ކުޅިވަރުގެ ދިގު ރާސްތާ ޕްލޭނުގެ ބައިތައް ތަންފީޒުކުރުމަށް މުޅި ރާއްޖެ ތިން ސަރަހައްދަކަށް ބަހާލައި، 20 އަހަރު ދުވަހުގެ މާސްޓަރ ޕްލޭނުގައި ހިމެނޭ ބައިތައް އިއުލާންކޮށްފިއެވެ. ޕްރެޒެންޓޭޝަނެއްގެ ގޮތުގައި މި ބައިތައް އިއުލާންކުރުމުގެ ގޮތުން މިއަދު ވަނީ ސްޓެލްކޯގައި ޚާއްސަ ސެޝަނެއް ކުރިއަށްގެންގޮސްފައެވެ.
ކުޅިވަރުގެ ދިގު ރާސްތާ ޕްލޭންގައި ހިމެނޭ ބައިތައް އިއުލާންކުރުމަށް ބޭއްވި މި ސެޝަނުގައި ކުޅިވަރު އެސޯސިއޭޝަންތަކާއި، ސިޓީތަކުގެ ބައެއް މޭޔަރުންނާއި ކުޅިވަރުގައި ހަރަކާތްތެރިވަމުން އަންނަ ބައެއް ފަރާތްތަކާއި، ބައެއް ގައުމުތަކުގެ ސަފީރުންވެސް ބައިވެރިވެވަޑައިގަތެވެ. މީގެ އިތުރުން ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އާއި ކޮމިޝަނަރ އޮފް ސްޕޯޓްސް މުޙައްމަދު ޠަލާލްގެ އިތުރުން އެ ވުޒާރާގެ ޑެޕިއުޓީ މިނިސްޓަރުންވެސް ވަނީ ބައިވެރިވެވަޑައިގެންފައެވެ.
ޖުމްލަ 20 އަހަރަށް ބަހާލައިގެން މި ޕްލޭން ތަންފީޒުކުރާއިރު އެންމެ ޚާއްސަވާ އެއް ކަމަކީ ރާއްޖެ ތިން ބަޔަށް ބަހާލުމެވެ. އެއީ ދެކުނާއި، މެދު ރާއްޖެ އަދި އުތުރެވެ. އަދި މި ކަންކަން ތަންފީޒުކުރާނީ ހަތަރު ފޭސް އަކަށް ބަހާލައިގެންނެވެ. މި ޕްލޭނުގެ އެންމެ ބޮޑު އަމާޒަކީ 2030 އަދި 2034 ވަނަ އަހަރުގެ އޭޝިއަން ގޭމްސްގެ ޕޯޑިއަމް ފިނިޝިން ނުވަތަ މެޑެއްޔެއް ހޯދުމެވެ. އަދި 2036 ވަނަ އަހަރާއި 2040 ވަނަ އަހަރުގެ އޮލިމްޕިކްސްއިން ދިވެހި އެތުލީޓުން މެޑެލް ހޯދުމެވެ.
ކުޅިވަރުގެ ދިގު ރާސްތާ ޕްލޭނުގައި ސްކޫލް މާހައުލުން ފެށިގެން ކޯޗުން ބިނާކުރުމާއި، ބޮޑެތި ގޭމްސްތައް ރާއްޖޭގައި ބޭއްވުމާއި، މޮޅެތި އެތުލީޓުން އުފެއްދުމަށް ކުރާނެ ކަންކަން ވަނީ ހިމަނާފައެވެ. އެގޮތުން ކުޅިވަރުގެ މާސްޓަރ ކަލަންޑަރެއް އެކުލަވާލުމާއި، އެސޯސިއޭޝަންތައް ބާރުވެރިކުރުމާއި، ކޯޗުންނާއި ކުޅިވަރުގެ މެނޭޖްމަންޓުގައި ހަރަކާތްތެރިވާ ފަރާތްތައް ތަމްރީނުކުރުމާއި، ސްކޫލުތަކުގެ ކުޅިވަރު ހަރަކާތްތައް މެނޭޖުކުރާނެ އުސޫލުގެ އިތުރުން ބައިނަލްއަގުވާމީ ކުޅިވަރު މުބާރާތްތައް ރާއްޖޭގައި ބޭއްވުން ހިމެނެއެވެ.
މިއީ ނުވަ މަސް ދުވަހުގެ ތެރޭގައި އެކުލަވާލެވުނު ބޮޑު ޕްލޭނެކެވެ. މި ޕްލޭން އެކުލަވާލުމުގެ މަސައްކަތް ފަށާފައިވަނީ މިއަހަރުގެ ފެބްރުއަރީ މަހުގެ ތެރޭގައެވެ. އެއީ ބޭރުގެ ދެ ތަޖުރިބާކާރުންގެ އެހީގައެވެ. މި ޕްލޭނު އެކުލަވާލުމަށް ބޭއްވި މަޝްވަރާތަކުގައި އެކިއެކި ފަރާތްތަކާއެކު ވަނީ މައުލޫމާތު ހޯދާފައެވެ.