ދުންފަތުގެ ވިޔަފާރި ދެން ކުރެވޭނީ ސިއްޙަތާ ބެހޭ ވުޒާރާއިން ދޫކުރާ ލައިސެންސަކާއެކު!

ދުންފަތް ކޮންޓްރޯލްކުރުމާބެހޭ ޤާނޫނަށް ގެނައި އިސްލާހާއެކު ދުންފަތުގެ ވިޔަފާރިކުރާ ކޮންމެ ފަރާތަކުންވެސް ސަރުކާރުގެ ކަމާބެހޭ އިދާރާއިން ދޫކުރާ ވިޔަފާރިކުރުމުގެ ހުއްދައިގެ އިތުރުން އެޤާނޫނުގެ ދަށުން ސިއްޙަތާ ބެހޭ ވުޒާރާއިން ދޫކުރާ ވަކި ސައްޙަ ލައިސެންސެއް ނަގަންޖެހޭނެކަމަށް ސިއްޙަތާ ބެހޭ ވުޒާރާއިން ވިދާޅުވެއްޖެއެވެ.

މި ލައިސެންސް ދޫކުރުމުގެ މަސައްކަތް ފެށުމަށް ހަމަޖެހިފައިވަނީ މިޤާނޫނުގެ ދަށުން އެކުލަވާލާ ޤަވާއިދުތައް ކުރިއަށް އޮތް 2 މަސްދުވަހުގެ ތެރޭގައި އެކުލަވާލާ ނިމުމުންކަމަށް ސިއްޙަތާ ބެހޭ ވުޒާރާއިން ވިދާޅުވެއެވެ.

ރާއްޖޭގައި ދުންފަތް ކޮންޓްރޯލްކުރުމާބެހޭ ޤާނޫނަށް އިސްލާޙު ގެނެސް ޢަމަލުކުރަން ފަށާފައިވަނީ މިމަހުގެ 15 ވަނަ ދުވަހުގައެވެ. މިޤާނޫނާއެކު ދުންފަތް ކޮންޓްރޯލްކުރުމާ ގުޅޭގޮތުން ބޭނުންވާ މުހިއްމު ޤަވާއިދުތައް އެކުލަވާލުމުގެ މަސައްކަތް ދަނީ ކުރަމުންނެވެ. އެގޮތުން ކުރިއަށް އޮތްތަނުގައި ރާއްޖޭގައި ދުންފަތާއި ގުޅޭ ވިޔަފާރިކުރާ ފަރާތްތަކުން ރާއްޖޭގައި ވިޔަފާރި ކުރުމުގެ ހުއްދައިގެ އިތުރުން، ސިއްޙަތާ ބެހޭ ވުޒާރާއިން ދޫކުރާ ވަކި ސައްޙަ ލައިސެންސެއް އޮންނަންޖެހޭނެކަމަށް ސިއްޙަތާ ބެހޭ ވުޒާރާއިން ވިދާޅުވެއެވެ.

އިޢުލާން: ދުންފަތުގެ ބާވަތްތައް ރާއްޖެއަށް އެތެރެކޮށް ބޭނުންކުރުމާގުޅޭ pic.twitter.com/i7nD1kWBDo

— Ministry of Health (@MoHmv) November 21, 2024

އެވުޒާރާއިން ނެރުއްވި ޢިއުލާނެއްގައި ވިދާޅުވީ، އެގޮތަށް ޤާނޫނުގައި ބަޔާންކޮށްފައިވީނަމަވެސް އެ ހުއްދަތައް އަދި ލައިސެންސް ހޯދުން ލާޒިމްވާނީ ޤާނޫނުގައި ބަޔާންކުރާ ހުއްދަތަކާއި ބެހޭ ގަވާއިދު އެކުލަވާލެވުމުންކަމަށެވެ. އެގޮތުން ރާއްޖެއަށް ދުންފަތް އެތެރެކުރާ ފަރާތްތަކާއި، ދުންފަތުގެ ބާވަތްތައް ރާއްޖެއިން ބޭރުކުރާ ފަރާތްތަކާއި، އަދި ގަނޑުކޮށްގެންނާއި ވަކިވަކިން ވިއްކާ ކޮންމެ ފަރާތަކުންވެސް މި ލައިސެންސް ނަގަންވާނެއެވެ.

މިޤާނޫނުގެ ދަށުން އެކުލަވާލަންޖެހޭ ގަވާއިދުތައް 15 ޖެނުއަރީ 2025ގެ ނިޔަލަށް އެކުލަވާލަންޖެހެއެވެ. އެހެންކަމުން އެމުއްދަތުން ފެށިގެން ރައްޖޭގައި ދުންފަތުގެ ވިޔަފާރިކުރާ ފަރާތްތަކުން ސިއްޙަތާ ބެހޭ ވުޒާރާއިން ދޫކުރާ ލައިސެންސް ނަގަން ލާޒިމުވާނެއެވެ.

ރާއްޖޭގައި ދުންފަތް ކޮންޓްރޯލްކޮށް ދުންފަތުގެ ސަބަބުން ލިބެމުންދާ ސިއްޙީ ގެއްލުން ކުޑަކުރުމަށް ރައީސުލްޖުމްހޫރިއްޔާގެ ޚާއްސަ އިރުޝާދުފުޅާއެކުވަނީ ގިނަ ފިޔަވަޅުތަކެއް އަޅާފައެވެ. އެގޮތުން މިމަހުގެ 15 ވަނަ ދުވަހުން ފެށިގެން ރާއްޖެއަށް ވޭޕް އެތެރެކުރުން މަނާކޮށް، އަންނަ މަހުން ފެށިގެން އެތަކެތި ބޭނުންކުރުން މަނާކުރާގޮތަށް ޤާނޫނުވަނީ އިސްލާޙުކޮށްފައެވެ. ހަމައެއާއެކު ރާއްޖޭގައި ދުންފަތުގެ ވިޔަފާރިކުރެވޭ އެންމެ ހަގު ޢުމުރަކީ 21 އަހަރުކަމަށް މިހާރުވަނީ ކަނޑައަޅާފައެވެ. އަދި ދުންފަތުގެ ބާވަތްތަކާއި ވޭޕްއިން ނަގާ ޑިއުޓީވެސްވަނީ ބޮޑުކޮށްފައެވެ.