ފްރެންޗް ލީގުގައި ރޭ އަމިއްލަ ދަނޑުގައި އޭއެސް މޮނާކޯ 1-2 އިން ބަލިކޮށް، އޮލިމްޕިކް މާސޭ އިން ތާވަލްގެ ދެވަނަ އަށް ޖެހިލައިފިއެވެ.
މި ނަތީޖާއާއެކު ލީގުގެ އެއްވަނައިގައި އަދިވެސް އުޅެނީ ޕީއެސްޖީ އެވެ. އެ ޓީމަށް ކުޅުނު 13 މެޗުން 33 ޕޮއިންޓް ލިބިފައިވާއިރު، މާސޭ އޮތީ 13 މެޗުން 26 ޕޮއިންޓް ހޯދައިގެން ފައިދާގޯލްގެ ތަފާތުން ދެވަނައިގައެވެ. ތިންވަނައިގައި އޮތް މޮނާކޯ އަށް މި އަދަދަށް ޕޮއިންޓް ލިބިފައިވެއެވެ.
މާސޭގެ ދަނޑުގައި ރޭ ކުޅުނު މެޗުގައި ކުރީން ލީޑްނެގީ މޮނާކޯ އިންނެވެ. ފުރަތަމަ ހާފުގެ 41 ވަނަ މިނެޓުގައި މޮނާކޯ އަށް މި ލަނޑުޖަހައިދިނީ ރަޝިއާގެ މިޑްފީލްޑަރު، އަލެކްސެންޑާ ގޮލޮވިން އެވެ. މި ގޯލާ އެކު މޮނާކޯ އިން ފުރަތަމަ ހާފު ނިންމާލީ 1-0 އިން ކުރީގަ އޮވެގެންނެވެ.
ދެވަނަ ހާފުގެ ކުރީކޮޅު، މާސޭ އަށް އެއްވަރުކޮށްދިނީ ބްރެޒިލްގެ ވިންގް، ލުއިސް ހެންރީކް އެވެ. މެޗުގެ 53 ވަނަ މިނެޓުގައި ނީލް މޯޕޭ ނަގައިދިން ހުރަހަކުން އޭނާ މި ލަނޑުޖެހީ ބޮލުންނެވެ.
މި ނަތީޖާގައި އޮވެ، މެޗު ނިމެންދަނިކޮށް، 89 ވަނަ މިނެޓުގައި މާސޭ މޮޅުވި ލަނޑު، މޭސަން ގްރީންވުޑް ކާމިޔާބުކޮށްދިނީ ލިބުނު ޕެނަލްޓީއަކުންނެވެ. މިއީ ލީގުގައި އޭނާ ޖެހި ނުވަވަނަ ގޯލެވެ.
މި ގޯލާ އެކު ގްރީންވުޑް ވަނީ ލަނޑުލިސްޓުގެ ދެވަނައިގައި އުޅޭ ލިއްލެގެ ޖޮނަތަން ޑޭވިޑްއާ އެއްވަރުކޮށްފައެވެ. މި ދެ ކުޅުންތެރިންނަށް ވުރެ ލަނޑުލިސްޓުގެ ކުރީގައި އުޅެނީ 10 ލަނޑުޖަހައިގެން ޕީއެސްޖީގެ ބްރެޑްލީ ބާކޯލާ އެވެ.