ވިއްސާރާގައި ގެއްލުންވި ގޭގެ ޢާއިލާއަށް އެހީތެރިކަން ފޯރުކޮށްދޭން ފަށައިފި

ރާއްޖެއަށް މިހާރު ކުރަމުންދާ ވިއްސާރައިގައި އައްޑޫ ސިޓީގެ ގެއެއްގެ ފުރާޅު އެއްލާލުމާ ގުޅިގެން އެ ގޭގައި ދިރިއުޅޭ މީހުންނަށް ސަރުކާރުން އެހީތެރިކަން ފޯރުކޮށްދޭން ފަށައިފިއެވެ.

ނޭޝަނަލް ޑިޒާޒްސްޓަރ މެނޭޖްމަންޓް އޮތޯރިޓީން ވިދާޅުވީ މިހާރު ކުރަމުންދާ ވިއްސާރައިގައި އައްޑޫ ސިޓީގެ މަރަދޫ ފޭދޫއަށް ވައިގަދަވެ، ގެއެއްގެ ފުރާޅު އެއްލާމުމާއި ގުޅިގެން، އެ ގޭގެ މީހުންނަށްއެހީތެރިކަން ފޯރުކޮށްދިނުމުގެ މަސައްކަތް އަައްޑޫ ސިޓީ ކައުންސިލާއި ގުޅިގެން ކުރަމުން އަންނަކަމަށެވެ.

ފުރާޅު އެއްލާލި ގޭގައި 17 މީހުން ދިރިއުޅޭކަމަށާއި، އޭގެރޭގައި 13 މީހުންނާއި 12 އަހަރުން ދަށުގެ 4 ކުދިން ހިމެނޭކަމަށް އެންޑީއެމްއޭއިން ވިދާޅުވިއެވެ. އަދި ޢާއިލާގެ އެހެން ގެތަކަށް އެމީހުން ވަގުތީ ގޮތުން ބަދަލުވެފައިވާކަމަށްވެސް އެންޑީއެމްއޭއިން ވިދާޅުވެއެވެ.

މީގެ އިތުރުން ރޭ އައްޑޫ ސިޓީއަށް ކުރި ވިއްސާރައާއެކު އައި ގަދަ ކޮޅިގަނޑުގައި، އައްޑޫ ސިޓީ، މަރަދޫގެ ގެޔަކާއި، މަރަދޫފޭދޫގެ ގެއެއްގެ އިތުރުން، ފޭދޫގެ ދެ ގެއެއް، އަދި ހުޅުދޫގެ ގެއެއްގެ ފުރާޅު ވަޔާއެކު މަގުމައްޗަށް އެއްލާލާފައިވެއެވެ. އެ 5 ގޭގެ ފުރާޅު އެެއްލާލުމާ ގުޅިގެން ފުރާޅު މަގުމަތިން އެއްފަރާތްކޮށް، ފުރާޅު ހެދުމުގައި އެމްއެންޑީއެފް ސަދަން އޭރިއާ ކޮމާންޑުގެ ސިފައިން ވަނީ އެހީތެރިކަން ފޯރުކޮށްދީފައެވެ.

ކުރިއަށް އޮތް ދެދުވަހުވެސް ރާއްޖޭގެ މޫސުން ގޮސްވާނެކަމަށާއި، ވައިގަދަވެ ކަނޑުތައްވެސް ގަދަވާނެކަމަށް މޫސުމާބެހޭ ޤައުމީ އިދާރާއިން ވަނީ ވިދާޅުވެފައެވެ. އެހެންކަމުން ލިބިދާނެ ގެއްލުމަށްޓަކައި ކުރިއާލާ ފިޔަވަޅު އެޅުމަށް ކަމާ ބެހެ ފަރާތްތަކުން އިލްތިމާސްކުރެއެވެ.