ފީފާ ވޯލްޑް ކަޕް ކޮލިފައިންގައި އިންޑޮނޭޝިއާއާ ދެކޮޅަށް އިއްޔެ ކުޅުނު މެޗު 4-0 ގެ ނަތީޖާއަކުން ކާމިޔާބުކޮށް، ވޯލްޑް ކަޕަށް ކޮލިފައިވުމުގެ ފުރުސަތު ޖަޕާނުން ބޮޑުކޮށްފިއެވެ.
2026 ވަނަ އަހަރު ބޭއްވުމަށް ހަމަޖެހިފައިވާ ވޯލްޑް ކަޕް ކޮލިފައިންގެ އޭޝިއާ ބައްރުގެ ތިންވަނަ ބުރުގެ ގްރޫޕް ސީގައި އިއްޔެ ޖަޕާން ޖަކާޓާގައި ކުޅުނު މެޗު ކާމިޔާބު ކުރުމާއެކު އެ ޓީމަށް ވަނީ ގްރޫޕުގެ އެއްވަނަ މަގާމުގައި ހަތް ޕޮއިންޓުގެ ލީޑެއް ލިބިފަ އެވެ.
ގްރޫޕުގައި މިހާތަނަށް ކުޅުނު ފަސް މެޗުން ޖަޕާން އަށް ވަނީ 13 ޕޮއިންޓް ލިބިފަ އެވެ. ދެވަނައިގައި އޮތް އޮސްޓްރޭލިއާ އަށް ފަސް މެޗުން ލިބިފައިވަނީ 6 ޕޮއިންޓެވެ. މި ގްރޫޕުގެ ހިމެނޭ ހަ ޓީމުގެ މެދުގައި ހޯމް އެންޑް އަވޭ އުސޫލުން ކޮންމެ ޓީމަކާއި ދެކޮޅަށް ދެ މެޗު ކުޅުމަށްފަހު އެއްވަނަ އާއި ދެވަނަ އަށް ވޯލްޑްކަޕްގެ ޖާގަ ލިބިގެންދާނެ އެވެ. އަދި ތިންވަނަ ޓީމާއި ހަތަރުވަނަ ޓީމަށް ޖެހޭނީ އިތުރު މެޗުތަކެއް ކުޅުމަށެވެ.
ޖަކާޓާގެ ބަންގްކަރްނޯ ސްޓޭޑިއަމްގައި 88 ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގެ ފުރަތމަ ލަނޑަކީ އިންޑޮނޭޝިއާގެ ހަބްނާ އަތުން ބައިކޮޅަށް ވަދެފައިވާ ލަނޑެކެވެ.
ނަމަވެސް ފުރަތަމަ ހާފުގެ ކުޅުން ނިމެން ހަތަރު މިނިޓަށް ވެފައިވަނިކޮށް މިނަމީނޯ ވަނީ އިތުރު ލަނޑެއް ކާމިޔާބުކޮށް ދެޓީމުގެ ދެމެދުގައިވާ ފަރަގު ބޮޑުކޮށްފަ އެވެ.
މި މެޗުގައި ޖަޕާނުން ޖެހި ތިންވަނަ ލަނޑާއި ހަތަރުވަނަ ލަނޑަކީ ދެވަނަ ހާފުގައި މޮރީޓާ އާއި ސުގަވާރާ ކާމިޔާބުކޮށްފައިވާ ދެ ލަނޑެވެ.
ވޯލްޑްކަޕް ކޮލިފައިންގައި އިއްޔެ ކުޅުނު އެހެން މެޗުތަކަށް ބަލާއިރު ފަލަސްތީން އަތުން 1-0 ގެ ނަތީޖާއަކުން އޮމާން ވަނީ މޮޅުވެފަ އެވެ. އަދި 3-2 ގެ ނަތީޖާއަކުން އުޒްބެކިސްތާން އަތުން ގަތަރު މޮޅުވެފައިވާއިރު އިރާގާއި ޖޯޑަން ކުޅުނު މެޗު ނިމިފައިވަނީ ލަނޑެއް ނުޖެހި ދެ ޓީމު އެއްވަރު ވެގެންނެވެ.