ސޫރިޔާގެ ރައީސް ބައްޝާރް އަލް-އަސަދުގެ ސަރުކާރާއި އަސްކަރިއްޔާއަށް އެހީތެރިކަން ފޯރުކޮށްދިނުމަށް ޢިރާޤުގައި ހަރަކާތްތެރިވާ ހަތިޔާރު އެޅި ޖަމާޢަތްތަކުން ސޫރިޔާއަށް އެތެރެވާން ފަށައިފިއެވެ. މެދުއިރުމަތީގެ މައި ބާރެއްގެ ގޮތުގައި ބެލެވޭ އީރާނަކީ އަސަދުގެ ވާގިވެރިއެކެވެ. ޢިރާޤު މަގުން ސޫރިޔާއަށް އެތެރެވާން ފަށާފައި ވަނީ އީރާނުން އެހީތެރިކަން ފޯރުކޮށްދޭ ހަތިޔާރު އެޅި ޖަމާޢަތްތަކުގެ ހަނގުރާމަވެރިންނެވެ.
ޢިރާޤުގައި ތިބި ހަނގުރާމަވެރިން ސޫރިޔާއަށް އެތެރެވާން ފަށާފައި މި ވަނީ، އަސަދުގެ ސަރުކާރާ ދެކޮޅަށް ސޫރިޔާގައި ހަނގުރާމަ ކުރަމުންދާ ހަޔިއަތު ތަޙްރީރް އަލް-ޝާމް (އެޗްޓީއެސު)ން ދާދިފަހުން ދިން ޙަމަލާތަކަކާ ގުޅިގެންނެވެ. އެ ޖަމާޢަތުގެ ހަނގުރާމަވެރިން ވަނީ ސޫރިޔާގެ ހުޅަނގުއުތުރުގައި އޮތް ޙަލަބު ޕުރޮވިންސުގައި ތިބި ސޫރިޔާގެ ސިފައިންނަށް ޙަމަލާދީ، އެ މީހުން ފަހަތަށް ޖައްސައި، އެ ޕުރޮވިންސުގެ ބޮޑެތި ރަށްތަކަށް އަތްގަދަ ކޮށްފައެވެ. އެ ޕުރޮވިންސުގެ ވެރިރަށް، ޙަލަބު ސިޓީއާއި މައި ވައިގެ ބަނދަރު ވެސް މި ވަގުތު އޮތީ އެޗްޓީއެސްގެ ބާރުގެ ދަށުގައެވެ.
ސޫރިޔާގެ އަސްކަރިއްޔާގެ މަޞްދަރުތަކުން ބުނީ، އެ ޤައުމުގެ އަލް-ބޫކަމާލް ސަރަޙައްދީ ހުރަހުން ގިނަ އަދަދެއްގެ ހަނގުރާމަވެރިން އެތެރެވެފައިވާ ކަމުގައެވެ. އޭގެ ތެރޭގައި ގިނައީ، އީރާނުން ވާގިވެރިވާ ޢިރާޤީ އަލް-ޙަޝްދު ޝަޢަބިއްޔު ޖަމާޢަތާއި، ކަތާއިބު ޙިޒްބުاللهގެ އިތުރުން ފަތައިމިއްޔޫން ޖަމާޢަތުގެ ހަނގުރާމަވެރިންނެވެ. "އެ މީހުން އެ އަންނަނީ އަޅުގަނޑުމެންގެ ސިފައިންނަށް އެހީތެރިކަން ފޯރުކޮށްދިނުމަށް،" ސޫރިޔާގެ އަސްކަރިއްޔާގެ އިސް އޮފިޝަލަކު ބުންޏެވެ.
2011ވަނަ އަހަރު ސޫރިޔާގައި ފެށި ދާޚިލީ ހަނގުރާމައިގައި، އަސަދުގެ ސަރުކާރުގެ ދިފާޢުގައި ހަނގުރާމަ ކުރަމުން ދިޔަ ފައުޖުތަކަށް އީރާނުގެ އިތުރުން ރަޝިޔާއިން ވެސް ވަނީ އެހީތެރިކަން ފޯރުކޮށްދީފައެވެ. ސޫރިޔާއަށް އީރާނުން ގިނަ އަދަދެއްގެ ހަނގުރާމަވެރިން ވެސް ފޮނުވާފައިވެއެވެ. ރަޝިޔާގެ އަސްކަރިއްޔާއިން މިހާރު ވެސް ދަނީ އެ ޤައުމުގައި ހަރަކާތްތެރިވަމުންނެވެ. ދާޚިލީ ހަނގުރާމައިގެ ތެރެއިން އިދިކޮޅު ހަނގުރާމަވެރިން އަތްގަދަ ކޮށްފައިވާ ސަރަޙައްދުތައް މިނިވަން ކުރުމުގައި ރަޝިޔާގެ އަސްކަރިއްޔާއާއި އީރާނުން ވާގިވެރިވާ ހަނގުރާމަވެރިން ވަނީ ބައިވެރިވެފައެވެ.
ޙަލަބަށް އަތްގަދަ ކޮށްފައިވާ އެޗްޓީއެސްގެ ހަނގުރާމަވެރިންގެ އަމާޒުތަކަށް ރަޝިޔާގެ އަސްކަރިއްޔާއިން މި ވަގުތު ވެސް ދަނީ ވައިގެ ޙަމަލާތައް ދެމުންނެވެ. ސޫރިޔާގެ އަސްކަރިއްޔާގެ މަޞްދަރުތަކުން ބުނީ، އެޗްޓީއެސްގެ ހަނގުރާމަވެރިން ވެރިވެގަނެފައިވާ ބައެއް ރަށްތަކާއި އަވަށްތައް މިހާރު ވެސް މިނިވަން ކޮށްފައިވާނެ ކަމުގައެވެ.
ސޫރިޔާގެ ދާޚިލީ ހަނގުރާމައިގެ ދަށުން ބަދަލު ކުރަމުން ދިޔަ ޙަމަލާތައް މެދުކަނޑައިލާފައި ވަނީ 2020ވަނަ އަހަރުގެ މާރިޗު މަހު ރަޝިޔާއާއި ތުރުކީވިލާތާ ދެމެދު ވެވުނު އެއްބަސްވުމެއްގެ ދަށުންނެވެ. އަސަދުގެ ސަރުކާރާ ދެކޮޅަށް ހަނގުރާމަ ކުރަމުންދާ ހަތިޔާރު އެޅި ބައެއް ގުރޫޕުތަަކަށް ތުރުކީވިލާތުން ދަނީ ވާގިވެރިވަމުންނެވެ. ނަމަވެސް، ޙަލަބަށް އަތްގަދަ ކޮށްފައިވާ އެޗްޓީއެސަކީ ތުރުކީވިލާތުގެ އިތުރުން އެމެރިކާއިން ވެސް ނިރުބަވެރި ޖަމާޢަތެއްގެ ގޮތުގައި ބަލާ ގުރޫޕެކެވެ.
ޙަލަބަކީ، ސޫރިޔާގެ ދާޚިލީ ހަނގުރާމައިގެ ތެރެއިން ހަނގުރާމަވެރިން އަތްގަދަކުރި ސަރަޙައްދެކެވެ. ނަމަވެސް، އަސަދަށް ވާގިވެރިވަމުން ދިޔަ ރަޝިޔާއާއި އީރާނުގެ އެހީތެރިކަމާ އެކު، ސޫރިޔާގެ އަސްކަރިއްޔާއިން 2016ވަނަ އަހަރު ވަނީ އެ ސަރަޙައްދުގައި ތިބި ހަނގުރާމަވެރިން ފަހަތަށް ޖައްސައި، އެ ސަރަޙައްދު މިނިވަން ކޮށްފައެވެ. އީރާނުން ވާގިވެރިވާ ހަތިޔާރު އެޅި ޖަމާޢަތްތަކުން ވެސް ވަނީ ސޫރިޔާގެ އަސްކަރިއްޔާއަށް ވާގިވެރިވެފައެވެ.