އެމެރިކާގެ އެންބީއޭގައި މިއަދު ކުޅުނު މެޗުގައި ޖޭސަން ޓޭޓަމް ދެއްކި މޮޅުކުޅުމާއެކު ބޮސްޓަން ސެލްޓިކްސް އިން ނުވަ ޕޮއިންޓްގެ ތަފާތަކުން ޝިކާގޯ ބުލްސް ބަލިކޮށްފިއެވެ.
މި މެޗުން ސެލްޓިކްސް މޮޅުވީ 138-129 އިންނެވެ.
މި ނަތީޖާއާއެކު އެންބީއޭ ކަޕްގެ ގްރޫޕް ފިޔަވަހީގެ ބުރުގައި އީސްޓް ގްރޫޕް ސީ ގައި ސެލްޓިކްސް އޮތީ ދެވަނަ މަގާމުގައެވެ. އެ ޓީމުން ވަނީ މިހާތަނަށް ކުޅުނު ހަތަރު މެޗުގެ ތެރެއިން ތިން މެޗު ކާމިޔާބުކޮށްފައެވެ. މި ގްރޫޕުގެ އެއްވަނައިގައި އޮތީ އެޓްލާންޓާ ހޯކްސް އެވެ.
ޝިކާގޯގައި ހުންނަ ޔުނައިޓެޑް ސެންޓަރުގައި ކުޅުނު މި މެޗު ފެށިގެން ފުރަތަމަ ކުއާޓާގައި ސެލްޓިކްސް ވަނީ 39-30 އިން ލީޑްނަގައިފައެވެ. އެކަމަކު، ދެވަނަ ކުއާޓާގައި ޝިކާގޯ ވަނީ ނުވަ ޕޮއިންޓްގެ ފަރަގާއެކު ކުރިހޯދައި، 37-28 އިން އެ ކުއާޓާ ނިންމާލައިފައެވެ. މިއާއެކު، ފުރަތަމަ ދެ ކުއާޓާ އަށް ފަހު ދެ ޓީމު އޮތީ 67-67 އިން އެއްވަރުވެފައެވެ.
އޭގެފަހުން، ކުޅެވުނު ތިންވަނަ ކުއާޓާގައި ވެސް ދެ ޓީމު ފެނުނީ ވަރަށް ވާދަވެރިކޮށް، އެއްވަރުކޮށެވެ. މިއާއެކު، މި ކުއާޓާ ނިމުނީ 29-29 އިން އެއްވަރުވެގެންނެވެ.
ދެން އޭގެފަހުން، ކުޅުނު މެޗުގެ ފަހު ކުއާޓާގައި ވެސް ދެ ޓީމުގެ ފަރަގަކަށްވީ ނުވަ ޕޮއިންޓެވެ. މި ފަހަރު ސެލްޓިކްސް ވަނީ 42-33 އިން ހަތަރުވަނަ ކުއާޓާގައި ކުރިހޯދައި، މެޗުވެސް ކާމިޔާބުކޮށްފައެވެ.
މި މެޗުން ސެލްޓިކްސް މޮޅުކޮށްދޭން އެންމެ ރަނގަޅު ކުޅުމެއްދެއްކީ އެންމެ ފަހުގެ އެންބީއޭ ޗެމްޕިއަންޝިޕް އެ ޓީމަށް ހޯދައިދިނުމުގައި މުހިއްމު ދައުރެއް އަދާކުރި، ޓޭޓަމް އެވެ. ޓޭޓަމް ވަނީ 35 ޕޮއިންޓާއެކު 14 ރީބައުންޑް ނަގައިފައެވެ. މީގެއިތުރުން، އެ ޓީމުގެ ބެންޗުން ކުޅެން އެރި ޕޭޓަން ޕްރިޗާޑްގެ ކުޅުން ފާހަގަކޮށްލެވުނެވެ. ޕްރިޗާޑް ވަނީ 29 ޕޮއިންޓް އެއްކޮށްފައެވެ.
ޝިކާގޯ އިން އެންމެ ރަނގަޅަށް ކުޅުނު ނިކޮލާ ވުކްސެވިޗް 32 ޕޮއިންޓާއެކު 11 ރީބައުންޑް ނެގިއެވެ. އެ ޓީމުގެ ޒެކް ލަވީން ވަނީ 29 ޕޮއިންޓް އެއްކޮށްދީފައެވެ. މީގެތެރޭގައި ހަތަރު ތްރީ-ޕޮއިންޓް ވައްޓާފައިވެއެވެ. މިއާއެކު، އޭނާ އަކީ ޝިކާގޯގެ ތާރީޚުގައި އެންމެ ގިނައިން ތްރީ-ޕޮއިންޓް ކާމިޔާބުކުރި ކުޅުންތެރިޔާ އެވެ.
ޝިކާގޯ އަށް ދެން އެންމެ އަވަހަށް އޮތީ އަމިއްލަ ދަނޑުގައި ބްރޫކްލިން ނެޓްސްއާ ދެކޮޅަށް ކުޅެން ޖެހޭ މެޗެވެ. ސެލްޓިކްސް ދެން ކުޅޭ މެޗުގައި ރަށުން ބޭރުގައި ނިކުންނާނީ ކްލީވްލެންޑް ކަވާލިއާސްއާ ދެކޮޅަށެވެ.