ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއި މޯލްޑިވްސް ސޮކަރ މޭޓްސް (އެމްއެސްއެމް) ގުޅިގެން ބާއްވާ ދިވެހި ޔޫތު ލީގު 2024 ގެ ކުޅުން ފަށައިފިއެވެ.
12 އަހަރުން ދަށާއި، 14 އަހަރުން ދަށާއި، 16 އަހަރުން ދަށުގެ އުމުރުފުރާއަށް ހުޅުވާލައިގެން ބާއްވާ ޔޫތު ލީގުގައި ކޮންމެ އޭޖް ގުރޫޕަކުން ޖުމްލަ އަށް ޓީމު ވާދަކރެއެވެ. މި މުބާރާތް ކުރިޔަށްދަނީ ހެންވޭރު ދަނޑާއި، ހުޅުމާލެ ސްޓޭޑިއަމް އަދި ގަލޮޅު ދަނޑުގައެވެ. އިއްޔެ ފެށި ދިވެހި ޔޫތު ލީގު ކުރިއަށްދާނީ އަންނަ އަހަރުގެ ޖެނުއަރީ މަހުގެ އެއްވަނަ ދުވަހުގެ ނިޔަލަށެވެ.
މި މުބާރާތުގެ ފުރަތަމަ މެޗުގައި 12 އަހަރުން ދަށުގެ ކެޓަގަރީގައި, ޓީސީ ސްޕޯޓްސް ކުލަބު ނުކުތީ ޔުނައިޓެޑް ވިކްޓަރީ (ޔޫވީ) އާ ދެކޮޅަށެވެ. މި މެޗު ޓީސީން ކާމިޔާބުކުރީ 7-0 ގެ ނަތީޖާ އަކުންނެވެ. އަދި 14 އަހަރުން ދަށުގެ ކެޓަގަރީގައި ޓީސީން ޔޫވީގެ މައްޗަށް ކުރިހޯދާފައިވަނީ 6-0 ގެ ނަތީޖާއަކުންނެވެ. މީގެ އިތުރުން ރޭ ކުޅުނު 12 އަހަރުން ދަށުގެ ކެޓަގަރީގެ މެޗުގައި ކުލަބު ވެލެންސިއާ އަތުން ވިކްޓަރީ ސްޕޯޓްސް ކުލަބު މޮޅުވީ 2-0 ގެ ނަތީޖާއަކުންނެވެ. މި މުބާރާތުގައި ރޭ ކުޅުނު ފަހު މެޗުގައި 14 އަހަރުން ދަށުގައި ވިކްޓަރީން ވަނީ ވެލެންސިއާގެ މައްޗަށް 5-1 ގެ ނަތީޖާއަކުން ކުރި ހޯދާފައެވެ.
މި މުބާރާތުގައި ވާދަކުރަނީ ޔޫވީ އާއި، ޓީސީ އާއި، ވެލެންސިއާ އާއި، ވިކްޓަރީ އާއި، ކުލަބު އީގަލްސް އާއި، މާޒިޔާ ސްޕޯޓްސް އެންޑް ރެކްރިއޭޝަނާއި، ސުޕަ ޔުނައިޓެޑް ސްޕޯޓްސް (ސަސް) އަދި ހުއްރިއްޔާ ސްޕޯޓްސް ކުލަބެވެ.