ޔުނިފޯމް އަޅައިގެން ތިބެ ޤާނޫނާއި ޚިލާފުވާނަމަ އޮންނާނީ އެންމެ ހަރުކަށި އަދަބު: ދާޚިލީ ސަލާމަތާބެހޭ ވަޒީރު

ޔުނިފޯމް އެޅި މުއައްސަސާއެއްގައި މަސައްކަތްކުރަމުން ޤާނޫނާއި ޚިލާފަށް އަމަލުކޮށްފިނަމަ، އެ ބަޔަކަށް ގާނޫނުގައި އޮންނަ އެންމެ ހަރުކަށި އަދަބު ދެއްވާނެކަމަށް ދާޚިލީ ސަލާމަތާއި ފަންނިއްޔަތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިހެން ވިދާޅުވީ ބިދޭސީންނާއި ގުޅޭ ކަމެއްގައި ޤާނޫނާއި ގަވާއިދާ ޚިލާފު ޢަމަލުތަކެއް ހިންގި އިމިގްރޭޝަންގެ އޮފިސަރުންތަކެއްގެ މައްސަލައެއް ތަޙުގީގުކުރަމުންދާކަން ހާމަކުރައްވާ ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ.

ދާޚިލީ ސަލާމަތާއި ފަންނިއްޔަތާބެހޭ ވަޒީރު ޢަލީ އިޙްސާން ވިދާޅުވީ، ޔުނިފޯމު އެޅި މުވައްސަސާތަކުގައި ތިބެ ޔުނިފޯމުގެ ޙުރުމަތްކަނޑާ، ރައްޔިތުންގެ ކުރިމަތީގައި މުވައްސަސާތަކުގެ އިތުބާރު ގެއްލުވާލަމުންދާ ފަރާތްތަކާ ދޭތެރޭގައި، ޤާނޫނީގޮތުން އޮންނަ އެންމެ ހަރުކަށި ފިޔަވަޅު އަޅުއްވަން ރައީސުލްޖުމްހޫރިއްޔާ އަންގަވާފައިވާކަމަށެވެ. މިގޮތުން ރާއްޖޭގައި އޮތް ބިދޭސީންގެ މައްސަލަ ޙައްލުކުރުމަށް ކުރަމުންދާ މަސައްކަތަށް ހުރަސް އެޅޭނެހެން ޢަމަލުކުރަމުންދިޔަ އިމިގްރޭޝަން އޮފިސަރުންތަކެއްގެ މައްސަލަ މިހާރު ތަޙުގީގުކުރައްވަމުން ގެންދަވާކަމަށް ވަޒީރު ވިދާޅުވެފައެވެ.

މިމައްސަލައިގެ ތަފްސީލު ހިއްސާކުރައްވަމުން ވަޒީރު ޢަލީ އިޙްސާން ވިދާޅުވީ، މޯލްޑިވްސް އިމިގްރޭޝަންގެ 5 މުވައްޒަފަކު ޤާނޫނާއި ގަވާއިދާ ޚިލާފަށް ބިދޭސީންނާއި ގުޅުންހުރި ބައެއް މުޢާމަލާތްތައްކޮށް، ނަހަމަގޮތުގައި ފައިސާ ހޯދަމުންދާކަމުގެ މައުލޫމާތު ލިބިފައިވާކަމަށެވެ. އަދި އެކަމާއި ގުޅިގެން އެމައްސަލަ ދިވެހި ފުލުހުންގެ ޚިދުމަތުން މިހާރު ތަޙުގީގު ކުރައްވަމުންގެންދަވާކަމަށްވެސް ވަޒީރު ވިދާޅުވިއެވެ.

މިގޮތުން މިމައްސަލައިގައި ހިމެނޭ މީހުން ބޭނުންކުރާ އިލެކްޓްރޯނިކް ސާމާނު ފުލުހުން ހިފަހައްޓާފައިވާކަމަށާއި އެމީހުން ދިރިއުޅޭ ތަންތަން ބަލައި ފާސްކޮށްފައިވާކަމަށްވެސް ވަޒީރު ވިދާޅުވިއެވެ. އަދި މިމައްސަލައާ ގުޅޭ އިތުރު ތަފްސީލު ތަޙުގީގުކުރިއަށްދާ މިންވަރަކުން ޢާއްމުންނާއި ހިއްސާކުރައްވާނެކަމަށްވެސް ވަޒީރު ވިދާޅުވިއެވެ.

ޔުނިފޯރމުއެޅި މުއައްސަސާތަކުގެ ތެރޭގައިތިބެ ޔުނިފޯރމުގެ ހުރުމަތްކަނޑާ، ރައްޔިތުންގެ ކުރިމަތީ މުއައްސަސާތަކުގެ އިތުބާރުގެއްލުވަމުންދާ ފަރާތްތަކާ ދޭތެރޭ ޤާނޫނީގޮތުން އެޅޭ އެއްމެ ހަރުކަށިފިޔަވަޅު އެޅުމަކީ ރައީސުލްޖުމްހޫރިއްޔާ އަޅުގަނޑަށް އަންގަވާފައިވާކަމެއް. މިގޮތުން މޯލްޑިވްސް…

— Minister of Homeland Security & Technology (@min_mohst) November 28, 2024

ވަޒީރުވަނީ މިފަދަ ޢަމަލުތަކަކީ ސަރުކާރުން އެއްވެސް ވަރަކަށް ދޫދޭނެ ކަންކަން ނޫންކަން ފާހަގަކުރައްވާފައެވެ. އަދި ދައުލަތުގެ މުވައްސަސާތަކާމެދު ރައްޔިތުންގެ އޮތް އިތުބާރު ގެއްލިދާނެ ފަދަ ޢަމަލުތަކުން ދުރުހެލިވުމަށް ޔުނިފޯމު އެޅި މުވައްސަސާތަކުގެ ހުރިހާ މުވައްޒަފުންނަށް ވަޒީރު ވަނީ އިލްތިމާސްކުރައްވާފައެވެ.

ދާޚިލީ ސަލާމަތާއި ފަންނިއްޔަތާބެހޭ ވަޒީރު ޢަލީ އިޙުސާން ވަނީ މީގެކުރިންވެސް ޔުނިފޯމު އެޅި ހުރިހާ މުވައްސަސާއެއްގެ އޮފިސަރުން އެފަދަ ޢަމަލުތަކުން ދުރުހެލިވުމަށް އަންގަވާފައެވެ. އަދި މާތްﷲ ގަންދީ ހުވާކޮށްގެން ޤައުމަށް ޚިދުމަތްކުރުމަށް އޮފިސަރުން ނުކުންނަނީ އަމިއްލަ އިޚްތިޔާރުގައިކަން ފާހަގަކުރައްވާ ވަޒީރު ވަނީ އެފަދަ ޢަމަލުތަކަށް އަރައިގަތުމަށް އެއްވެސް ޔުނިފޯމު އެޅި އޮފިސަރަކަށް އެއްވެސް މަޖުބޫރީ ޙާލަތެއް އޮވެގެން ނުވާނެކަން ފާހަގަކުރައްވާފައެވެ.
އެގޮތުން ޔުނިފޯމު އަޅައިގެން ތިބެ ޤައުމަށް ޣައްދާރުވާންޖެހޭ ސަބަބެއް އެއްވެސް އޮފިސަރަކަށް ނޯންނާނެކަމަށާއި، އެފަދަ ޢަމަލުތައްކުރާ ފަރާތްތަކާމެދު ޤާނޫނީ ފިޔަވަޅު އަޅުއްވަން ފަސްޖެހިވަޑައިނުގަންނަވާނެކަން މީގެކުރިންވެސް ވަޒީރު ވަނީ ފާހަގަކުރައްވާފައެވެ.