ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގެ ދެވަނަ ބުރުގެ ޖާގައެއް ފުވައްމުލައް ސިޓީން ހޯދިއިރު، ބ. ކެންދޫ އާއި ކ. މާފުށި ބައްދަލުކުރި މެޗު އެއްވަރުވެއްޖެއެވެ.
ގައުމީ ފުޓްބޯޅަ ދަނޑުގައި މިރޭ ކުޅުނު ގްރޫޕް އޭގެ މެޗު ފުވައްމުލަކުން ކާމިޔާބުކޮށްފައިވަނީ ދ. މީދޫ އަތުން 4-0 ގެ ނަތީޖާއަކުންނެވެ. މި މޮޅާއެކު މުބާރާތުގެ ދެވަނަ ބުރަށް ފުވައްމުލައް ދަތުރުކުރިއިރު، އެ ޓީމުން ވަނީ މުބާރާތުގައި މިހާތަނަށް ކުޅުނު ތިން މެޗުވެސް ކާމިޔާބުކޮށްފައެވެ. ދެވަނަ ބުރުގެ 12 ޖާގައިގެ ތެރެއިން ހަތަރު ޖާގައެއް ވަނީ މިހާރު ކަށަވަރުވެފައެވެ. އެއީ ފުވައްމުލަކުގެ އިތުރުން މާލެ ސިޓީ އާއި، ބ. އޭދަފުށި އަދި ރ. އަލިފުށިންނެވެ.
މިރޭ ކުޅުނު މެޗުގައި ފުވައްމުލަކުގެ ފަރާތުން މޮޅު ކުޅުމެއް ފެނިގެންދިޔައިރު، މެޗު ފަށައިގެން 15 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ އަލީ ޝަމާލް އަބްދުﷲ އެވެ. އަދި އޭގެ ތިން މިނެޓު ފަހުން އޭނާ ވަނީ އިތުރު ލަނޑެއް ޖަހައި، ފުވައްމުލަކުގެ ލީޑު ފުޅާކޮށްދީފައެވެ. މި މެޗުގައި ފުވައްމުލަކުން ކާމިޔާބުކުރި ތިންވަނަ ލަނޑު މެޗު ނިމެން ހަތަރު މިނެޓަށް ވެފައި ވަނިކޮށް ކާމިޔާބުކޮށްދިނީ ކެޕްޓަން އިނާން އަޙްމަދެވެ. އަދި މެޗުގެ އިތުރު ވަގުތުގައި ލިބުނު ޕެނަލްޓީ ކާމިޔާބުކޮށް، ޝަމާލް ވަނީ މި މެޗުގައި ހެޓްރިކެއް ހަދާފައެވެ.
މީގެ އިތުރުން މި މުބާރާތުގައި މިއަދު ހަވީރު ކުޅުނު ގްރޫޕް ޑީގެ މެޗުގައި ކެންދޫ އާއި މާފުށި ވަނީ 1-1 ގެ ނަތީޖާއަކުން އެއްވަރުވެފައެވެ. މި މެޗުގެ ފުރަތަމަ ހާފުގައި ކެންދޫން ލީޑު ނެގިއިރު، މެޗުގެ 33 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ގާސިމް ސައްމާމެވެ. އެކަމަކު މެޗުގެ އިތުރު ވަގުތުގައި ލިބުނު ޕެނަލްޓީއަކުން މާފުށިން ނަތީޖާ އެއްވަރުކުރިއިރު، މި ޕެނަލްޓީ ކާމިޔާބުކޮށްދިނީ އަލީ އުޒައިރު މުޙައްމަދެވެ.
ގްރޫޕް ޑީގައި ކޮންމެ ޓީމެއް ދެ މެޗު ކުޅެފައިވާއިރު، ރ. އަލިފުށިން ވަނީ ދެ މެޗުން މޮޅުވެ ހަ ޕޮއިންޓާއެކު ދެވަނަ ބުރަށް ދަތުރުކޮށްފައެވެ. ދެވަނައިގައި އޮތް ނައިފަރަށް ތިން ޕޮއިންޓް ލިބިފައިވާއިރު، ތިންވަނައިގައި އޮތް މާފުއްޓާއި ހަަތަރުވަނައިގައި އޮތް ކެންދޫއަށް ވަނީ ޕޮއިންޓެއް ލިބިފައެވެ.
މުޅި ރާއްޖެއަށް ހުޅުވާލައިގެން ބާއްވާ މި މުބާރާތުގައި ޖުމްލަ 17 ޓީމެއް ވާދަކުރާއިރު، މި ޓީމުތައް ވަނީ ހަތަރު ގުރޫޕަކަށް ބަހާލާފައެވެ. މުބާރާތުގެ ގުރޫޕް އޭގައި ހިމެނެނީ ފުވައްމުލައް ސިޓީ އާއި، ދ. ކުޑަހުވަދޫ އާއި، ގދ. ފަރެސްމާތޮޑާ އާއި ދ. މީދޫ އަދި ހއ. ދިއްދޫއެވެ. ގުރޫޕް ބީގައި ހިމެނެނީ މާލެ ސިޓީ އާއި، ތ. ތިމަރަފުއްޓާއި، ބ. އޭދަފުށި އަދި ބ. ތުޅާދޫއެވެ. ގުރޫޕް ސީގައި އައްޑޫ ސިޓީ އާއި، ޅ. ކުރެންދޫ އާއި، ކ. ހުރާ އަދި ކ. ގުރައިދޫ ހިމެނޭއިރު، ގުރޫޕް ޑީގައި ހިމެނެނީ ޅ. ނައިފަރާއި، ކ. މާފުއްޓާއި، ރ. އަލިފުށި ބ. ކެންދޫއެވެ.