ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ކުރިއަށްގެންދާ އިންޓަރ އޮފީސް/ކޮމްޕެނީ ވޮލީބޯލް ޗެލެންޖް ކަޕް 2024 ގެ އަންހެން ޑިވިޝަނުގެ ޗެމްޕިއަންކަން ވޭސްޓް މެނޭޖުމަންޓް ކޯޕަރޭޝަން ލިމިޓެޑް (ވެމްކޯ) އިން ހޯދައިފިއެވެ.
މި ފަހަރުގެ އޮފީސް/ކޮމްޕެނީ ވޮލީބޯލް ޗެލެންޖް ކަޕުގެ އަންހެން ބައިގައި ހަތަރު ޓީމެއް ވަނީ ވާދަކޮށްފައެވެ. އެއީ ވެމްކޯގެ އިތުރުން މޯލްޑިވްސް ޕޮލިސް ސަރވިސް އާއި، މޯލްޑިވްސް އިމިގްރޭޝަން އަދި ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އެވެ.
ހުޅުމާލޭ އެޗްޑީސީ ޕާކް ވޮލީ ކޯޓުގައި ކުރިއަށްދާ މި މުބާރާތުގެ އަންހެން ބައިގެ ޗެމްޕިއަންކަން ވެމްކޯއިން ހޯދީ ރޭ ކުޅުނު ފައިނަލް މެޗުގައި ޕޮލިސް އަތުން ފަހަތުން އަރައި ތިން ސެޓު އެއް ސެޓުން މޮޅުވެގެންނެވެ.
ފޯރިގަދަ ކުޅުމެއް ފެނިގެންދިޔަ މި މެޗުގެ ފުރަތަމަ ސެޓު 25-17 އިން ކާމިޔާބުކޮށްފައިވަނީ ޕޮލިހުންނެވެ. އެކަމަކު ވެމްކޯއިން ވަނީ ކުޅުން ރަނގަޅުކޮށް، އަނެއް ތިން ސެޓު ކާމިޔާބުކޮށްފައެވެ. މި ސެޓުތައް ވެމްކޯއިން ގެންދިޔައީ 25-17، 25-21 އަދި 25-21 އިންނެވެ. މި މެޗުގެ މޮޅު ކުޅުންތެރިއަކީ ވެމްކޯގެ ސެޓަރު ފާތިމަތު ޖޫޒާން ޒަރީރެވެ.
މި މުބާރާތުގެ އެންމެ މޮޅު އައުޓްސައިޑް އެޓޭކަރުންނަށް ހޮވުނީ ވެމްކޯގެ އައިޝަތު މާޖިދާ އާއި ޕޮލިހުގެ ހައްވާ ރާޝިދާއެވެ. އަދި އެންމެ މޮޅު މިޑްލް ބްލޮކަރުންނަށް ހޮވިފައިވަނީ އިމިގްރޭޝަނުގެ ނަރީމާ އިދުރީހާއި ޕޮލިހުގެ މަރިޔަމް އަޒުމާއެވެ. މުބާރާތުގެ އެންމެ މޮޅު އޮޕޮސިޓް ކުޅުންތެރިޔާގެ މަގާމު ޕޮލިހުގެ އާމިނަތު އަރޫޝާ ހޯދިއިރު، އެންމެ މޮޅު ސެޓަރަކީ ވެމްކޯގެ ޖޫޒާންއެވެ. އަދި އެންމެ މޮޅު ލިބަރޯގެ މަގާމު ހޯދީ ވެމްކޯގެ ނުހާ ވަހީދެވެ. މުޅި މުބާރާތުގެ އެންމެ މޮޅު ކުޅުންތެރިޔާގެ މަގާމު ވެމްކޯގެ މާޖިދާ ހޯދިއިރު، އެންމެ މޮޅު ކޯޗަކަށް ހޮވުނީ ވެމްކޯގެ ކޯޗު އަޙްމަދު އަދީލެވެ.
އޮފީސް/ކޮމްޕެނީ ވޮލީބޯލް ޗެލެންޖް ކަޕުގެ އަންހެން ޑިވިޝަނުގެ ކުޅުން ނިމުނުއިރު، ފިރިހެން ޑިވިޝަނުގެ ފައިނަލް މެޗު މާދަމާރޭ ކުޅުމަށް ވަނީ ތާވަލުކޮށްފައެވެ.