އިޖުތިމާޢީ ރައްކާތެރިކަމުގެ ނިޒާމު ނަހަމަގޮތުގައި ބޭނުންކުރޭ، ބޭސްފަރުވާއަށް ސަލާންޖަހާތަން ބަލަން ތިބެވޭކަށް ނެތް: ހީނާ

އިޖްތިމާޢީ ރައްކާތެރިކަމުގެ ނިޒާމު ނަހަމަގޮތުގައި ބައެއް ފަރާތްތަކުން ބޭނުންކުރާއިރު، ބޭސްފަރުވާއަށް ސަލާންޖަހާތަން ބަލަން ތިބެވެން ނެތްކަމަށް އެންސްޕާގެ ސީއީއޯ ހީނާ ވަލީދު ވިދާޅުވެއްޖެއެވެ.

ސަރުކާރުން ވަނީ އިޖުތިމާޢީ ރައްކާތެރިކަމުގެ ނިޒާމަށް ގެންނަ އިސްލާހުގައި އާސަންދައިގެ ނިޒާމަށް ހެޔޮ ބަދަލުތަކެއް ގެނައުމަށްވެސް ނިންމަވާފައެވެ.

ބޭސްފަރުވާގެ ޚިދުމަތަށް ރައްޔިތުން ސަލާންޖަހަންޖެހޭ ވާހަކައަކީ އަބަދުވެސް ރައްޔިތުން ދައްކަމުންދާ ވާހަކައެކެވެ. މިވޭތުވެދިޔަ ހުރިހާ ސަރުކާރުތަކުންވެސް އިގުތިމާއީ ރައްކާތެރިކަމުގެ ނިޒާމު ބޭނުންކޮށްފައިވަނީ ސިޔާސީ މަޤްސަދު ހާސިލް ކުރުމަށް ކަމަށް ބުނާ އަޑުވެސް އިވެއެވެ.

އެއް އިންތިޚާބުން އަނެއް އިންތިޚާބަށް ކެންޑިޑޭޓުން ވަމުންދިޔަ ވައުދުތަކުގެ ނަތީޖާއަކަށްވީ ނަހަމަ ގޮތުގައި ދައުލަތުގެ ފައިސާ ބޭނުންކުރުމަށް ދޮރުތަކެއް ހުޅުވިގެން ދިއުމެވެ. ދައުލަތުގެ ބަޖެޓުން ބޭސްފަރުވާ އަށް ކުރެވޭ ހޭދަ ބިލިއަނުން އިތުރު ވެފައިވީ ނަމަވެސް ބޭސް ފަރުވާއަށް ސަލާންޖަހަން ޖެހުން ހުއްޓުމަކަށް ނައުމެވެ. ރައްޔިތަކަށް ބޮޑު ކަމެއް ދިމާވާހިނދު އެކި ދިމަދިމާލުން ފަންޑް ރެއިޒްކޮށް އެހީ ހޯދުން ނިމުމަކަށް ނައުމެވެ.

އެންސްޕާގެ ސީއީއޯ ހީނާ ވަލީދު ޕީއެސްއެމްއަށް މައުލޫމާތު ދެއްވަމުން ވިދާޅުވީ އިޖްތިމާޢީ ރައްކާތެރިކަމުގެ ނިޒާމު ހަމަމަގަށް ގެނައުމަށް ސަރުކާރުން ގިނަ މަސައްކަތްތަކެއް ކުރައްވަމުންދާކަމަށާއި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް ދިވެހި ރައްޔިތުން ވޯޓު ދިނީ ބޮއްސުންލާފައިވާ މިފަދަ އެތައް ކަމެއް ހަމަމަގަށް އެޅުވުމަށްކަމަށެވެ.

"ރައީސްއަށް ރައްޔިތުން ވޯޓުދިނީ ކަންކަން ޙައްލުކުރަން. އެމަނިކުފާނާ ހަވާލުވީ ފުނޑިފައި ބޮއްސުންލާފައި އޮތް ޤައުމެއް. އެހެންނަމަވެސް ވޭތުވެދިޔަ އެތައް ސަރުކާރަކުން އަތްލާން ނުކެރިފައިހުރި އެތައް ކަމެއް ވަރަށް ވަރުގަދަ ޢަޒުމަކާއެކު ހަމަމަގަށް އަޅުވަން އެމަނިކުފާނު މަސައްކަތް ކުރައްވަމުން އެގެންދަވަނީ. ސިޔާސީ ގޮތުން އެއީ އެހާ ފަސޭހަ ކަމެއްނޫން" ހީނާ ވިދާޅުވިއެވެ.

2025ވަނަ އަހަރަށް ލަފާކުރާ ދައުލަތުގެ ބަޖެޓުގައި ކަނޑައެޅިފައިވާ މައިގަނޑު ރިފޯމްތަކުގެ ތެރޭގައި އެންމެ ބޭނުންކެހިފައިވާ ފަރާތްތަކަށް ޢަމަޒުކޮށް އާސަންދަ އަދި އެންސްޕާއަށް ގެންނަ ބޮޑެތި އިސްލާހުތައް ހިމެނެއެވެ. މިއީ އިޖްތިމާޢީ ރައްކާތެރިކަމުގެ ނިޒާމާ ފުށުއަރާގޮތަށް ބައްޓަންވަމުން އައިސް، ބޮއްސުންލާފައިވާ މި ނިޒާމު ހަމަ މަގަށް އެޅުވުމަށް ގެންނަން ކަނޑައެޅި ބަދަލެކެވެ.

އިޖްތިމާޢީ ޢަދާލަތު ރައްކާތެރިކޮށް ރައްޔިތުންގެ ސިއްޙީ ދުޅަހެޔޮކަން ކަށަވަރުކުރެވި، މިހާތަނަށް ކުރަމުންއައި ބޮޑެތި އިސްރާފު ނައްތާލުމަށް އަމާޒު ހިފާފައިވާ ބަޖެޓެކެވެ.

"ޙަޤީޤަތުގައި މިހާރުވެސް އެހީތެރިކަން މިލިބެނީ ވަރަށް އުނދަގުލުން. އެކި މީހުންނާ ނުގުޅާ އެހީ ނުލިބޭ ވާހަކަ އެއީ އަބަދުވެސް ދައްކަމުންދާ ވާހަކައެއް. މީހަކަށް ނުގުޅާވެސް، އެކަން ވާންޖެހޭ. މިނޫން ޒަމާނެއް ރާއްޖެއިން ފެނިފައެއްނެތް. އެކަމަކު އެމާޒީ ނިމުމަކަށް ގެންނަންޖެހޭ" އެންސްޕާގެ ސީއީއޯ ވިދާޅުވިއެވެ.

ވޭތުވެދިޔަ ދުވަސްތަކުގައި މިކަންކަން ހިނގަމުން އައިސްފައިވާ ގޮތުން ރައްޔިތުން މިނިޒާމަށް އިތުބާރު ނުކުރާކަން ހީނާ ފާހަގަކުރެއްވިއެވެ. އަދި މިކަންކަން ހަމަމަގަށް އެޅުވުމަށް ކުރާ މަސައްކަތުން އޭގެ ނަތީޖާ ފެނުމުން އެ އިތުބާރާ ޔަގީންކަން، އެ ހިތްހަމަޖެހުން ލިބެން ފަށާނެކަމަށްވެސް ހީނާ ވިދާޅުވިއެވެ.

"ސިޔާސީ މަންފާއަށްވެސް މިނިޒާމުގެ ބޭނުންކޮށްފައި އެބަހުރި ނާޖާއިޒް ގޮތުގައި. އަޅުގަނޑުމެންނަށް ފެނުނު އާސަންދަ އެންސްޕާގެ ޑެސްކްތައް ޖަހައިގެން ކޮމަންޑޫ ދާއިރާގެ އިންތިޚާބާ ދިމާކޮށް އިސްވެރިންނާއި އެމްޕީން ތިބިތަން. އަޅުގަނޑުމެން އައިސް ބަލާލީމަ އެބަ އެނގޭ ރިޔާސީ އިންތިޚާބާ ދިމާކޮށް ކޮސްމެޓިކް ސަރޖަރީ ނުވަތަ ރީތިވުމަށް ހަދާ ސަރޖަރީ ހަދަން (އާސަންދަ ސްކީމުން ކަވަރު ނުކުރާ) އާސަންދަ ދީފަ ހުރިކަން. މިފަދަ ގިނަ ކަންކަން އެބަހުރި. އެހާވެސް އިތުބާރު ގެއްލިފަ އޮތް ނިޒާމެއްގެ ވާހަކަ މިދައްކަނީ." އެންސްޕާގެ ސީއީއޯ ހީނާ ވަލީދު ވިދާޅުވިއެވެ.

ޒަމާނުއްސުރެ ކަންކަން ހިނގަމުން އައި ގޮތުން ރައްޔިތުންތިބީ މާޔޫސްވެފައި ކަމަށާއި މިގެނެވެނީ ހެޔޮ ބަދަލުތަކެއްކަން ބަލައިގަންނަން ރައްޔިތުންނަށް ވަގުތު ނަގާނެކަމަށްވެސް ހީނާ ވަނީ ވިދާޅުވެފައެވެ.
އާސަންދަ ހަމަމަގަށް އެޅުވުމަށް މުއްސަނދިންގެ އަތުން މި ސްކީމަށް ހޭދަ ކުރަންޖެހޭ ކަމަށާއި ދުނިޔޭގެ އެހެން ޤައުމުތަކުގައިވެސް މި ނިޒާމު އޮންނަނީ އެހެންކަމަށް ހީނާ ވިދާޅުވިއެވެ.

"އެންމެ މަތިން އާމްދަނީ ލިބޭ ފަރާތްތަކުގެ އަތުން މިނިޒާމަށް ކޮންޓްރިބިއުޓް ނުކުރާންވީ ކީއްވެތޯ؟ 60000 އިން މަތިން އާމްދަނީ ލިބޭ މުއްސަނދިން އަތުން ކޮންޓްރިބިއުޝަންއެއް ނެގީމާ މުޅި ނިޒާމު ޕްރޮގްރެސް ކުރެވި ބޭސް ފަރުވާއަށް އެހީ ބޭނުންވާ މީހާއަށް މާލީ ބުރަ އުފުލަން ނުޖެހޭނެކަން ކަށަވަރު ކުރެވޭނެ" ހީނާ ވިދާޅުވިއެވެ.

ހީނާ ވިދާޅުވީ ނަހަމަ ގޮތުގައި އިޖްތިމާޢީ ރައްކާތެރި ކަމުގެ ނިޒާމު ބޭނުން ކުރަމުންދާއިރު ޙަޤީޤަތުގައިވެސް ބޭސް ފަރުވާ އަށް ސަލާންޖަހަން ޖެހުން ނިމުމަކަށް އަންނަން ޖެހޭ ކަމަށެވެ.

މިއަހަރު ނިމޭއިރު އާސަންދައިގެ ތެރެއިން ކުރާ ޚަރަދު 2.2 ބިލިޔަން ރުފިޔާއަށް އިތުރުވާނެކަމަށް ބެލެވެއެވެ. އާސަންދަ ސްކީމްގެ ދަށުން ކުރެވޭ ޚަރަދު ފާއިތުވި 5 އަހަރުގެ ތެރޭގައިވަނީ އެވްރެޖްކޮށް 9.2 އިންސައްތަ އިތުރުވެފައެވެ.