކުން ހާމަކޮށްފިއެވެ. ސޫރިޔާގެ ދާޚިލީ ހަނގުރާމައިގައި ޙިޒްބުاللهގެ އިތުރުން އީރާނުން ވާގިވެރިވާ ހަތިޔާރު އެޅި ޖަމާޢަތްތަކުން ވަނީ އަސަދުގެ ސަރުކާރުގެ ދިފާޢުގައި ހަނގުރާމަ ކޮށްދީފައެވެ.
ސޫރިޔާގައި ހަރަކާތްތެރިވާ ހަތިޔާރު އެޅި ޖަމާޢަތެއް ކަމުގައިވާ ހަޔިއަތު ތަޙްރީރް އަލް-ޝާމް (އެޗްޓީއެސް)ގެ ހަނގުރާމަވެރިން ހުސްވި ހަފުތާގައި ވަނީ އެ ޤައުމުގެ ހުޅަނގުއުތުރު ޙަލަބު ޕުރޮވިންސަށް އަތްގަދަ ކޮށްފައެވެ. އެ ރަށަށް އެޗްޓީއެސުން ޙަމަލާ ދޭން ފަށާފައި ވަނީ ނޮވެންބަރު 27ވަނަ ދުވަހުއެވެ. އަދި، އެ ރަށުގައި ތިބި ސޫރިޔާގެ އަސްކަރިއްޔާގެ ސިފައިންނާއި އަސަދަށް ވާގިވެރިވާ ހަނގުރާމަވެރިން ފަހަތަށް ޖެއްސުމަށް ފަހު، އެޗްޓީއެސްގެ ހަނގުރާމަވެރިން ވަނީ އެ ޕުރޮވިންސުގެ ބޮޑު ސަރަޙައްދަކަށް އަތްގަދަ ކޮށްފައެވެ. އޭގެ ތެރޭގައި ވެރިރަށް ޙަލަބް ސިޓީއާއި މައި ވައިގެ ބަނދަރު ވެސް ހިމެނެއެވެ.
މިއީ، 2020ވަނަ އަހަރުގެ މާރިޗު މަހު، ސޫރިޔާގެ ދާޚިލީ ހަނގުރާމައިގެ ދަށުން ބަދަލު ކުރަމުން ދިޔަ ޙަމަލާތައް މެދުކަނޑައިލުމަށް ފަހު ދީފައިވާ އެންމެ ބޮޑު އަދި ނުރައްކާތެރި ޙަމަލާތަކެވެ. ޙަމަލާ ބަދަލު ކުރުން މެދުކަނޑައިލާފައި ވަނީ އަސަދުގެ ސަރުކާރަށް ވާގިވެރިވަމުންދާ ރަޝިޔާއާއި، ހަނގުރާމަވެރި ޖަމާޢަތްތަކަށް އެހީތެރިކަން ފޯރުކޮށްދެމުންދާ ތުރުކީވިލާތާ ދެމެދު ވެވުނު އެއްބަސްވުމެއްގެ ދަށުންނެވެ. ނަމަވެސް، އެޗްޓީއެސަކީ ތުރުކީވިލާތުން ވާގިވެރިވާ ޖަމާޢަތެއް ނޫނެވެ. ތުރުކީވިލާތުގެ އިތުރުން އެމެރިކާއިން ވެސް ވަނީ އެޗްޓީއެސަކީ ނިރުބަވެރި ގުރޫޕެއްގެ ގޮތުގައި ކަނޑައަޅާފައެވެ.
ޙިޒްބުاللهއާ ގުޅުން އޮތް މަޞްދަރުތަކުން ބުނީ، އެޗްޓީއެސްގެ ހަނގުރާމަވެރިންނާ ދެކޮޅަށް އަސަދުގެ އަސްކަރިއްޔާއިން ކުރަމުންދާ ހަނގުރާމައިގައި ބައިވެރިވުމަށް އެ ޖަމާޢަތުން މެންބަރުން ފޮނުވަން ނިންމާފައި ނެތް ކަމުގައެވެ. އީރާނުގެ ޚާރިޖީ ވަޒީރު ޢައްބާސް ޢަރާޤިޖީ ވިދާޅުވީ، އެޗްޓީއެސްގެ ހަނގުރާމަވެރިންނާ ކުރިމަތިލައި، އެ މީހުން ފަހަތަށް ޖެއްސުމުގެ ޤާބިލުކަން ސޫރިޔާގެ އަސްކަރިއްޔާއަށް ލިބިގެންވާ ކަމަށް ޤަބޫލު ކުރައްވާ ކަމުގައެވެ. ނަމަވެެސް، އީރާނުން ވާގިވެރިވާ ހަތިޔާރު އެޅި ޖަމާޢަތްތަކުން އެ ކަމުގައި އެހީތެރިކަން ފޯރުކޮށްދޭނެ ކަމުގައި ވެސް އޭނާ ވިދާޅުވިއެވެ.
އީރާނުގެ މަޞްދަރުތަކުން ބުނީ، ޙަލަބުގެ ހާލަތު އެ ޤައުމުން ވަރަށް ގާތުން ބަލަމުންދާ ކަމުގައެވެ. އަދި، އަސަދާއި ސޫރިޔާގެ އަސްކަރިއްޔާއަށް އެހީތެރިކަން ފޯރުކޮށްދެވޭނެ ގޮތްތައް ދެނެގަތުމަށް މަސައްކަތް ކުރަމުންދާ ކަމުގައެވެ. ނަމަވެސް، ސޫރިޔާއަށް ސިފައިން ފޮނުވައި، އަސްކަރީ އެހީތެރިކަން ފޯރުކޮށްދިނުމާ މެދު ތަހްރާނުން ގޮތެއް ނިންމާފައި ނުވާ ކަން ވެސް މަޞްދަރުތަކުން ހާމަކުރިއެވެ. "އެ ކަމާ ގުޅޭ ގޮތުން މަޝްވަރާ ކުރުމަށް ބޭއްވި ބައްދަލުވުމުގައި ސޫރިޔާއަށް އީރާނުގެ ސިފައިން ފޮނުވަން އެދިފައެއް ނެތް،" ނަން ހާމަކޮށްފައި ނުވާ އީރާނުގެ އޮފިޝަލަކު ބުންޏެވެ.
ޙިޒްބުاللهގެ މަޞްދަރުތަކުން ބުނީ، ސޫރިޔާއަށް މެންބަރުން ފޮނުވަން އެއްވެސް ފަރާތަަކުން އެ ޖަމާޢަތުގެ ކިބައިން ވެސް އެދިފައި ނުވާ ކަމުގައެވެ. މި ވަގުތު އެ ޖަމާޢަތް އޮތީ، ސޫރިޔާއަށް މެންބަރުން ފޮނުވައިގެން އިތުރު ހަނގުރާމައެއްގައި ބައިވެރިވެވޭނެ ފަދަ ހާލަތެއްގައި ނޫން ކަމުގައި ވެސް މަޞްދަރުތަކުން ބުންޏެވެ. އެ ފަރާތްތަކުން އިޝާރާތް ކޮށްފައި އެ ވަނީ، ފާއިތުވި 13 މަސް ދުވަހު ޙިޒްބުاللهގެ މުޖާހިދުން ޔަހޫދީންނާ ދެކޮޅަށް ކުރި ހަނގުރާމައަށެވެ.
ޙިޒްބުاللهން ޒަޔަނިސްޓު އިސްރާއީލުގެ ރަށްތަކާއި ޔަހޫދީ ފައުޖުގެ ނިރުބަވެރި ސިފައިންނަށް ޙަމަލާ ދޭން ފަށާފައި ވަނީ 2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހު ޔަހޫދީ ފައުޖުން ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރަން ލާއިންސާނީ ޖަރީމާތަކެއް ހިންގަން ފެށުމާ ގުޅިގެންނެވެ. ޙިޒްބުاللهގެ ޙަމަލާތަކުގެ އަމާޒަކީ، ފަލަސްޠީނުގެ ރައްޔިތުންނާއި، ފަލަސްޠީނުގެ މިނިވަން ކަމަށް ޖިހާދު ކުރަމުންދާ މުޖާހިދުންނަށް ވާގިވެރިވުމެވެ. އަދި، ޔަހޫދީންގެ ލާއިންސާނީ ޖަރީމާތައް ހުއްޓުވުމަށް ބާރު އެޅުމެވެ.
ނަމަވެސް، ޙިޒްބުاللهގެ ޙަމަލާތަކުގެ ބަދަލު ހިފުމުގެ ގޮތުން، އެ ޖަމާޢަތް ނައްތައިލުމުގެ ނަމުގައި ޔަހޫދީ ފައުޖުން ވަނީ ލުބްނާންގެ މުސްލިމުންގެ ނަސްލުހޭދު ކުރަން ވެސް ޤަތުލުޢާންމެއް ހިންގަން ފަށާފައެވެ. އަދި، ވެރިރަށް ބައިރޫތާއި ދެކުނުގެ ރަށްތަކުގެ އިތުރުން އަލް-ބިޤާޢު ވާދީގެ ސަރަޙައްދުތަކަށް ބޮންއަޅައި، ޢާންމުންގެ އެތަކެއް ހާސް ބަޔަކު ޝަހީދު ކޮށްލާފައެވެ. އެއަށްފަހު، އޮކްޓޫބަރު 1ވަނަ ދުވަހު ޔަހޫދީ ފައުޖުގެ އަނިޔާވެރި ސިފައިން ވަނީ ލުބްނާންގެ ދެކުނުގެ ރަށްތަކަށް އެއްގަމު މަގުން އަރައި، ޤަތުލުޢާންމު އިތުރަށް ފުޅާ ކޮށްފައެވެ. އެ ޢުދުވާންތައް މެދުކަނޑައިލާފައި ވަނީ ނޮވެންބަރު 27ވަނަ ދުވަހު ވެވުނު އެއްބަސްވުމެއްގެ ދަށުންނެވެ.
ފާއިތުވި އަހަރެއްހާ ދުވަހުގެ ތެރޭގައި ޔަހޫދީ ފައުޖުން ވެސް ވަނީ ސޫރިޔާގެ ވެރިރަށް ދިމިޝްޤާއި އެހެން ބޮޑެތި ރަށްތަކަށް ނިރުބަވެރި ޙަމަލާތަކެއް ދީފައެވެ. އެ ޙަމަލާތައް އަމާޒުކޮށްފައި ވަނީ، ޙިޒްބުاللهގެ އިތުރުން އީރާނުން ވާގިވެރިވާ ހަތިޔާރު އެޅި ޖަމާޢަތްތަކުގެ މެންބަރުންނަށެވެ. އެ ޙަމަލާތަކުގައި ސޫރިޔާގެ ޢާންމުންގެ ގިނަ އަދަދެއްގެ ބަޔަކު ވެސް ވަނީ ޝަހީދު ކޮށްލާފައެވެ.