ރައީސްގެ މަސައްކަތްޕުޅާއެކު ބޭރު ދުނިޔޭގައި އިސްދައުރެއް އަދާކުރުމުގެ ފުރުސަތުވަނީ ފަހިވެފައި: ޚާރިޖީ ވަޒީރު

ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކުރައްވަމުން ގެންދަވާ މަސައްކަތްޕުޅުތަކާއެކު ބޭރު ދުނިޔޭގައި ރާއްޖެއިން ތަމްސީލްކުރަމުންދާ ކަންކަމުގައި އިސްދައުރެއް އަދާކުރުމުގެ ފުރުސަތު ރާއްޖެއަށް ފަހިވެފައިވާކަމަށް ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވެއްޖެއެވެ.

ވަޒީރު ޚަލީލް މިހެން ވިދާޅުވީ، ސައުދީ އަރަބިއްޔާގައި ބޭއްވި އަރަބި އިސްލާމީ ޤައުމުތަކުގެ ސަމިޓާއި އަޒަރުބައިޖާނުގައި ބޭއްވި ކޮޕް-29 ސަމިޓުގައި ބައިވެރިވެވަޑައިގަތުމަށް ފަހު، ރާއްޖެ ވަޑައިގެން ޕީއެސްއެމް ނިއުސްއަށް ދެއްވި އިންޓަރވިއުއެއްގައެވެ.

ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވީ، މިދެދަތުރުފުޅުގެ ތެރެއިން ވަރަށް ބޮޑަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ހަރަކާތްތެރިކަން ފާހަގަވެގެން ދިޔަކަމަށެވެ. އެގޮތުން އެމަނިކުފާނުގެ މަސައްކަތްޕުޅުން ރާއްޖޭން ބައިވެރިވާ އެކިކަންކަމުގައި އިސްދައުރެއް އަދާ ކުރުމުގެ ފުރުސަތު ފަހިވެގެން ގޮސްފައިވާ ކަމަށް ވިދާޅުވިއެވެ.

"އެކްޓިވް ކޮށް ވަރަށް ބިޒީކޮށް އުޅުއްވަން ރައީސް ބޭނުންފުޅު ވަނީ، ރާއްޖޭގެ ރައީސުލްޖުމްހޫރިއްޔާގެ ހަރަކާތްތެރިކަމާއެކު، ރާއްޖެއަށް ލީޑް ރޯލެއް ވަރަށް ގިނަ ކަންތައްތަކުގައި ކުޅުމުގެ ފުރުސަތު އިންތިޒާމު ކުރި ފަރާތްތަކުންވަނީ ދެއްވާފައި. މިކަމުގެ ސަބަބުން ޤައުމުތަކާއެކު އޮންނަ ގުޅުން ވަރުގަދަވެ، ރާއްޖެއަށް ގިނަ އެހީތައް ލިބުމުގެ މަގު ތަނަވަސް ވެގެން ދާނެ " ވަޒީރު ޑރ. އަބްދުﷲ ޚަލީލް ވިދާޅުވިއެވެ.

ޚާރީޖީ ވަޒީރު ސައުދިީ އަރަބިއްޔާއަށް ކުރެއްވި ދަތުރުފުޅަކީ، ފަލަސްޠީނުގެ މައްސަލައިގައި އަރަބި-އިސްލާމީ ޤައުމުތަކުން ބޭއްވި ބައްދަލުވުމެއްގައި ބައިވެރިވެވަޑައިގަތުމަށް ކުރެއްވި ދަތުރުފުޅެކެވެ. މި ސަމިޓުގައި ދައުވަތު އެރުވިގެން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ ބައިވެރިވެވަޑައިގެންފައެވެ. އަދި ރާއްޖޭން ވަނީ ފަލަސްޠީނުގެ ހައްގުގައި ވަރަށް ބޮޑަށް ވަކަލާތުކޮށް، ފަލަސްޠީނުގެ ރައްޔިތުންގެ ހައްގުގައި ކުރެވޭ މަސައްކަތް އިތުރަށް ހަރުދަނާ ކުރުމަށް ވަނީ ގޮވާލާފައެވެ.

މިބައްދަލުވުމަށް ފަހު ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ ކޮޕް-29 ސަމިޓުގައި ބައިވެރިވެވަޑައިގަތުމަށް އަޒަރުބައިޖާނަށް ވަޑައިގަންނަވާފައެވެ. މި ދަތުރުފުޅުގެ ތެރެއިން، ބޭރުގެ ގިނަ ގައުމުތަކުގައި ވެރިންނާއި ބައްދަލުވެ ގުޅުންތައް ހަރުދަނާ ކުރުމަށް ފުރުސަތު ލިބިގެން ދިޔަ ކަމަށް ވަޒީރު ވިދާޅުވިއެވެ.

މީގެ އިތުރުން އަޒަރުބައިޖާނަށް ދާ ދިވެހިންނަށް ހިލޭ ވިސާ ހޯދުމުގެ ފުރުތަމަ މަރުހަލާ މަސައްކަތް މިހާރު ފެށި ޑިޕްލޮމެޓި ޕާސްޕޯޓު އޮންނަ ފަރާތްތަކަށް ދަތުރުކުރުމުގެ އިންތިޒާމު ހަމަޖެހިފައިވާކަން ވަޒީރު ފާހަގަކުރެއްވިއެވެ. އަދި ދިވެހި ރައްޔިތުންނަށްވެސް މި އިންތިޒާމު ހަމަޖައްސަވައި ދެއްވުމަށް މަސައްކަތް ކުރައްވާނެ ކަމުގެ ޔަޤީކަން އަޒަރުބައިޖާނުގެ ރައީސް، ރައީސުލްޖުމްހޫރިއްޔާ ޑރ. މުހައްމަދު މުޢިއްޒުއަށް ދެއްވިކަން ވަޒީރު ފާހަގަކުރެއްވިއެވެ.

ނިމިގެން ދިޔަ މި ދެ ސަމިޓުގެ ތެރެއިން ޚާރިޖީ ގުޅުންތައް ވަރުގަދަ ކުރެވި، ޤައުމުތަކާއެކު އޮންނަ ގުޅުން މިހާރަށް ވުރެ ބޮޑަށް ވަރުގަދަ ކުރުމަށް ފުރުސަތު ފަހިވެގެން ދިޔަކަމަށް ޚާރިޖީ ވަޒީރު ޑރ.ޢަބްދުﷲ ޚަލީލު ވިދާޅުވިއެވެ.