މަސް މާރުކޭޓު ސަރަޙައްދުގައި ޤަވާއިދާ ޚިލާފަށް ވިޔަފާރިކުރަމުންދިޔަ 39 ބިދޭސީން އަތުލައިގެންފި

މާލޭ މަސް މާރުކޭޓު ސަރަޙައްދުގައި ޤަވާއިދާ ޚިލާފަށް ވިޔަފާރިކުރަމުންދިޔަ 39 ބިދޭސީން އަތުލައިގެންފިއެވެ.

މި އެންމެން އަތުލައިގެންފައިވަނީ މޯލްޑިވްސް އިމިގްރޭޝަނުން ދިވެހި ފުލުހުންގެ ޚިދުމަތާގުޅިގެން ކުރިއަށްގެންދިޔަ ޚާއްސަ އޮޕަރޭޝަނެއްގެ ތެރެއިންނެވެ.

މި އޮޕަރޭޝަނާ ގުޅޭގޮތުން ސޯޝަލް މީޑިއާގައި ކުރެއްވި ޕޯސްޓެއްގައި ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަހީދު ވިދާޅުވީ، މި އޮޕަރޭޝަނަކީ މަސް މާރުކޭޓު ސަރަޙައްދުގައި ބިދޭސީން ވިޔަފާރިކޮށް ކޮންޓްރޯލް ކުރަމުންދިޔަ މަސް ބޯޓުތަކާއި ގުޅިގެން ގިނަ ބަޔަކު ކަންބޮޑުވުންފާޅުކޮށްފައިވާތީ ކުރިއަށްގެންދިޔަ އޮޕަރޭޝަނެއް ކަމަށެވެ. އަދި އިމިގްރޭޝަންގެ ޓާސްކު ފޯހުން މިއަދު އެ ސަރަހައްދުގައި އަޅާފައިވާ މަސް ބޯޓުތައް ބަލައި ފާސްކޮށް 39 މީހަކު އިމިގްރޭޝަންގެ ބަންދަށް ގެންގޮސްފައިވާކަމަށް އިމިގްރޭޝަން ކޮންޓްރޯލަރ ވިދާޅުވިއެވެ.

މަސް މާރުކޭޓު ސަރަހައްދުގައި ބިދޭސީން ވިޔަފާރިކޮށް ކޮންޓްރޯލް ކުރަމުންދިއަ މަސް ބޯޓުތަކާއި ގުޅިގެން ގިނަ ބަޔަކު ކަންބޮޑުވުން ފާޅުކޮށްފައިވާތީ ޓާސްކު ފޯހުން ވަނީ މިއަދު މި ސަރަހައްދުގައި އަޅާފައިވާ މަސް ބޯޓުތައް ބަލައި ފާސްކޮށް 39 މީހަކު އިމިގްރޭޝަންގެ ބަންދަށް ގެނެވިފަ.… pic.twitter.com/mFC0UTCCFI

— Mohamed Shamaan Waheed (@ShamaanW) November 18, 2024

ރާއްޖޭގައި ޤަވާއިދާ ޚިލާފަށް އުޅެމުންދާ ބިދޭސީންގެ މައްސަލަ ހައްލުކުރުމަށްޓަކާ ސަރުކާރުން އަންނަނީ ޚާއްސަ މަސައްކަތްތަކެއް ކުރައްވަމުންނެވެ.

ޤަވާއިދާއި ޚިލާފަށް އުޅޭ ބިދޭސީންގެ މައްސަލަ ހައްލުކުރެއްވުމަށް "އިމިގްރޭޝަން ވޮޗް"ގެ ނަމުގައި، ބިދޭސީންނާއި ގުޅޭ މައްސަލަތައް ހުށައެޅުމަށް ޕްލެޓްފޯމެއްވެސް ވަނީ އިމިގްރޭޝަނުން ޤާއިމުކުރައްވާފައެވެ. އަދި ބިދޭސީން އުޅޭ ތަންތަނާއި ވިޔަފާރިތައް ބަލާފާސްކުރުމުގެ އެތައް އޮޕަރޭޝަނަކާއި ރެއިޑްތައްވެސް ވަނީ ކުރިއަށްގެންގޮސްފައެވެ.

މިގޮތުން ކުރެވުނު މަސައްކަތްތަކާއެކު މިދިޔަ އަހަރެއްހާ ދުވަހުގެ ތެރޭގައި ރާއްޖޭގައި ޤަވާއިދާ ޚިލާފަށް އުޅުނު 5000 އަށްވުރެ ގިނަ ބިދޭސީން އެމީހުން ނިސްބަތްވާ ޤައުމުތަކަށް އަނބުރާ ފޮނުވާލެވިފައިވާކަމަށް އިމިގްރޭޝަނުން ވިދާޅުވެއެވެ.