ދެވަނަ ހާފުގައި ކައިރީ އާވިން ދެއްކި މޮޅު ކުޅުމާއެކު ހޯކްސް އަތުން މޭވްރިކްސް މޮޅުވެއްޖެ

އެންބީއޭގައި ކުޅުނު މެޗުގެ ދެވަނަ ހާފުގައި ކައިރީ އާވިން ދެއްކި މޮޅުކުޅުމާއެކު އެޓްލާންޓާ ހޯކްސް އަތުން 119-129 އިން ޑަލާސް މޭވްރިކްސް މޮޅުވެއްޖެއެވެ.

މި މެޗުގައި ޑަލާސްގެ ސާބިއާ ތަރި، ލޫކާ ޑޮންޗިޗް އަނިޔާގެ ސަބަބުން ނުކުޅެއެވެ. މިއީ ޑޮންޗިޗްގެ އަތުގެ ހުޅަށް ލިބިފައިވާ އަނިޔާގެ ސަބަބުން އޭނާ އަށް ގެއްލުނު ތިންވަނަ މެޗެވެ.

ސްޓޭޓް ފާމް އެރީނާގައި ކުޅުނު މި މެޗުގެ ފުރަތަމަ ކުއާޓާ ނިމުނުއިރު ހޯކްސް ލީޑްކުރަމުންދިޔައީ، 31-28 އިންނެވެ. އެއަށްފަހު، ދެން ކުޅެވުނު ދެވަނަ ކުއާޓާގައި 36-33 އިން ހޯދީ ލިޑާއެކު، ހޯކްސް އިން ފުރަތަމަ ހާފު ނިންމާލީ، ހަ ޕޮއިންޓްގެ ލީޑަކާއެކު، 67-61 އިން ކުރީގަ އޮވެގެންނެވެ.

ފުރަތަމަ ދެ ކުއާޓާއާ ހިލާފަށް ދެން ޖެހިގެންއައި ތިންވަނަ ކުއާޓާގައި ޑަލާސް އިން ވަނީ ހަތް ޕޮއިންޓްގެ ލީޑަކާއެކު، 35-28 އިން ކުރިހޯދާފައެވެ. މިއާއެކު، ފުރަތަމަ ތިން ކުއާޓާ އަށް ފަހު 96-95 އިން ޑަލާސް ލީޑްނެގިއެވެ. ދެން އޭގެފަހުން، ކުޅެވުނު ހަތަރުވަނަ ކުއާޓާގައި ވެސް ޑަލާސް 33-24 އިން ކުރިހޯދައި، ދެ ޓީމުގެ ދެމެދުގައި އޮތް ފަރަގު ބޮޑުކޮށް މެޗު ކާމިޔާބުކުރިއެވެ.

މި މެޗުން ޑަލާސް މޮޅުކޮށްދިނުމުގައި މުހިއްމު ދައުރެއް އަދާކުރި ކައިރީ އާވިންގ ވަނީ 32 ޕޮއިންޓާއެކު، ހަތް ރީބައުންޑް ނަގައި، ހަ އެސިސްޓް ހަދާފައެވެ. މީގެތެރެއިން، ކައިރީ އާވިންގ 10 ޕޮއިންޓް އެއްކުރީ، ފުރަތަމަ ހާފުގައެވެ. މިއާއެކު، ކައިރީ އާވިންގ ވަނީ ފަހު ދެ ކުއާޓާގައި މުޅިއެކު 22 ޕޮއިންޓް އެއްކޮށްފައެވެ. އެ ޓީމުން ދެން އެންމެ ރަނގަޅަށް ކުޅުނު ޖޭޑެން ހާޑީ 23 ޕޮއިންޓް އެއްކުރިއިރު، ނާޖީ މާޝަލް އާއި ސްޕެންސާ ޑިންވިޑީ ކުރެން ކޮންމެ ކުޅުންތެރިއަކު 22 ޕޮއިންޓް އެއްކުރިއެވެ.

ހޯކްސް އަށް އެންމެ ގިނަ ޕޮއިންޓް އެއްކޮށްދިނީ ޖޭލެން ޖޯންސަން އެވެ. އޭނާ ވަނީ 28 ޕޮއިންޓާއެކު، 10 ރީބައުންޑް ނަގައިފައެވެ. އެ ޓީމުގެ ޓްރޭ ޔަންގް ވަނީ 18 ޕޮއިންޓާއެކު 16 އެސިސްޓް ހަދާފައެވެ.

މި މުބާރާތުގައި ކުޅުނު އަނެއް މެޗުގައި ގޯލްޑަން ސްޓޭޓް ވޯރިއާސްގެ މައްޗަށް ބްރޫކްލީން ނެޓްސް ވަނީ 120-128 އިން ކުރިހޯދާފައެވެ. ނެޓްސް އިން ވަނީ މި މެޗު ފެށިގެން ކޮންމެ ކުއާޓާއެއްގައި ލީޑް ދަމަހައްޓައިފައެވެ.

ނެޓްސް އަށް މި މެޗު ކާމިޔާބުކޮށްދިނުމުގައި އިސް ދައުރެއް އަދާކުރީ ޖަރުމަނުގެ ޕޮއިންޓްގާޑް، ޑެނިސް ޝްރޯޑާ އެވެ. ޝްރޯޑާ ވަނީ 31 ޕޮއިންޓާއެކު، ފަސް ރީބައުންޑް ނަގައި، ހަތް އެސިސްޓް ހަދާފައެވެ. އެ ޓީމުން ދެން އެންމެ ރަނގަޅަށް ކުޅުނު ކޭމް ތޯމަސް 23 ޕޮއިންޓް އެއްކުރިއިރު، ޒިއާރީ ވިލިއަމްސް 19 ޕޮއިންޓާއެކު 10 ރީބައުންޑް ނެގިއެވެ.

މި މެޗުގައި ވޯރިއާސް އިން އެންމެ ރަނގަޅަށް ކުޅުނު ސްޓެފަން ކަރީ 28 ޕޮއިންޓާއެކު، ހަތަރު ރީބައުންޑް ނަގައި، ހަތް އެސިސްޓް ހެދިއެވެ. ދެން އެންމެ ރަނގަޅަށް ކުޅުނީ އެންޑްރޫ ވިގިންސް އެވެ. އޭނާ ވަނީ 18 ޕޮއިންޓާއެކު، ފަސް ރީބައުންޑް ނަގައި އެއްއެސިސްޓް ހަދާފައެވެ.