އާރުޑީސީގެ މަހެއްގެ ޚަރަދު 20 މިލިޔަން ރުފިޔާއަށްވުރެ ކުޑަވެއްޖެ: ޢަލީ ޒުހައިރު

މިސަރުކާރުން ވެރިކަމާއި ހަވާލުވެ ރޯޑް ޑިވެލޮޕްމަންޓް ކޯޕަރޭޝަން، އާރުޑީސީ ރިފޯމް ކުރުމަށް ކުރި މަސައްކަތުން މަހެއްގެ މައްޗަށް 18 މިލިއަނާއި 20 މިލިއަނާ ދެމެދުގެ އަދަދަކަށް ޚަރަދު ކުޑަކުރެވިފައިވާކަމަށް އާރުޑީސީގެ މެނޭޖިން ޑިރެކްޓަރ ބްރިގޭޑިއަރ ޖެނެރަލް ރިޓަޔަރޑް ޢަލީ ޒުހައިރު ވިދާޅުވެއްޖެއެވެ. އޭނާ މިހެން ވިދާޅުވީ، ޕީއެސްއެމް ނިއުސްއިން ގެނެސްދޭ ހަފްތާ 52 ޕްރޮގްރާމްގައި ވާހަކަދައްކަވަމުންނެވެ.

މިދިޔަ ސަރުކާރުގައި އާރުޑީސީއަކީ ޚަރަދުތައް ވަރަށް ބޮޑަށް އިތުރުވެފައިވާ ކުންފުންޏެކެވެ. އެގޮތުން ކުންފުނީގެ އާމްދަނީއާ ނުބައްދަލު މިންވަރަށް ދިޔައީ ޚަރަދު ކުރަމުންނެވެ.

އާރުޑީސީގެ މަސައްކަތްތަކާ ގުޅޭގޮތުން ވާހަކަދައްކަވަމުން މެނޭޖިންގ ޑިރެކްޓަރ ބްރިގޭޑިއަރ ޖެނެރަލް ރިޓަޔަރޑް ޢަލީ ޒުހައިރު ވިދާޅުވީ، ކުންފުންޏާ ހަވާލުވެ އެންމެ ފުރަތަމަ މަސައްކަތް ފެށީ ކުންފުނި އޮތް ހާލަތުން އެހެން ހާލަތަކަށް ބަދަލުކޮށްލެވޭނެ ގޮތްތަކެއް ހޯދުމަށްކަމަށެވެ. އެގޮތުން ކުންފުނީގެ ބޯޑާއި ޕީސީބީއާއި މަޝްވަރާކުރެވިގެން ކުންފުނި ރިޕޯމް ކުރުމުގެ މަސައްކަތް ފެށިކަމަށް އޭނާ ވިދާޅުވިއެވެ.

ކުންފުނި ރިފޯމް ކުރުމުގެ މަސައްކަތުގެ ދަށުން ކުރި އެންމެ މުހިންމު އެއްކަމަކީ ހިންގުމުގެ ޚަރަދު ކުޑަކުރުންކަމަށާއި އެގޮތުން ކުންފުންޏަށް ތަކެތި ގަންނާނެ ވަކި އަގުތަކެއް ކަނޑައެޅިގެން ދިޔަކަމަށް ވިދާޅުވިއެވެ.

"އެގޮތުން މަސައްކަތްކޮށްގެން އަޅުގަނޑުމެންނަށް ޚަރަދު ވަރަށް ބޮޑުތަނެއް ކުޑަކުރެވުނު. މަހެއްގެ މައްޗަށް ކުރާ ޚަރަދުގެ 18 އާއި 20 މިލިއަނާއި ދެމެދު ޚަރަދު އަޅުގަނޑުމެންނަށް މަހެއްގެ މައްޗަށް ކުޑަކުރެވިގެން ދިޔަ." ބްރިގޭޑިއަރ ޖެނެރަލް ރިޓަޔަރޑް ޢަލީ ޒުހައިރު ވިދާޅުވިއެވެ.

އޭނާ ވިދާޅުވީ، ކުންފުނީގެ ޚަރަދު ކުޑަކުރުމަށް އިތުރު ގަޑި ލިބޭ ގޮތުގެ ކޮންޓްރޯލް މެކޭނިޒަމެއް ކަނޑައެޅިކަމަށެވެ. އަދި އެކުންފުންޏަކީ ރަސްމީކޮށް 6 ދުވަހު މަސައްކަތްކުރާ ކުންފުންޏެއްގެ ގޮތުގައި ބަދަލުކޮށްފައިވާ ކަމަށްވެސް ވިދާޅުވިއެވެ.

އާރުޑީސީގެ އެމްޑީ ވިދާޅުވީ، މިސަރުކާރުން ވެރިކަމާ ހަވާލުވިއިރު ހުއްޓިފައިވާ 17 ޕްރޮޖެކްޓެއް މިހާރު ފަށައިގެން ކުރިއަށްދާކަމަށެވެ. އަދި މީގެއިތުރުން އިތުރު 10 ޕްރޮޖެކްޓެއްގެ މަސައްކަތްވެސް ކުރިއަށްދާކަން އޭނާ ފާހަގަކުރެއްވިއެވެ.