ފުރަތަމަ މެޗުގައި އޮސްޓްރޭލިއާ އަތުން އިންޑިއާއަށް ބޮޑު މޮޅެއް

އޮސްޓްރޭލިއާގައި މިހާރު ކުރިއަށްދާ ބޯޑަރ-ގަވަސްކަރް ޓްރޮފީގެ ފުރަތަމަ ޓެސްޓް މެޗުގައި 295 ލަނޑުގެ ތަފާތަކުން އިންޑިއާ މޮޅުވެއްޖެއެވެ.

މިއީ އޮސްޓްރޭލިއާއާ ދެކޮޅަށް އެ ގައުމުގައި އިންޑިއާ އެންމެ ފަހުން ކުޅުނު ނުވަ މެޗުގެ ތެރެއިން މޮޅުވި ފަސްވަނަ މެޗެވެ. އެ ޓީމު ބަލިވީ އެންމެ ދެ މެޗުންނެވެ.

ޕާތު ސްޓޭޑިއަމްގައި ކުޅުނު މި މެޗުގެ ޓޮސް ދިމާވުމުން އިންޑިއާއިން ކުޅެންއަރައި، 49.4 އޯވަރުގެ ތެރޭގައި ހުރިހާ ކުޅުންތެރިން ނުބައިވީ އެންމެ 150 ލަނޑަށެވެ. އިންޑިއާ އިން އެންމެ ރަނގަޅަށް ކުޅުނު ނިތީޝް ކުމާރް ރެޑީ 41 ލަނޑުހެދިއިރު، އެ ޓީމުގެ ވިކެޓްކީޕަރު ބެޓްސްމަން، ރިޝާބް ޕަންތު 37 ލަނޑުހެދިއެވެ.

އޮސްޓްރޭލިއާ އިން އެންމެ ރަނގަޅަށް އުކީ ޖޯޝް ހޭޒަލްވުޑް އެވެ. ޖޯޝް ހޭޒަލްވުޑް ހަތަރު ވިކެޓްނެގިއިރު، މިޗޭލް ސްޓާކް އާއި ޕެޓް ކަމިންސް އަދި މިޗޭލް މާޝް ކުރެން ކޮންމެ ކުޅުންތެރިއަކު ދެ ވިކެޓްނެގިއެވެ.

އޮސްޓްރޭލިއާގެ ފުރަތަމަ އިނިންގްސްގައި ކުޅެން އަރައި، 51.2 އޯވަރުގެ ތެރޭގައި ހުރިހާ ކުޅުންތެރިން ނުބައިވިއިރު ހެދުނީ އެންމެ 104 ލަނޑެވެ. އެ ޓީމުން ކިރިޔާވެސް ރަނގަޅަށް ސްކޯއެއްކުރެވުނީ އުކުންތެރިޔާ، މިޗޭލް ސްޓާކް އާއި ވިކެޓްކީޕަރު ބެޓްސްމަން، އަލެކްސް ކަރޭ އެވެ. މިޗޭލް ސްޓާކް 26 ލަނޑުހެދިއިރު، އަލެކްސް ކަރޭ ވަނީ 21 ލަނޑުހަދައިފައެވެ.

މި އިނިންގްސްގައި އިންޑިއާގެ ކެޕްޓަން، އަދި އުކުންތެރިޔާ، ޖަސްޕްރީތު ބުމްރާ ވަނީ ފަސް ވިކެޓްނަގައިފައެވެ. ދެން އެންމެ ރަނގަޅަށް އުކި ހަރްޝިތު ރާނާ ތިން ވިކެޓްނެގިއިރު، މުޙައްމަދު ސިރާޖް ދެ ވިކެޓްނެގިއެވެ.

އިންޑިއާގެ ދެވަނަ އިނިންގްސްގައި ކުޅެން އަރައި، 134.3 އޯވަރުގެ ތެރޭގައި ހަ ވިކެޓަށް 487 ލަނޑުހަދައި، ޑީކްލެއާ ކުރިއެވެ. އިންޑިއާ އިން އެންމެ ރަނގަޅަށް ކުޅުނީ ސައްތަ ހެދި ޔަޝަސްވީ ޖައިސްވާލް އާއި ކުރީގެ ކެޕްޓަން، ވިރާތު ކޯލީ އެވެ. އޯޕަނިންގ ބެޓްސްމަން، ޔަޝަސްވީ ޖައިސްވާލް 161 ލަނޑުހެދިއިރު، ވިރާތު ކޯލީ ވަނީ ނުބައިނުވެ 100 ލަނޑުހަދައިފައެވެ. ދެން އެންމެ ރަނގަޅަށް ކުޅުނު ކޭއެލް ރާހޫލް 77 ލަނޑުހެދިއެވެ.

އޮސްޓްރޭލިއާގެ އުކުންތެރިންގެ ތެރެއިން، ނޭތަން ލިޔޯން ދެ ވިކެޓްނެގިއިރު، މިޗޭލް ސްޓާކް އާއި ޖޯޝް ހޭޒަލްވުޑްގެ އިތުރުން ޕެޓް ކަމިންސް އަދި މިޗޭލް މާޝް ކުރެން ކޮންމެ ކުޅުންތެރިއަކު ވިކެޓެއްނެގިއެވެ.

ޖަވާބުގައި އޮސްޓްރޭލިއާ އިން ކުޅެން އަރައި، މޮޅުވާން ކަނޑައެޅި ޓާގެޓް ކަމަށްވާ 534 ލަނޑަށް ވާސިލްނުވެވި، ބާކީ އެއްދުވަހުގެ ކުޅުން އޮއްވާ، 58.4 އޯވަރުގެ ތެރޭގައި ހުރިހާ ކުޅުންތެރިން ނުބައިވީ 238 ލަނޑަށެވެ. މި އިނިންގްސްގައި އޮސްޓްރޭލިއާ އަށް އެންމެ ރަނގަޅަށް ކުޅުނު ޓްރޭވިސް ހީޑް 89 ލަނޑުހެދިއިރު، މިޗޭލް މާޝް ވަނީ 47 ލަނޑުހަދައިފައެވެ.

އޮސްޓްރޭލިއާގެ ދެވަނަ އިނިންގްސްގައި އިންޑިއާ އިން އެންމެ ރަނގަޅަށް އުކީ މެޗުގެ މޮޅު ކުޅުންތެރިއަކަށް ހޮވުނު އެ ޓީމުގެ ކެޕްޓަން، ޖަސްޕްރީތު ބުމްރާ އާއި މުޙައްމަދު ސިރާޖް އެވެ. މިއިން ކޮންމެ ކުޅުންތެރިއަކު ތިން ވިކެޓްނެގިއެވެ. އެ ޓީމުގެ ވޮޝިންގޓަން ސުންދަރް ދެ ވިކެޓްނެގިއިރު، ހަރްޝިތު ރާނާ އާއި ނިތިޝް ކުމާރް ރެޑީ ވިކެޓެއްނެގިއެވެ.

މިވަގުތު ޓެސްޓް ރޭންކިންގެ އެއްވަނައިގައި އުޅޭ އިންޑިއާ އަށް ވޯލްޑް ޓެސްޓް ޗެމްޕިއަންޝިޕްގެ ފައިނަލުން ޖާގަ ކަށަވަރުކުރުމަށްޓަކައި، ކުރިއަށް އޮތް ހަތަރު މެޗުގެ ތެރެއިން ތިން މެޗު ކާމިޔާބުކުރަންޖެހެއެވެ. އޮސްޓްރޭލިއާ އިން މި ޓެސްޓް ސީރީޒްގައި ފަސް މެޗާއި، ކުރިއަށް އޮތް ސްރީ ލަންކާ ޓުއާގެ ދެ މެޗުވެސް ކާމިޔާބުކޮށްގެން މެނުވީ ފައިނަލަށް ދެވޭކަށް ނެތެވެ.

މި ދެ ޓީމުގެ ދެމެދުގައި ކުޅުމަށް ހަމަޖެހިފައިވާ ދެވަނަ ޓެސްޓް މެޗު އޮންނާނީ ޑިސެންބަރު ހައެއްގައި އަޑެލައިޑްގައެވެ.