އެމެރިކާގެ ރައީސް ޖޯ ބައިޑަން، އޭނާގެ ދަރިކަލުން، ހަންޓަރ ބައިޑަންގެ ޝަރީޢަތަށް ނުފޫޒު ނުފޯރުވަން ވެވަޑައިގެންނެވި ވަޢުދާ ޚިލާފުވެ، އޭނާއަށް މަޢާފު ދެއްވައިފިއެވެ. ބައިޑަން އޭނާގެ ދަރިކަލުންނަށް މަޢާފު ދެއްވާފައި ވަނީ އެމެރިކާގެ ރައީސް ކަމުގެ މަޤާމުން ލިބިދޭ ބާރުތައް ބޭނުން ކުރައްވައިގެންނެވެ. ހަންޓަރއަށް މަޢާފު ދެއްވާފައި ވަނީ ޓެކުހަށް މަކަރު ހެއްދެވުމުގެ ދަޢުވާގެ ޝަރިޢަތް ހިނގަމުން ދަނިކޮށެވެ. މީގެ ކުރިން އޭނާގެ މައްޗަށް ހަތިޔާރާ ގުޅޭ ދަޢުވާއެއް ވެސް އޮތީ ސާބިތުވެފައެވެ.
"މިއަދު، އަޅުގަނޑުގެ ދަރިފުޅަށް މަޢާފު ދިނުމުގެ ލިޔުމުގައި ސޮއިކުރިން. ވެރިކަމާ ޙަވާލުވި ދުވަހުން ފެށިގެން އަޅުގަނޑު ބުނަމުން ގޮސްފައި ވާނެ، ޝަރުޢީ އިދާރާގެ ކަންކަމަށް ނުފޫޒު ނުފޯރުވާނަމޭ، އަދި އެ ގޮތުގައި އަޅުގަނޑު ދެމިހުރީމު، ނަމަވެސް، އަޅުގަނޑުގެ ދަރިފުޅާ ދެކޮޅަށް ނާއިންސާފުން ޝަރިޢަތް ހިންގާ މަންޒަރު ބަލާކަށް ނުހުރެވޭނެ،" އެމެރިކާގެ ރިޔާސީ ގަނޑުވަރު، ވައިޓް ހައުސުން ނެރުނު ބަޔާނެއްގައި ބައިޑަން ވިދާޅުވިއެވެ.
މަސްތުވާތަކެތީގެ ވަބާއިން ސަލާމަތްވުމަށް ފަރުވާ ހޯއްދަވަމުން ގެންދަވާ ހަންޓަރއަށް ބައިޑަން މަޢާފު ނުދެއްވާނެ ކަމުގައި، އަދި އޭނާގެ މައްޗަށް އިއްވާ އެއްވެސް ހުކުމެއްގެ މުއްދަތު މަޢާފު ނުކޮށްދެއްވާނެ ކަމުގައި ވައިޓް ހައުސުން ވެސް މީގެ ކުރިން ދިޔައީ ބުނަމުންނެވެ. ނަމަވެސް، ނޮވެންބަރު 5ވަނަ ދުވަހު އެމެރިކާގައި ބޭއްވި ރިޔާސީ އިންތިޚާބުގެ ކެމްޕޭންގެ ތެރެއިން އިދިކޮޅު ރިޕަބްލިކަން ޕާޓީގެ މެންބަރުން ވަނީ ހަންޓަރގެ މައްސަލަ ހޫނުކޮށްލާފައެވެ. ހަންޓަރއަށް ފާޑު ވިދާޅުވެފައިވާ ބޭފުޅުންގެ ތެރޭގައި އިންތިޚާބުގައި ކާމިޔާބީ ހޯއްދެވި އެ ޕާޓީގެ ކެނޑިޑޭޓު، އިންތިޚާބީ-ރައީސް ޑޮނަލްޑް ޓްރަމްޕް ވެސް ހިމެނި ވަޑައިގަންނަވައެވެ.
"ޙަޤީޤަތަށް ބަލާ ކޮންމެ މީހަކު ވެސް ޤަބޫލު ކުރާނެ، ހަންޓަރއާ ދެކޮޅަށް ދަޢުވާ އުފުލާފައި ވަނީ، އެއީ އަޅުގަނޑުގެ ދަރިއަކަށްވީތީ ކަން،" ބައިޑަން ވިދާޅުވިއެވެ. ބައިޑަންގެ ނިންމެވުމާ އެކު، 2014 ޖަނަވަރީ 1ވަނަ ދުވަހުން ފެށިގެން 2024 ޑިސެންބަރު 1ވަނަ ދުވަހާ ދެމެދު ހަންޓަރ ކުރައްވާފައިވާ ހުރިހާ ކުށެއް ބާޠިލުވީއެވެ. އަދި، އެ ހުރިހާ ކުށަކަށް މަޢާފު ލިބުނީއެވެ.
ހަންޓަރއަށް ބައިޑަން މަޢާފު ދެއްވާފައި މި ވަނީ، ދޮގުހެކި ދިނުމާއި ހަތިޔާރު ގެންގުޅުމާ ގުޅޭ މައްސަލައެއްގައި ދަޢުވާ ސާބިތުވެ، ޙުކުމް އިއްވަން ތައްޔާރުވެފައިވާ ދަނޑިވަޅެއްގައެވެ. އަދި، ދައުލަތަށް ޓެކުހުގެ ގޮތުގައި ދައްކަވަން ޖެހޭ 1.4 މިލިޔަން އެމެރިކާ ޑޮލަރު އޮޅުވައިލައްވައިގެން އޭނާ ވަނީ ޓެކުހަށް މަކަރު ހައްދަވާފައެވެ. އޭނާ، އެ ފައިސާ އޭނާ ޚަރަދު ކުރައްވާފައި ވަނީ މަސްތުވާތަކެއްޗާއި، ކަސްބީންނަށާއި އަގު ބޮޑެތި މުދަލަށް ހޭދަ ކުރެއްވުމަށެވެ. އެ މައްސަލަތަކުގައި އޭނާގެ މައްޗަށް ޙުކުމް އިއްވާ މަޖިލިސް އޮތީ ޑިސެންބަރު 6ވަނަ ދުވަހަށް ތާވަލު ކޮށްފައެވެ.
ހަންޓަރއަށް މަޢާފު ދެއްވުމާ ގުޅިގެން ރިޕަބްލިކަން ޕާޓީން ވަނީ ބައިޑަންގެ އެ އަމަލު ވަރަށް ބޮޑަށް ކުށްވެރި ކޮށްފައެވެ. އެ ކަމަށް ފާޑުވިދާޅުވެ ވާހަކަފުޅު ދައްކަވާފައިވާ ބޭފުޅުންގެ ތެރޭގައި އިންތިޚާބީ-ރައީސް ޓްރަމްޕް ވެސް ހިމެނި ވަޑައިގަންނަވައެވެ. "މިއީ ނާއިންސާފުން ހިންގާފައިވާ އަނިޔާވެރި އަމަލެއް،" ޓްރަމްޕް ސިފަކުރެއްވިއެވެ.
އެމެރިކާގެ ޤާނޫނު ހަދާ މަޖިލީހުގެ ތިރިގެ، ހައުސް އޮފް ރެޕްރެޒެންޓެޓިވްސްގައި ސަރުކާރުގެ މަސްއޫލިއްޔަތު ބަލާ ކޮމިޓީގެ މުޤައްރިރު ޖޭމްސް ކޯމަރ ވެސް ވަނީ ބައިޑަނަށް ފާޑުވިދާޅުވެފައެވެ. "ފުރަތަމަ ދުވަހުން ފެށިގެން ޖޯ ބައިޑަން ގެންދެވީ ދޮގުހައްދަވައި އޮޅުވައިލައްވަމުން، އަދި އޭނާގެ ޢާއިލާގެ މަސްތުވާތަކެތީގެ ވިޔަފާރީގެ ކަންކަމާއި ކޮރަޕްޝަން ފޮރުވަމުން،" އޭނާ ވިދާޅުވިއެވެ.
ބައިޑަނަށް ހަތަރު ބޭފުޅުން ލިބިވަޑައިގަތެވެ. އޭގެ ތެރެއިން ތިން ބޭފުޅުން ކަމުގައިވާ ޖޯސެފް ބިޔު އާރް ބައިޑަން (ތިންވަނަ)، ރޮބަރޓް ހަންޓަރ ބައިޑަން އަދި ނެއޯމީ ކްރިސްޓީނާ ބައިޑަނަކީ އޭނާގެ ފުރަތަމަ އަނބިކަނބަލުން، ނީލިޔާ ހަންޓަރ ބައިޑަނަށް ލިބިވަޑައިގެންނެވި ބޭފުޅުންނެވެ.
ބައިޑަންގެ ދެވަނަ، އަދި މިހާރުގެ އަނބިކަނބަލުން، ޖިލް ބައިޑަނަށް ލިބިވަަޑައިގަންނަވާފައި ވަނީ އޭޝްލީ ބްލޭޒަރ ބައިޑަނެވެ. ބައިޑަންގެ ފުރަތަމަ އަނބިކަނބަލުން، ނީލިޔާއާއި އަންހެން ދަރިކަނބަލުން، ނެއޯމީ ވަނީ 1972ވަނަ އަހަރު ހިނގި ކާރު އެކްސިޑެންޓެއްގައި އަވަހާރަވެފައެވެ. އަދި، ދޮށީ ފިރިހެން ދަރިކަލުން، ބިޔު ބައިޑަން އަވަހާރަވީ 2015ވަނަ އަހަރު ސިކުނޑީގެ ކެންސަރު ބަލީގައެވެ.