"ރައީސްގެ ސީދާ ބެއްލެވުމުގެ ދަށުން ޞިއްޙީ ދާއިރާގެ ތަރައްްޤީއަށް ގިނަ މަސައްކަތްތަކެއް ކުރެވޭ"

ރާއްޖޭގެ ޞިއްޙީ ދާއިރާއަށް ކުރިއެރުމާއި ތަރައްްޤީ އަންނަމުންދަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކަމަށް ދެއްވާ ހާއްސަ އަހަމިއްުޔަތުކަންކަމަށް މާލޭ ގުރޫޕް އޮފް ހޮސްޕިޓަލްގެ ސީއީއޯ އިބްރާހިމް ޢަބްދުއްރައްޒާޤު ޙަލީމް ވިދާޅުވެއްޖެއެވެ.

މާލޭ ގުރޫޕް އޮފް ހޮސްޕިޓަލްގެ ސީއީއޯ މިހެން ވިދާޅުވީ ޓަރޝަރީ ފެންވަރަށް ތަރައްޤީކުރުމަށް ދަރުމަވަންތަ ހޮސްޕިޓަލް ރަސްމީކޮށް ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.

ޓަރޝަރީ ހޮސްޕިޓަލެއްގެ ގޮތުގައި ދަރުމަވަންތަ ހޮސްޕިޓަލް ރަސްމީކޮށް ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން މާލޭ ގުރޫޕް އޮފް ހޮސްޕިޓަލްގެ ޗީފް އެގްޒެކެޓިވް އޮފިސަރ އިބްރާހިމް ޢަބްދުއްރައްޒާޤު ޙަލީމް ވިދާޅުވީ، ޕީޕީއެމްގެ ސަރުކާރުގައި ދަރުމަވަންތަ ހޮސްޕިޓަލްގެ ބޮޑުބައި ނިމިފައިވީ ނަމަވެސް، މިދިޔަ އެމްޑީޕީގެ ސަރުކާރުގައި އެ ހޮސްޕިޓަލަށް ވަރަށް ބޮޑަށް އިހުމާލުވެފައިވާ ކަމަށެވެ. އެގޮތުން 25 ފަންގިފިލާއަށް ތަރައްޤީކޮށްފައިވާ ހޮސްޕިޓަލްގެ ބައެއް ފަންގިފިލާތައް މިހާތަނަށް އައިރު ބޭނުންކޮށްފައިނުވާކަން ސީއީއޯ ފާހަގަކުރެއްވިއެވެ.

ޢަބްދުއްރައްޒާޤު ޙަލީމް ވިދާޅުވީ ހޮސްޕިޓަލްގައި ހުރި ބައެއް އަގުބޮޑު ވަޞީލަތްތައްވެސް ހުރީ މަރާމާތު ނުކުރުމުގެ ސަބަބުން ހަލާކުވެފައި ކަމަށެވެ. އަދި ހޮސްޕިޓަލްގެ ފިނި ހޫނުމިން ބަލަހައްޓާ ނިޒާމަށްވެސް ބޮޑެތި ގެއްލުންތަކެއްވެފައިވާކަން ޢަބްދުއްރައްޒާޤު ޙަލީމް ފާހަގަކުރެއްވިއެވެ.

"އަގު ބޮޑު އެތައް ވަޞީލަތްތަކެއް ބޭނުންނުކޮށް މިދިޔަ ސަރުކާރުން ހުރީ ގުދަންކޮށްފައި. ދަރުމަވަންތަ ހޮސްޕިޓަލުގެ ހައިބްރިޑް ކެތްލެބް ހުރީ މަރާމާތު ނުކޮށް، ބޭނުންނުކުރެވޭ ހާލަތުގައި." ޢަބްދުއްރައްޒާޤް ވިދާޅުވިއެވެ.

ޢަބްދުއްރައްޒާޤު ޙަލީމް ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތުމަށްފަހު ދަރުމަވަންތަ ހޮސްޕިޓަލް މަރާމާތުކޮށް އެތަނަކީ ދިވެހި ޞިއްޙީ ދާއިރާގެ މައި ހޮސްޕިޓަލުކަމުގައި ހެއްދެވުމުގެ މަސައްކަތް ފެއްޓެވިކަމަށެވެ. އެގޮތުން އެތަނުގައި ހުރި ގިނަ މައްސަލަތަކެއް ހައްލުކޮށް، މަރާމާތުކުރަންޖެހޭ ވަޞީލަތްތައް މަރާމާތުކުރުމުގެ އިތުރުން ޒަމާނީ ވަޞީލަތްތައް ހޯދައި، ޒަމާނީ އެތައް ޚިދުމަތެއް މިހާރު ލިބިގެންދާނޭކަމަށް ޢަބްދުއްރައްޒާޤު ޙަލީމް ވިދާޅުވިއެވެ.

ޢަބްދުއްރައްޒާޤު ޙަލީމް ވިދާޅުވީ މިދިޔަ ސަރުކާރުން ދޫކޮށްލާފައި އޮތް 5 ފަންގިފިލާއެއް މަރާމާތުކޮށް، އެތަނުގެ ބޭނުން އެންމެ ރަނގަޅުގޮތުގައި މިހާރު ހިފަން ފަށާފައިވާ ކަމަށެވެ.

"17 ވަނަ ފަންގިފިލާގގައި 6 ޑެލިވަރީ ސޫޓާއި 10 އެނދުގެ އެންއައިސީޔޫ ވަނީ ޤާއިމްކޮށްފައި. 18 އަދި 19 ވަނަ ފަންގިފިލާގައި ބަލިމީހުން އެޑްމިތްކުރާނެ 14 ކޮޓަރި ޤާއިމްކޮށްފައި ވަނީ. 21 ވަނަ ފަނގިފިލާ އިދާރީ ކަންކަމަށާ ޚާއްސަ ކޮށްފައިވާއިރު، ނެޝަނަލް ފަރޓިލިޓީ ސެންޓަރ 22 ވަނަ ފަންގިފިލާގައި ވަނީ ޤާއިމްކޮށްފައި." ސީއީއޯ ވިދާޅުވިއެވެ.

ޢަބްދުއްރައްޒާޤު ޙަލީމް ދެއްކެވި ވާހަކަފުޅުގައި ޞިއްޙީ ދާއިރާއާމެދު ރައީސް މުޢިއްޒު ގެންގުޅުއްވަނީ އުންމީދީ ތަޞައްވުރެއްކަމަށާއި ރަނގަޅު ޞިއްހީ ނިޒާމެއް ޤާއިމްކުރަން އެމަނިކުފާނު ޚާއްސަ އިސްކަމެއްދެއްވާކަން ފާހަަގަކުރެއްވިއެވެ. އަދި ރާއްޖޭގައި ދަރިމައިވުމުގެ މައްސަލަ ދިމާވާ މީހުންނަށް ފަރުވާކުރެވޭނެ ޒަމާނީ ފެންވަރުގެ ފާޓިލިޓީ ސެންޓަރެއް ޤާއިމްކުރުމަކީ ރައީސުލްޖުމްހޫރިއްޔާގެ ވަޢުދެއްކަމަށާއި އެ ވަޢުދު މިއަދު ހަޤީޤަތަކަށްވެއްޖެކަމަށް ޢަބްދުއްރައްޒާޤު ވިދާޅުވިއެވެ.