ތަޢުލީމާއި ވަޒީފާގެ ފުރުސަތުތަކުގެ މައުލޫމާތު ފޯރުކޮށްދިނުމަށް "ދާލަން" އެކްސްޕޯ ފަށައިފި

މަތީ ތަޢުލީމާއި ވަޒީފާގެ ފުރުސަތުތަކާއި ގުޅޭ މައުލޫމާތު ފޯރުކޮށްދިނުމަށް ބާއްވާ ދާލަން އެކްސްޕޯ ފަށައިފިއެވެ.

"ދާލަން: ދި ނެޝަނަލް ސްކިލްސް އެންޑް ކެރިއަރ އެކްސްޕޯ" ކުރިއަށްދަނީ މިމަހުގެ 15 އިން 16 އަށެވެ.

ދާލަން އެކްސްޕޯ ހުޅުވައިދެއްވީ މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވަޒީރު ޑރ. މަރިޔަމް މާރިޔާއާއި ދިވެހިބަހާއި ސަގާފަތާއި ތަރިކައާބެހޭ ވަޒީރު އާދަމް ނަޞީރު އިބްރާހިމާއި ދަނޑުވެރިކަމާއި ދިރޭތަކެއްޗާބެހޭ ވަޒީރު ޑރ. ޢައިޝަތު ރަމީލާގެ އިތުރުން ޕްރިންސިޕަލް ސެކެޓްރީ ޓު ދި ޕްރެޒިޑެންޓް އޮން ކޯޕަރޭޓް ޑިވަލޮޕްމެންޓް މުޙައްމަދު ޝާހިދެވެ.

މި އެކްސްޕޯގައި ސަރުކާރު އޮފީސްތަކާއި ކުންފުނިތަކާއި މަތީ ތަޢުލީމުދޭ މަރުކަޒުތަކާއި ކޮލެޖު ޔުނިވަރސިޓީތަކުގެ ސްޓޯލްތައް ވަނީ ބަހައްޓާފައެވެ. މި ސްޓޯލްތަކުން އެތަނެއްގައި ހުރި ވަޒީފާގެ ފުރުޞަތުތަކާއި ކުރިއަށްދެވިދާނެ ދާއިރާތަކާއި ގުޅޭގޮތުން މަޢުލޫމާތު ފޯރުކޮށްދެއެވެ. އަދި މަތީ ތަޢުލީމުދޭ މަރުކަޒުތަކުގެ ސްޓޯލްތަކުން އެތަންތަނުން ކުރިއަށްގެންދާ ކޯސްތަކާ ބެހޭގޮތުން މައުލޫމާތު ފޯރުކޮށްދެއެވެ.

"ވަޒީފާ ހޯދަން އަންނަ ފަރާތްތަކާ ސުވާލުކޮށްގެން އެ ފަރާތްތަކަށް އެންމެ ކަމުދާ ވަޒީފާއަކީ ކޮބައިކަން އެބަ ބުނެދެން. އަދި ސީވީއެއް ހަދާފައި އޮވެއްޖަނަމަ، އޭތި އިތުރަށް ފުރިހަމަކުރާޏެ ގޮތް މި ސްޓޯލުން އެބަ ކިޔައިދެން." ނެޝަނަލް ކެރިއަރ ސަރވިސްގެ ސްޓޯލުން ބުންޏެވެ.

ދާލަން އެކްސްޕޯގައި ޕަބްލިކް ސަރވިސް މީޑިޔާ ޕީއެސްއެމްގެ ސްޓޯލެއްވެސް ވަނީ ބަހައްޓާފައެވެ. މި ސްޓޯލްގައި ޕީއެސްއެމްގައި ހުރި ވަޒީފާގެ ފުރުޞަތުތަކުގެ މައުލޫމާތު ދިނުމުގެ އިތުރުން ޚަބަރު ކިޔުން ތަޖުރިބާކުރެވޭގޮތަށް ކުޑަ ސްޓޫޑިއޯއެއްވެސް ވަނީ ބަހައްޓާފައެވެ.

"ވަޒީފާގެ ފުރުޞަތުތައް އެބަހުރި ސީއެފްއޯއިން ފެށިގެން އެސިސްޓެންޓް އޮފިސަރުގެ މަޤާމާ ހަމައަށްވެސް. އަޅުގަނޑުމެން އެބަ ކުރިއަށްގެންދަން އިންޓާންޝިޕުތަކެއްވެސް. އޭގެ ބޭނުމަކީ ޓެކްނިކަލް އެކި ދާއިރާތަކުން ޒުވާން ކުދިންނަށް ތަޖުރިބާ ހޯދައިދިނުން." ޕީއެސްއެމްގެ ހިއުމަން ޑިރެކްޓަރ ހިއުމަން ރިސަސް މުހައްމަދު ޖިނާހު ވިދާޅުވިއެވެ.

އެކްސްޕޯއަށް ޒިޔާރަތްކުރި ބައެއް ފަރާތްތަކުން ވަނީ މިފަދަ އެކްސްޕޯއެއްގެ މުހިއްމުކަމާއި ގުޅޭގޮތުން ޕީއެސްއެމް ނިއުސްއާ ވާހަކަދައްކާފަވެއެވެ.

"މިތަނުން ލިބިއްޖެ ވަރަށް ރަނގަޅު ވަޒީފާތަކާ ބެހޭ މަޢުލޫމާތު. މިކަހަލަ އެކްސްޕޯތައް ގިނައިން ބޭއްވުމަށް އެދެނީ." މީހަކު ބުންޏެވެ.

ދާލަން އެކްސްޕޯގައި 45 ސްޓޯލް ހުންނާނެކަމަށް މަތީ ތަޢުލީމާބެހޭ ވުޒާރާއިން ވިދާޅުވެއެވެ. އަދި އެކްސްޕޯއަށް ޒިޔާރަތްކުރާ މީހުންގެ މެދުގައި ނަގާ ގުރުއަތުން ހޮވޭ 5 މީހަކަށް ސްކޮލަރޝިޕްގެ ފުރުސަތު ލިބުގެންދާނެކަމަށް މަތީ ތަޢުލީމާބެހޭ ވުޒާރާގެ މައުލުމާތު ދެއްވައެވެ.