ރާއްޖޭގެ އެންމެ ކާމިޔާބު ފުޓްބޯޅަ ކުލަބު، ނިއު ރޭޑިއަންޓް ސްޕޯޓްސް ކުލަބުގެ ޗެއާމަންގެ މަގާމަށް ރީޖަނަލް އެއާޕޯޓްސްގެ މެނޭޖިން ޑިރެކްޓަރު އަޙްމަދު މުބީން އިންތިޚާބުކުރައްވައިފިއެވެ.
ދަރުބާރުގޭގައި ރޭ ކުރިއަށްދިޔަ ނިއު ރޭޑިއަންޓުގެ ކޮންގްރެސްގައި އެ ކުލަބުން ވަނީ ކުރިއަށް އޮތް ތަނުގައި ކުލަބުގެ ހިންގުން ހަވާލުކުރާނެ ހިންގާ ކޮމިޓީއެއް އިންތިޚާބުކޮށްފައެވެ. ނިއު ރޭޑިއަންޓާއެކު ގިނަ ކާމިޔާބީތަކެއް ހޯދި އެ ކުލަބުގެ ލެޖެންޑުންނާއި، ގިނަ އަދަދެއްގެ ސަޕޯޓަރުން މި ކޮންގްރެސްގައި ބައިވެރިވިއިރު، ކޮންގްރެސްއާ ދިމާކޮށް ވަނީ އައު ހިންގާ ކޮމިޓީއަށް ކުރިމަތިލުމަށް ހުޅުވާލާފައެވެ. އެ ގޮތުން ކޮންމެ މަގާމަކަށްވެސް އެއް ބޭފުޅަކު ކުރިމަތިލައްވާފައިވާއިރު، ހިންގާ ކޮމިޓީއަށް މެންބަރުން އިންތިޚާބުކޮށްފައިވަނީ ކޮންގްރެސްގައި ބައިވެރިވި މެންބަރުންގެ ފެންނަ ނުފެންނަ ވޯޓަކުންނެވެ.
ޗެއާމަންގެ މަގާމަށް މުބީން އިންތިޚާބުކުރެއްވިއިރު، ރޭގެ ކޮންގްރެސްއާ ހަމައަށް ދިޔައިރު ނިއު ރޭޑިއަންޓުގައި ހުރީ ވަގުތީ ޗެއާމަނެކެވެ. އެއީ އެންމެ ފަހުގެ ދައުރުގައި އިންތިޚާބުވެވަޑައިގެންނެވި ޗެއާމަން އަޙްމަދު ވާސިފް، ދައުރު މެދުތެރެއިން މަގާމުން އިސްތިއުފާދެއްވުމާ ގުޅިގެންނެވެ.
ނިއު ރޭޑިއަންޓުން ބޭއްވި ކޮންގްރެސްގައި ސީނިއާ ވައިސް ޗެއާމަންގެ މަގާމަށް އިންތިޚާބުކުރައްވާފައިވަނީ ހެންވޭރު ހުޅަނގު ދާއިރާގެ މަޖިލިސް މެންބަރު އަލީ އިބްރާހީމާއި، ވެމްކޯގެ މެނޭޖިން ޑިރެކްޓަރު މުޖުތަބާ ޖަލީލެވެ. އޭގެ އިތުރުން ވައިސް ޗެއާމަނަކަށް އިންތިޚާބުކުރައްވާފައިވަނީ އަލީ ރަޝީދެވެ. އަދި ލީގަލް ކައުންސިލްގެ މަގާމަށް އިންތިޚާބުކުރެއްވީ މާޒިން ހުސެއިން އިބްރާހީމެވެ.
ނިއު ރޭޑިއަންޓުން މިދިޔަ ސީޒަނުގެ ދެވަނަ ޑިވިޝަނުގައި ވާދަކުރިއިރު، އެ ޓީމު ބަލިވީ ސެމީ ފައިނަލުގައި ވާދަވެރި ވިކްޓަރީ ސްޕޯޓްސް ކުލަބު އަތުންނެވެ.