މިހާރު ކުރިއަށްދާ ޑޭވިސް ކަޕް ޓެނިސް މުބާރާތުގެ ސެމީ ފައިނަލްގައި ޖަރުމަނާއި ނެދަލަންޑްސް ބައްދަލުކުރަން ޖެހިއްޖެއެވެ.
ޖަރުމަނުން ވަނީ ޑޭވިސް ކަޕްގެ ޗެމްޕިއަންކަން ތިން ފަހަރު ކާމިޔާބުކޮށްފައެވެ. އެ ޓީމުން އެންމެ ފަހުން މި މުބާރާތް ކާމިޔާބުކުރީ 1993 ވަނަ އަހަރުއެވެ.
ޖަރުމަނުން ވަނީ ކުއާޓާ ފައިނަލްގައި ކުޅުނު ދެ މެޗުންވެސް ކެނެޑާގެ މައްޗަށް ކުރިހޯދާފައެވެ. މި މެޗަށް ނިކުތްއިރު ޖަރުމަނުގެ ޓެނިސް ތަރި، އެލެގްޒެންޑާ ޒްވެރޭވް ނުކުޅުނުނަމަވެސް، އެ ޓީމުން ވަނީ ޑަބަލްސް މެޗު ނުކުޅެ، ކާމިޔާބު ހޯދާފައެވެ.
އެގޮތުން، ސިންގަލްސް މެޗުތަކުން ޖަރުމަނުގެ ޑެނިއަލް އަލްޓްމަޔާ އާއި ޔަން-ލެނާޑް ސްޓްރަފް ވަނީ މޮޅުވެފައެވެ. އަލްޓްމަޔާ ވަނީ ސީދާ ދެ ސެޓުން ކެނެޑާގެ ގެބްރިއަލް ޑިއާލޯ އަތުން މޮޅުވެފައެވެ. މި މެޗުގެ ސެޓުތައް އަލްޓްމަޔާ ގެންދިޔައީ 7-6 (7-5)، އަދި 6-4 އިންނެވެ. ސިންގަލްސް އަނެއް މެޗުގައި ޖަރުމަނުގެ ސްޓްރަފް ވަނީ 4-6، އާއި 7-5، އަދި 7-6 (7-5) އިން ޑެނިސް ޝަޕޮވަލޯވް އަތުން މޮޅުވެފައެވެ.
ކެނެޑާ އިން މުބާރާތުގެ ކުއާޓާގައި ވަނީ، ސްޕެއިން ކަޓުވާލުމަށްފަހު ކުރީގެ އެއްވަނަ ޓެނިސް ކުޅުންތެރިޔާ ރަފައެލް ނަޑާލްގެ ކެރިއަރަށް ހިތްދަތި ނިމުމެއް ގެނެސްފައެވެ. ކެނެޑާ އިން މޮޅުވީ 2-1 އިންނެވެ.
މި މުބާރާތުގެ ކުއާޓާގެ އަނެއް ދެ މެޗުގައި އިޓަލީއާ އާޖެންޓީނާ ބައްދަލުކުރާއިރު، އެމެރިކާ ނިކުންނާނީ އޮސްޓްރޭލިއާއާ ދެކޮޅަށެވެ.