ސަރުކާރުގެ 52 ހަފުތާގެ ތެރޭގައި ކުޅިވަރުގެ ދާއިރާއިން އުފާވެރިކަން ގެނެސްދީ، ރަންއަކުރުން ފަވާލެވުނު

ސަރުކާރުގެ ވޭތުވެދިޔަ 52 ހަފުތާގެ ތެރޭގައި ރާއްޖޭގެ ކުޅިވަރުގެ ދާއިރާއިން އުފާވެރިކަން ގެނެސްދީ، ރަންއަކުރުން ފަވާލެވުނު ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ. ވަޒީރު މިހެން ވިދާޅުވީ 52 ހަފުތާގައި ހާސިލުކުރެވުނު ނަތީޖާތަކާ ގުޅޭގޮތުން "ޕީއެސްއެމް ނިއުސް" އިން ގެނެސްދިން ޚާއްސަ ޕްރޮގްރާމުގައި ވާހަކަދައްކަވަމުންނެވެ.

ވަޒީރު ރާފިޢު ވިދާޅުވީ 52 ހަފުތާގެ ތެރޭގައި ހޯދުނު އެންމެ ބޮޑު ކާމިޔާބީ އަކީ އޮލިމްޕިކް ގޭމްސްއަށް ދިވެހި އެތުލީޓަކު ފުރަތަމަ ފަހަރަށް ކޮލިފައިވުމާއި އަދި ރާއްޖޭގައި ފުރަތަމަ ފަހަރަށް ބޭއްވި އޭޝިއަން ސާފިން ޗެމްޕިއަންޝިޕުން ރާއްޖޭގެ ދެ އެތުލީޓަކު، 2026 ވަނަ އަހަރު ޖަޕާނުގައި އޮންނަ އޭޝިއަން ގޭމްސްއަށް ކޮލިފައިވުން ކަމަށެވެ.

"ހަފުތާ 52 އަކީ އަޅުގަނޑުމެންގެ ކުޅިވަރު ވުޒާރާއަށް ވަރަށް ގިނަގުނަ މަސައްކަތްތަކެއް ކުރެވި، ވަރަށް ގިނަ ކާމިޔާބީ އެކުލިވެގިން ދިޔަ އަހަރެއް ކަމަށް އަޅުގަނޑު ގަބޫލުކުރަނީ. އެ ގޮތުން ފާއިތުވެދިޔަ 52 ހަފުތާގެ ތެރޭގައި އަޅުގަނޑުމެންގެ 75 އެތުލީޓުން ބައިނަލްއަގުވާމީ ހަރަކާތްތަކުގައި ވަނީ އެންގޭޖް ކުރެވިފައި." ވަޒީރު ރާފިޢު ވިދާޅުވިއެވެ.

ކުޅިވަރުގެ ދާއިރާއިން ގިނަ މަސައްކަތްތަކެއް ކުރެވުނުކަން ފާހަގަކުރައްވައި ވަޒީރު ވިދާޅުވީ އެ މަސައްކަތުގެ ނަތީޖައެއްގެ ގޮތުން މިވީ ކުރުމުއްދަތުގެ ތެރޭގައި ގިނަގުނަ ކާމިޔާބީތަކެއް ހާސިލުކުރެވިފައިވާ ކަމަށެވެ.

ފާއިތުވެދިޔަ 52 ހަފުތާގެ ތެރޭގައި ރާއްޖޭގައި ބައިނަލްއަގުވާމީ ނުވަ މުބާރާތެއް ބޭއްވުނުއިރު، މި މުބާރާތްތަކުން ރާއްޖެއިން ވަނީ 15 މެޑެލް ހޯދާފައެވެ. އަދި މި މުއްދަތުގެ ތެރޭގައި 10 އިންވިޓޭޝަނަލް މެޗެއްގައި ރާއްޖެއިން ވަނީ ވާދަކޮށްފައެވެ. އަދި ހަމަ އެހެންމެ ބައިނަލްއަގުވާމީ ހަތް ޓްރޭނިންގައި ދިވެހި އެތުލީޓުން ބައިވެރިވިއިރު، މުޅި ޖުމްލަ 55 އިވެންޓެއްގައި ދިވެހި އެތުލީޓުން ވަނީ ވާދަކޮށްފައެވެ. އޭގެތެރޭގައި ވެޓެރެންސް އެތުލީޓުން ވާދަކުރި ބައިނަލްއަގުވާމީ ފަސް އިވެންޓެއްވެސް ފާހަގަކޮށްލެވެއެވެ.