ކޮރަޕްޝަން ނައްތާލުމަށް ޒުވާނުންގެ ކިބައިގައި ނަޒާހަތްތެރިކަން އަށަގެންނެވުން މުހިންމު: ވަޒީރު އިޙްސާން

ކޮރަޕްޝަން ނެތް މުޖުތަމަޢެއް ބިނާކުރުމަށް ޒުވާނުންގެ ކިބައިގައި ނަޒާހަތްތެރިކަން އަށަގެންނެވުން މުހިންމުކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިހެން ވިދާޅުވީ އޯގަނައިޒޭޝަން އޮފް އިސްލާމިކް ކޯޕަރޭޝަން، އޯއައިސީގެ ޤައުމުތަކުގައި ކޮރަޕްޝަނާ ދެކޮޅަށް މަސައްކަތްކުރާ ތަންފީޒީ އިދާރާތަކާގުޅޭ ވަޒީރުންގެ ދެވަނަ ބައްދަލުވުމުގައި ވާހަކަފުޅުދައްކަވަމުންނެވެ.

އޯއައިސީގެ ބައްދަލުވުމުގައި ވާހަކަފުޅުދައްކަވަމުން ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވީ ދިވެހިރާއްޖޭން ކޮރަޕްޝަން ނައްތާލުމަކީ ސަރުކާރުގެ ބޮޑު އަމާޒެއް ކަމަށެވެ. އަދި ކޮރަޕްޝަންގެ ޢަމަލަކީ ޤައުމުތަކުގެ ތަރައްޤީއަށް ލޮޅުންއަރައި، އިޖުތިމާޢީ ދުޅަހެޔޮކަމަށް ނުރަނގަޅު އަސަރުތަކެއްކުރާ ޢަމަލެއްކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ ކޮރަޕްޝަން ނައްތާލުމަށް ކުރާ މަސައްކަތް ނައްތާލެވޭނީ ޤައުމުތަކުން ގުޅިގެން މަސައްކަތްކޮށްގެން ކަމަށެވެ. އެގޮތުން އޯއައިސީން ބާއްވާ މި ބައްދަލުވުމުގެ ސަބަބުން ޤައުމުތައް ގުޅިގެން މަސައްކަތްކޮށް، ކޮރަޕްޝަން ނައްތާލުމަށް ޕްލޭންތައް އެކުލަވާލުމަށް މަގުފަހިވާނެކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ ކޮރަޕްޝަން ނައްތާލުމުގައި ޒުވާނުންގެ ދައުރު ބޮޑު ކަމަށެވެ. އެގޮތުން ޒުވާނުންގެ ކިބައިގައި ނަޒާހަތްތެރިކަމާއި ތެދުވެރިކަން އަށަގެންނެވިއްޖެނަމަ، ކޮރަޕްޝަން މަދުކުރެވިދާނެކަމަށް ވަޒީރު ވިދާޅުވިއެވެ.

"އައު އީޖާދުތަކާއި ޓެކްނޮލޮޖީއަކީ ކޮރަޕްޝަނާ ދެކޮޅަށް މަސައްކަތްކުރުމުގައި މުހިންމު އެއްޗެއް. އޮފީސްތަކާއި އިދާރާތަކުގައި ބޭނުންކުރާ ޑިޖިޓަލް ޕްލެޓްފޯމްތަކަކީ ނަޒާހަތްތެރިކަން ކަށަވަރުކުރެވޭނެ ގޮތަށް ހަދާފައި ހުންނަ އެއްޗަކަށްވާނަމަ، ވަރަށް ބޮޑަށް ކޮރަޕްޝަންގެ ޢަމަލުތައް މަދުކުރެވޭނެ." ވަޒީރު ވިދާޅުވިއެވެ.

ވަޒީރު ޢަލީ އިޙްސާން ވަނީ އެންޓި ކޮރަޕްޝަން ކޮމިޝަން، އޭސީސީއާއި ސަޢުދީ ޢަރަބިއްޔާގެ ސަރުކާރާ ގުޅިގެން ރާއްޖޭގައި "ފަތުރުވެރިކަމުގެ ދާއިރާގައި ނަޒާހަތްތެރިކަން އިތުރުކުރުން" މިނަމުގައި ބާއްވާ ބައިނަލްއަޤުވާމީ ފޯރަމަށް އޯއިސީގެ ޤައުމުތަކަށް ދަޢުވަތު ދެއްވާފައެވެ. މި ފޯރަމް އޮންނާނީ އަންނަ އަހަރުގެ މެއިމަހުގެ 6 ވަނަ ދުވަހުން ފެށިގެން 7 ވަނަ ދުވަހާ ހަމައަށެވެ.