ސާފް ޗެމްޕިއަންޝިޕް ފުޓްބޯޅަ މުބާރާތް ހޯމް އެންޑް އަވޭ ފޯމެޓަށް ކުޅޭ ޕްރޮޕޯސަލަކަށް ދެކުނު އޭޝިއާ ސަރަހައްދުގެ ފުޓްބޯޅަ ޖަމްއިއްޔާ، ސާފް އިން އަނެއްކާވެސް މަޝްވަރާ ކުރަމުން އެބަދެއެވެ.
ހޯމް އެނޑް އަވޭ ފޯމެޓަށް ކުޅޭނަމަ ކޮންމެ ގައުމަކަށްވެސް، އަމިއްލަ ގައުމުގައި މެޗު ކުޅުމުގެ ފުރުސަތު ލިބޭނެއެވެ. އަދި އެކި ދަނޑުތަކުގައި ކުޅުމުގެ ފުރުސަތު އޮންނާނެއެވެ.
އެހެންނަމަވެސް މީގެ ކުރިން 14 ފަހަރެއްގެ މަތިން ސާފް ޗެމްޕިއަންޝިޕް ބާއްވާފައިވާއިރު 2008 ވަނަ އަހަރު ދެގައުމަކުން މުބާރާތް ހޯސްޓްކުރިއެވެ. އެ އަހަރުގެ މުބާރާތް ހޯސްޓްކުރީ ރާއްޖެ އާއި ސްރީލަންކާއިންނެވެ.
އެ އަހަރު ފިޔަވާ އެހެން ހުރިހާ އަހަރެއްގައިވެސް މުބާރާތް ބޭއްވީ އެއަހަރަކު ހޯސްޓްކުރާ ގައުމެއްގައި ސެންޓްރަލައިޒްކޮށް ކަނޑައެޅި އެއް ދަނޑުގައެވެ.
ސާފް ޗެމްޕިއަންޝިޕް ހޯމް އެންޑް އަވޭ ފޯމެޓަށް ބަދަލުކުރުމުގެ މަޝްވަރާތައް ކުރިޔަށް ގެންދަނީ ކޮންމެ ޓީމެއްވެސް ކޮންމެ ޓީމަކާއި އެއްފަހަރު ކުޅޭ ގޮތަށެވެ. އޭރުން އަމިއްލަ ގައުމުގައި ތިން މެޗު އަދި އަވޭގައި 3 މެޗު ކުޅުމުގެ ފުރުސަތު ކޮންމެ ޓީމަކަށް ލިބޭނެއެވެ.
ހޯމް އެންޑް އަވޭ ފޯމެޓަށް މުބާރާތް ބަދަލުކުރުމުގެ މަޝްވަރާތައް ކުރިޔަށް ގެންދިޔަނަމަވެސް މި ގޮތަށް ކުރިޔަށް ގެންދެވޭނީ، ސްޕޮންސަރުންނާއި ފަންޑިން ހޯދޭނެ ގޮތްތަކެއް ކަނޑައެޅިއްޖެނަމަ އެކަންޏެވެ. މީގެ ކުރިންވެސް 2022 ގައި ސާފް ޗެމްޕިއަންޝިޕް ހޯމް އެންޑް އަވޭއަށް ކުޅުމަށް ޕްރޮޕޯޝަލެއް ހުށަހެޅި މަޝްވަރާތައް ކުރިއެވެ. އެހެންނަމަވެސް އެ އަހަރުވެސް އެ ޕްރޮޕޯސަލާއި އެއްގޮތަށް ކުރިޔަށް ނުގެންދެވުނީ ބޭނުންވާ ވަރަށް ފައިސާ ހަމަނުޖެހުމުގެ ސަބަބުންނެވެ.
ސާފް އިން އަންނަ އަހަރަށް އެކުލަވާލާފައިވާ ކަލަންޑަރުގައި ސާޕްޗެމްޕިއަންޝިޕް ބޭއްވުމަށް ކަނޑައަޅާފައިވަނީ ޖޫން/ޖުލައި ގައެވެ.
ސާފް އިން މިހާރު ނިންމާފައިވަނީ ދައުވަތުދީގެން ސާފް ޗެމްޕިއަންޝިޕަށް ގެނައުން ރަނގަޅު ނޫންކަމަށެވެ. އެހެންނަމަވެސް އެންމެ ފަހުން އިންޑިއާގެ ބެންގަލޫރުގައި މިދިޔަ އަހަރު ބޭއްވި މުބާރާތަށް ދައުވަތުދީގެން ކުވެއިތާއި ލުބުނާންގެ ޓީމު ގެނައެވެ.