ކޮންމެ ރައްޔިތެއްގެވެސް ހަށިގަނޑާއި ފުރާނަ ރައްކާތެރިކުރެވޭނެ ހުރިހާ ފިޔަވަޅެއް މިސަރުކާރުން އަޅާނެ: ވަޒީރު އިހްސާން

އެއްވެސް ރައްޔިތަކު އިސްތިސްނާ ނުކޮށް އެންމެންގެވެސް ހަށިގަނޑާއި ފުރާނަ ރައްކާތެރިކުރެވޭނެ ހުރިހާ ފިޔަވަޅެއް މިސަރުކާރުން އަޅާނެކަމަށް ދާޚިލީ ސަލާމަތާއި ފަންނިޔާތާ ބެހޭ ވަޒީރު އަލީ އިހްސާން ވިދާޅުވެއްޖެއެވެ. ވަޒީރު މިހެން ވިދާޅުވީ ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ.

ވަޒީރު އަލީ އިހްސާން މިހެން ވިދާޅުވެފައިމިވަނީ ޓްވީޓް ކުރާތީ ފުލުސް އޮފީހަށް ހާޒިރުވާން މީހަކަށް އަންގާފައިވާކަމަށް ބުނެ އެމްޑީޕީގެ ޗެއަރޕާސަން ފައްޔާޒު އިސްމާއިލް ސޯޝަލް މީޑިއާގައި ޕޯސްޓެއް ހިއްސާކުރައްވާފައިވަނިކޮށެވެ. ފައްޔާޒުގެ ޕޯސްޓުގައި ވިދާޅުވެފައިވަނީ ރައީސުލްޖުމްހޫރިއްޔާ އާއި ސަރުކާރުގެ އިސްވެރިންގެ "އަބުރުފުޅު"ގެ ހިމާޔަތުގައި ކައުންސިލަރުންނާ ދެކޮޅަށް ފިޔަވަޅު އަޅަން ފަށާފައިވާކަމަށާއި، ސަރުކާރާ މެދު ހިތްހަމަނުޖެހުން އޮތްކަން ހާމަކުރުމަކީ ބޮޑު ކުށަކަށް ވެފައިވާކަމަށެވެ.

މިކަމާ ގުޅިގެން ވަޒީރު އަލީ އިހްސާން ވިދާޅުވީ، ފައްޔާޒު އެވިދާޅުވާ ޓުވީޓުގައި ލިޔެފައި އޮތީ ކޮންމެވެސް މީހަކަށް ނިސްބަތްކޮށް އެމީހަކު މަގެއްމަތިން ފެނިއްޖެނަމަ އެމީހަކަށް ޖިސްމާނީގޮތުން ގެއްލުމެއް ދީފާނެކަމަށް ދޭހަވާގޮތަށް ކަމަށެވެ. އެހެންކަމުން މިކަމުގެ ތަފްސީލު ހޯދާ މިކަން ސާފުކުރުމަކީ ކަމާބެހޭ އިދާރާތަކުން ކޮންމެހެން ކުރަންޖެހޭކަމެއްކަމަށެވެ.

އަދި މިފަދަ އިބާރާތަކުން މީހަކު މާދަމާ ފައްޔާޒަށް ނިސްބަތްކޮށް ނުވަތަ ދޭހަވާގޮތަށް ބުނެފިނަމަ އެއީ ޚިޔާލުފާޅުކުރީކަމަށް ބަލާ އަޅާނުލާ ތިބެންވީތޯ ވަޒީރު ވަނީ ސުވާލު އުފައްދަވާފައެވެ. އަދި އެހެން ތިއްބާ މަގެއްމަތިން ފެނި ޖިސްމާނީ އަނިޔާއެއް ދީފިނަމަ އެއީ ފާޅުކުރި ޚިޔާލު އިތުރަށް ސާފުކޮށްދިނީކަމަށް ބަލާ އަޅާނުލާ ތިބެންވީތޯވެސް ވަނީ ސުވާލު އުފައްދަވާފައެވެ.

ވަޒީރު އަލީ އިހްސާން ވިދާޅުވީ އެއްވެސް މީހަކު އިސްތިސްނާ ނުކޮށް ކޮންމެ ރައްޔިތެއްގެވެސް ހަށިގަނޑާއި ފުރާނަ ރައްކާތެރިކުރެވޭނެ ހުރިހާ ފިޔަވަޅެއް މިސަރުކާރުން އަޅާނެކަމަށެވެ. ހަމައެއާއެކު ރާއްޖޭގެ ޤާނޫނުތަކާއި ޤަވާއިދުތަކުގެ އިމުގެތެރޭގައި ހިޔާލުފާޅުކުރެވޭނެ އެންމެ ފުޅާމިނަށް އެކަން ކުރެވޭނެ މަގު އޮންނާނީ އަބަދުވެސް ހުޅުވިފައިކަމުގެ ޔަޤީންކަން ވަޒީރު އިހްސާން ވަނީ ދެއްވާފައެވެ. އަދި ކޮންމެ ކަމަކީ ސިޔާސީ ކުޅިވަރަކަށް ހެދުމަކީ ވަރަށް ޣައިރު ޒިންމާދާރު ކަމެއް ކަމަށް ވަޒީރު ވަނީ ވިދާޅުވެފައެވެ.