އޭއެފްސީ ޗެމްޕިއަންސް ލީގުގައި ސައުދި އަރަބިއްޔާގެ އަލް ނަސްރު އާއި ދެކޮޅަށް ކުޅުނު މެޗު 2-1 ގެ ނަތީޖާއަކުން ގަތަރުގެ އަލް ސާދު ކާމިޔާބުކޮށް މުބާރާތުގެ ދެވަނަ ބުރުގެ ޖާގައެއް ކަށަވަރުކޮށްފި އެވެ.
މި މެޗު ކާމިޔާބު ކުރުމާއެކު އަލް ސާދު އަށް ވަނީ މި މުބާރާތުގެ ފުރަތަމަ ބުރުގައި މިހާތަނަށް ކުޅުނު 6 މެޗުން 12 ޕޮއިންޓާއެކު ތާވަލުގެ ހަތަރުވަނަ މަގާމް ލިބިފަ އެވެ. އެއްވަނައިގައި އޮތް އަލް އަހްލީ އަށް 6 މެޗުން 16 ޕޮއިންޓް ލިބިފައިވާއިރު ދެވަނައިގައި އޮތް އަލް ހިލާލަށް އަށް 5 މެޗުން ލިބިފައިވަނީ 13 ޕޮއިންޓެވެ. އަދި ތިންވަނައިގައި އޮތް އަލް ނަސްރުއަށް ވެސް ލިބިފައިވަނީ 13 ޕޮއިންޓެވެ.
ސައުދި އަރަބިއްޔާގެ ރިޔާދުގައި ކުޅުނު މި މެޗުގައި އަލް ނަސްރުގެ ކެޕްޓަން އަދި އެ ޓީމުގެ އެންމެ މުހިންމު ކުޅުންތެރިޔާ ކްރިސްޓިއާނޯ ރޮނާލްޑޯ ކުޅެފައެއް ނުވެއެވެ.
ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެން ގޮސްފައިވާ މި މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ކާމިޔާބު ކުރެވިފައިނުވި ނަމަވެސް ދެވަނަ ހާފުގެ ކުޅުން ފެށުނުތާ އަށްވަނަ މިނިޓުގައި އޭޝިޔާގެ މޮޅު ކުޅުންތެރިޔާގެ މަގާމު ދެ ފަހަރު މަތިން ހޯދާފައިވާ އަލް ސާދުގެ އަކްރަމް އަފީފް ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ.
ނަމަވެސް އޭގެ 10 މިނިޓު ފަހުން އަލް ސާދުއަށް ކުޅޭ މޮރޮކޯގެ ޑިފެންޑަރ ރޮމައިން ސައިސް އަތުން ބައިކޮޅަށް ލަނޑެއް ވަދެ މެޗުގެ ނަތީޖާ ވަނީ އެއްވަރުވެފަ އެވެ.
މި މެޗުން އަލް ސާދު މޮޅުވި ލަނޑު މެޗުގެ ފުރިހަމަ ވަގުތު ހަމަވެ އިތުރު ވަގުތުގެ ކުޅުމުގައި އެ ޓީމަށް ލިބުނު ޕެނަލްޓީ އަކުން ކާމިޔާބު ކޮށްދީފައިވަނީ އަލްޖީރިއާގެ އެޑަން އޯނަސް އެވެ.