ސައުދީ ޕްރޯ ލީގުގެ ކުލަބު އަލް ހިލާލް، 46 މެޗަށްފަހު ލީގުގައި ފުރަތަމަ ފަހަރަށް ބަލިވެއްޖެއެވެ.
އަލް ހަލީޖް އާއި ދެކޮޅަށް ކުޅުނު މެޗުން އަލް ހިލާލް ބަލިވެފައިވަނީ 3-2 ގެ ނަތީޖާއަކުންނެވެ.
އަލް ހަލީޖުގެ ދަނޑުގައި ކުޅުނު މި މެޗުގެ 12 ވަނަ މިނިޓުގައި އަލް ހިލާލުގެ މާކކޮސް ލިއޮނާޑޯ ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ.
އަދި މެޗުގެ 37 ވަނަ މިނިޓުގައި އަލް ހިލާލުގެ ސާބިޔާގެ އެލެކްޒެންޑަރ މިޓްރޮވިޗް ވަނީ އިތުރު ލަނޑެއް ކާމިޔާބުކޮށް މެޗުގެ ނަތީޖާ 2-0 އަށް ބަދަލުކޮށްފަ އެވެ. މިއީ ސައުދީ ލީގުގައި މިޓްރޮވިޗް ކުޅުނު 11 މެޗުގައި އޭނާ ޖެހި 12 ވަނަ ލަނޑެވެ. ސައުދީ ލީގުގައި އެންމެ ގިނަ ލަނޑު މި ސީޒަނުގައި ޖަހާފައިވަނީވެސް އޭނާ އެވެ.
މެޗުގެ ފުރަތަމަ ހާފުގެ އިތުރުން ވަގުތުގައި އަބްދުالله އަލް ސާލިމް ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ. މި ލަނޑުގެ ކުރިން އަލް ހަލީޖް އަށް ރެފްރީ ޕެނަލްޓީ އެއް ދިން ނަމަވެސް ކޮސްޓަސް ފޯޓޫނިސް ފޮނުވާލި ޕެނަލްޓީ އަލް ހިލާލުގެ ކީޕަރު ޔަސީން ބޯނޯ ވަނީ ދިފާއުކޮށްފަ އެވެ.
ދެވަނަ ހާފުގެ ކުޅުން ފެށުނުތާ ދެވަނަ މިނިޓުގައި އަބްދުالله އަލް ސާލީމް ވަނީ އިތުރު ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފަ އެވެ.
އަދި މި މެޗުގެ އަލް ހަލީޖު މޮޅުވި ލަނޑު މެޗުގެ ފުރިހަމަ ވަގުތު ހަމަވާން ފަސް މިނިޓަށް ވެފައިވަނިކޮށް އެ ޓީމަށް ކާމިޔާބުކޮށްދީފައިވަނީ ފަބިއޯ މާޓިންސް އެވެ.
މި މެޗުން އަލް ހިލާލް ބަލިވި ނަމަވެސް މިހާތަނަށް ކުޅުނު 11 މެޗުން ލިބިފައިވާ 28 ޕޮއިންޓާއެކު އެ ޓީމު އޮތީ ތާވަލުގެ އެއްވަނައިގަ އެވެ. ދެވަނައިގައި އޮތްއަލް އިއްތިހާދަށް 10 މެޗުން 27 ޕޮއިންޓް ލިބިފައިވާއިރު މިއަދު އަލް އިއްތިހާދު ކުޅޭ މެޗުން އެ ޓީމު މޮޅުވެއްޖެނަމަ ތާވަލުގެ އެއްވަނަ އަށް އެ ޓީމު އަރާނެ އެވެ.