މިދިޔަ ސަރުކާރުން އެމްޓީސީސީއާއެކު ސޮއިކުރި 50 މަޝްރޫޢުއެއް ވެރިކަން ބަދަލުވިއިރުވެސް ނުފަށާ އޮތް: ވަޒީރު މުއްޠަލިބު

ނިމިދިޔަ ސަރުކާރުން ހަމައެކަނި އެމްޓީސީސީއާއެކު ސޮއިކޮށްފައިވާ 50 މަޝްރޫޢުއެއް ވެރިކަން ބަދަލުވިއިރުވެސް ނުފަށާ އޮތްކަމަށް އިމާރާތްކުރުމާއި ބިނާރާ ބެހޭ ވަޒީރު، ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.

ވަޒީރު މިހެން ވިދާޅުވީ ޕީއެސްއެމްއިން ގެނެސްދޭ "ހަފްތާ 52" ޕްރޮގްރާމްގައި ވާހަކަފުޅުދައްކަވަމުންނެވެ.

އިމާރާތްކުރުމާއި ބިނާތާ ބެހޭ ވަޒީރު ޑރ.ޢަބްދުﷲ މުއްޠަލިބް ވިދާޅުވީ، 2024ގެ ބަޖެޓުގައި އެ ވުޒާރާއަށް ކަނޑައަޅާފައި އޮތީ 3.6 ބިލިއަން ރުފިޔާ ނަމަވެސް، ހަވާލުކޮށްފައި ހުރި މަޝްރޫޢުތަކުގެ އަގު 39 ބިލިއަން ރުފިޔާއަށް އަރާކަމަށެވެ. އެގޮތަށް އޮތުމުގެ ސަބަބުން އެތަށް އަހަރަކަށް މަސައްކަތްތައް ފުނިޖެހޭކަމަށް ވަޒީރު ވިދާޅުވިއެވެ. ޖުމްލަ 300އަށްވުރެ ގިނަ މަޝްރޫޢު ހަވާލުކޮށްފައި އޮތްއިރު، ގިނަ މަސައްކަތްތަކަކީ ކުޑަ އަދަދެއް ބަޖެޓުގައި ހިމަނާފައިވާ މަސައްކަތްތަކެއްގެ ގޮތުގައި ވަޒީރު ސިފަކުރެއްވިއެވެ.

ވަޒީރު ވިދާޅުވީ މިދިޔަ ސަރުކާރުގައި ގިނަ މަޝްރޫޢުތައް ހަވާލުކޮށްފައި އޮތީ އެމްޓީސީސީ، އާރްޑީސީ އަދި އެމްޑަބްލިއެސްސީއާ ކަމަށެވެ. ނަމަވެސް އެއްފަހަރާ އެފަދަ ބޮޑެތި މަޝްރޫޢުތައް ހިންގޭ ކެޕޭސިޓީ އެއިން އެއްވެސް ކުންފުންޏެއްގައި ނެތްކަމަށެވެ.

"100 ވަރަކަށް ރަށަށް މޮބިލައިޒްކޮށްފައި އެބަހުރި. މެޝިނަރީއަކާއި 2-3 މުވައްޒަފުން ރަށްރަށަށް ފޮނުވާލާފައި ހުރި ރަށްތަށް އެބަހުރި. އެމްޓީސީސީއާއެކުވެސް އެބައޮތް 50 މަޝްރޫޢު ހަވާލުކޮށް، އެއްގޮތަކަށްވެސް ނުފަށާ. އެއީ އެވަހަށް ކެޕޭސިޓީއާއި އިކުއިޕްމަންޓެއް ނެތް" އިމާރާތްކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވިއެވެ.

މި ދަތިތަކާއެކުވެސް މިއަހަރުތެރޭގައި ޖުމްލަ 50 އަށްވުރެ ގިނަ މަޝްރޫޢު ވަނީ ނިންމާފައެވެ. ވަޒީރު ވިދާޅުވީ އާ ސަރުކާރެއް ހަވާލުވިއިރު، 2024ގައި އާ މަޝްރޫޢުތައް ފެށުމަށްވެސް ހިމަނާފައި އޮތީ 900 މިލިއަން ރުފިޔާއެވެ. އޭގެއިންވެސް ބޮޑު ބައެއް ހޭދަކުރަން ޖެހުނީ މިހާރު ފަށާފައިވާ މަސައްކަތްތަކަށް ބަޖެޓު ނެތިގެންކަމަށެވެ. ވަޒީރު ވިދާޅުވީ އާ މަޝްރޫޢުގެ ގޮތުގައި ފެށުމަށް ފުރުޞަތު ލިބުނީ 2 މަޝްރޫޢުކަމަށެވެ. އޭގެވެސް ގިނަ މަސައްކަތްތަކަކީ ކޮންޓްރެކްޓަރ ފައިނޭންސް އުޞޫލުން ގެންދަން ނިންމި މަސައްކަތްތައްކަމަށެވެ.

މަޝްރޫޢުތައް ބާރަށް ކުރިއަށްގެންދިއުމަށް އިމާރާތްކުރުމާއި ބިނާރާ ބެހޭ ވުޒާރާއަށް 15 ވަރަކަށް ބިލިއަން ރުފިޔާގެ ބަޖެޓެއް ބޭނުންވާކަމަށެވެ.