ހިޔާ ޓަވަރުގައި މީހަކު ރަހީނުކޮށްފައިވަނީ މަސްތުވާތަކެތީގެ ވިޔަފަރީގެ ދެބަސްވުމެއްގައި: ފުލުހުން

ހިޔާ ޓަވަރުގައި މީހަކު ރަހީނުކުރީ، މަސްތުވާތަކެތީގެ ވިޔަފާރިއެއްގެ ތެރެއިން ހިނގި ދެބަސްވުމެއްގެ ސަބަބުންކަމަށް މައްސަލައިގައިގެ ތަހުޤީގަށް މިހާތަނަށް ފާހަގަވެފައިވާކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ. ފުލުހުން މިހެން ވިދާޅުވީ އެ ޚިދުމަތުން ބޭއްވި ނޫސްވެރިންގެ ބައްދަލުވުމުގައެވެ.

ހިޔާ ޓަވަރުގެ އެޕާޓްމަންޓެއްގައި މީހަކު ރަހީނުކޮށްގެން އުޅޭކަމަށް ފުލުހުންނަށް މަޢުލޫމާތު ލިބިފައިވަނީ މިމަހުގެ 12 ވަނަ ދުވަހުގެ ރޭ 19:40 ހާއިރުކަމަށް ފުލުހުން ވިދާޅުވެފައިވެއެވެ. ފުލުހުން ވަނީ ރަހީނުކޮށްފައިވާ މީހާ ސަލާމަތްކޮށް، 12 މީހުން ފުލުހުންގެ ބެލުމުގެ ދަށަށް ގެންގޮސްފައެވެ.

މި މައްސަލައާގުޅޭގޮތުން ވާހަކަ ދައްކަވަމުން އެސިސްޓަންޓް ކޮމިޝަނަރ އޮފް ޕޮލިސް މުޙައްމަދު ދާއޫދު ވިދާޅުވީ، ރަހީނުކޮށްގެން ގެންގުޅުނު މީހާއާއި، ރަހީނުކުރުމުގައި ބައިވެރިވި މީހުންނާ ގުޅުންތަކެއް އޮތްކަން މިހާތަނަށް ތަހުޤީގަށް ފާހަގަވެފައިވާކަމަށެވެ. އަދި އެ ގުޅުންތަކަކީ މަސްތުވާތަކެތީގެ ވިޔަފާރިއާއި ގުޅޭ ގުޅުންތަކެއްކަންވެސް ފާހަގަކުރެވިފައިވާކަމަށް އެސިސްޓަންޓް ކޮމިޝަނަރ އޮފް ޕޮލިސް ވިދާޅުވިއެވެ.

"މިހާ ހިސާބަށް އަޅުގަނޑުމެން ބެލި ބެލުމުން މި ފާހަގަވަނީ ރަހީނުކުރި ފަރާތާއި، ރަހީނުކުރުމުގައި ބައިވެރިވި މީހުންނާއި ގުޅުންތަކެއް އޮވޭ. އެ ގުޅުންތަކުގެ ތެރޭގައި ބޮޑަށް އަދި ތަހުޤީގުން އައިޑެންޓިފައިވާގޮތުގައި ހަމަ ބޮޑަށް ބެލެވެނީ މަސްތުވާތަކެތީގެ ވިޔަފާރިކުރުމުގެ ތެރޭގައި އުފެދުނު ދެބަސްވުމުގެ ތެރެއިން ހިނގައިގެން އުޅޭ ކަމެއްގެ ގޮތުގައި." އެސިސްޓަންޓް ކޮމިޝަނަރ އޮފް ޕޮލިސް މުޙައްމަދު ދާއޫދު ވިދާޅުވިއެވެ.

މި ނޫސްވެރިންގެ ބައްދަލުވުމުގައި ހެޑް އޮފް ޑްރަގް އެންފޯސްމަންޓް، ސްޕްރިންޑެންޓެޑް އޮފް ޕޮލިސް ނާހިދު ޙުސައިން ވިދާޅުވީ، މި މައްސަލައިގެ ފަހަތުގައި ހުރިކަމަށް ތުހުމަތުކުރެވޭ މީހާއަކީ ރ. އިންނަމާދޫ ފެރޯމާގޭ މުހައްމަދު ސަލީމްކަމަށެވެ. ކޯޓު އަމުރެގެ ދަށުން 65 އަހަރުގެ އެމީހާ ބަލާފާސްކުރިއިރު އޭނާގެ ހަށިގަނޑުން ޝައްކުކުރެވޭ އެއްޗެއް ހުރި ޖުމްލަ 13 ރަބަރު ޕެކެޓް ފެނިފައިވާކަމަށް ނާހިދު ވިދާޅުވިއެވެ. އަދި އޭނާ ދިރިއުޅޭ އެޕާޓްމަންޓް ބަލާ ފާސްކުރިއިރު މަސްތުވާތަކެއްޗަށް ޝައްކުކުރެވޭ އެއްޗެއް ހުރި 8 ރަބަރު ޕެކެޓް ފެނިފައިވާކަން ވަނީ ފާހަގަކުރައްވާފައެވެ. ނާހިދު ވިދާޅުވީ، އޭނާ އަކީ އުމުރުދުވަހަށް ޖަލަށް ލާފައިވާ މީހެއްކަމަށެވެ.

"މީނައަކީ 2016 ވަނަ އަހަރު މަސްތުވާތަކެތީގެ ޑައިނޯމިން ޓްރެފިކް ކުރުމުގެ މައްސަލައެއްގައި ކްރިމިނަލް ކޯޓުގައި ދައުވާކުރެވި 17 މާރޗް 2019 ގައި ސާބިތުވާކަމަށް ކަނޑައަޅާ އުމުރުދުވަހަށް ޖަލަށް ލާފައިވާ މީހެއް. އަދި މި ހުކުމް 6 އޮކްޓޯބަރ 2022 ގައި ހައިކޯޓުން ދަމަހައްޓާފައިވޭ. މި މައްސަލައިގެ ހުކުމް ތަންފީޒްކުރަމުން ދަނިކޮށް 2021 ޖުލައި 8 ވަނަ ދުވަހު މީނަވަނީ ގޭބަންދަށް ބަދަލުކުރެވިފައި. އަދި 2023 ވަނަ އަހަރު ޑައިނޯމިކް ޓްރެފިކްކުރުމުގެ އިތުރު މައްސަލައެއްގައި ހުޅުމާލޭ ކޯޓުގައި މިހާރުވެސް ޝަރީއަތް ހިނގަމުން އެބަދޭ." ހެޑް އޮފް ޑްރަގް އެންފޯސްމަންޓް ސްޕްރިންޑެންޓެޑް އޮފް ޕޮލިސް ނާހިދު ހުސައިން ވިދާޅުވިއެވެ.

ހިޔާ ޓަވަރުގައި މީހަކު ރަހީނުކޮށްފައި ހުރީ ހިޔާ 9ވަނަ ޓަވަރުގެ 20 ވަނަ ފަންގިފިލާގެ 11 ވަނަ އެޕާޓްމަންޓްގައެވެ. މިމައްސަލާގައި ހައްޔރުކުރި 12 މީހުންގެ ބަންދަށް ވަނީ މުއްދަތު ޖަހާފައެވެ.

މީގެ ކުރިން ފުލުހުން ވިދާޅުވެފައިވަނީ ރަހީނުކޮށްފައިވާ މިހާ ސަލާމަތްކުރީ، ފުލުހުން ގޮސް އެ އެޕާޓްމަންޓްގެ ދޮރު ވައްޓާލައިގެން އެތަނަށް ވަދެކަމަށެވެ. އަދި އެމީހާ ސަލާމަތްކޮށްފައިވަނީ އޭނާގެ އިނގިލި ބުރިކޮށްލަން ތައްޔާރުވެފައިވަނިކޮށްކަމަށް ފުލުހުން ވިދާޅުވެފައިވެއެވެ.

އެ ސީނަށް ދިޔަ ޕީއެސްއެމްނިއުސްގެ ނޫސްވެރިންނަށް ވަނީ އެ އެޕާޓުމަންޓުގައި ދަގަނޑާއި ހަނޑަހަ ފަދަ ތަކެއްޗާއި، ގެއްލުންދިނުމަށް ބޭނުންކުރާ އެކި ބާވަތުގެ ތަކެތިވެސް ފެހުއްޓާ ފެނިފައެވެ. އަދި އެތަނުން މަސްތުވާތަކެތި ބޭނުންކުރުމަށް ބޭނުންކުރާ އެކި ޒާތުގެ ތަކެތިކަމަށް ބެލެވޭ ޒާތުގެ އެއްޗެހިވެސް ފެނިފައިވެއެވެ. މިމައްސަލައާ ގުޅިގެން ފުލުހުން ދަނީ ބޮޑު ތަޙުޤީޤެއް ހިންގަމުންނެވެ.